ក្រសួង​បរិស្ថាន បើក​កិច្ចប្រជុំពិ​ភាក្សាអំពី​លទ្ធផល​នៃការ​អនុវត្ត​កម្មវិធីការ​កែទ​ម្រង់​ហិរញ្ញវត្ថុសា​ធារណៈ

នៅទីស្តីការក្រសួងបរិស្ថាន នៅថ្ងៃទី១៩ ខែមេសា ឆ្នាំ២០១៧នេះ លោក សាយ សំអាល់ រដ្ឋមន្ត្រីក្រសួងបរិស្ថាន បានអញ្ជើញជាអធិបតី និងដឹកនាំគណៈកម្មាធិការប្រតិបត្តិ (EXCOM) ក្រសួងបរិស្ថាន ដោយមានការចូលរួមពីថ្នាក់ដឹកនាំគ្រប់អង្គភាពចំណុះក្រសួងបរិស្ថាន និងមន្ទីរបរិស្ថានទាំង២៥ រាជធានី-ខេត្ត។
សូមជម្រាបផងដែរថា កិច្ចប្រជុំនេះផ្តោតសំខាន់ទៅលើ ១-លទ្ធផលនៃការអនុវត្តកម្មវិធីការកែទម្រង់ហិរញ្ញវត្ថុសាធារណៈ ២-ការពង្រឹងការអនុវត្តថវិកាកម្មវិធី ដើម្បីសម្រេចបានសូចនាករ ៣-ការពង្រឹងស្ថាប័ន និងភាពជាម្ចាស់រួមទាំងមានការទទួលខុសត្រូវខ្ពស់ក្នុងការដឹកនាំ ក៏ដូចជាការអនុវត្តសកម្មភាពការងារនៅក្នុងស្ថាប័នប្រកបដោយប្រសិទ្ធភាព។
នាឱកាសនោះផងដែរ លោក សាយ សំអាល់ បានផ្តល់អនុសាសន៍មួយចំនួនដើម្បីអនុវត្តបន្តរួមមាន៖
១-ការអភិវឌ្ឍតំបន់ឧទ្យានជាតិ ឱ្យមានលក្ខណៈជាស្តង់ដា និងពង្រឹងសេវាកម្មល្អ ដើម្បីទាក់ទាញភ្ញៀវទេសចរណ៍ ។
២-ការគិតគូរពីសារធាតុគ្រោះថ្នាក់ ដើម្បីកាត់បន្ថយផលប៉ះពាល់សុខភាពប្រជាជន។
៣-ពង្រឹងនិងយកចិត្តទុកដាក់ការរស់នៅរបស់ប្រជាសហគមន៍ ក្នុងតំបន់ការពារធម្មជាតិ។
៤-ពង្រឹងការអប់រំផ្សព្វផ្សាយបរិស្ថានតាមគ្រប់មធ្យោបាយ ដូចជាការបញ្ចាំងភាពយន្ត និងស្ពតអប់រំ ។
៥-ការលើកទឹកចិត្ត និងផ្តល់រង្វាន់ដល់អ្នកចូលរួមក្នុងកិច្ចគាំពារបរិស្ថានជាមួយស្ថាប័នឯកជន និងការរចនារង្វាន់លើកទឹកចិត្ត។
៦-ការពិនិត្យលទ្ធភាពសាងសង់អគារបន្ថែមសម្រាប់មជ្ឈមណ្ឌលជីវៈចម្រុះ និងមន្ទីរពិសោធន៍ជាតិ។
៧-និងការពិនិត្យលទ្ធភាពរៀបចំយានដ្ឋានសម្រាប់មន្ត្រីបរិស្ថាន៕