កម្ពុជា-ចិន​ចុះកិច្ចព្រម​ព្រៀងស្តីពី​គម្រោង​សហប្រតិបត្តិកា​រភូគព្ភវិទ្យាសា​ស្រ្តសមុទ្រ និង​​គ្រោះអន្តរាយ​ភូគព្ភសា​ស្រ្តតំបន់​ឆ្នេរ

ក្រោមកិច្ចសហប្រតិបត្តិការប្រកបដោយផ្លែផ្ការវាងកម្ពុជា-ចិនក្នុងកិច្ចអភិវឌ្ឍវិស័យរ៉ែ និងថាមពលនៅប្រទេសកម្ពុជា នៅថ្ងៃទី១៨ ខែមេសា ឆ្នាំ២០១៧ គណៈប្រតិភូក្រសួងរ៉ែ និងថាមពលរបស់កម្ពុជា និងគណៈប្រតិភូក្រសួងដែនដីនិងធនធានរបស់ចិន បានចុះហត្ថលេខាលើកិច្ចព្រមព្រៀងស្តីពីគម្រោងសហប្រតិបត្តិការភូគព្ភវិទ្យាសាស្រ្តសមុទ្រ និងគ្រោះអន្តរាយភូគព្ភសាស្រ្តតំបន់ឆ្នេរ នៅទីក្រុងប៉េកាំង ប្រទេសចិន។

ការចុះហត្ថលេខាលើកិច្ចព្រមព្រៀងស្តីពីគម្រោងសហប្រតិបត្តិការខាងលើនេះនឹងផ្តល់អត្ថប្រយោជន៍ជាច្រើនដល់ប្រទេសកម្ពុជាយើង ក្នុងការអភិវឌ្ឍវិស័យរ៉ែនៅកម្ពុជាផ្ទាល់។ គោលបំណងសំខាន់ៗនៃគម្រោងនេះរួមមាន៖
១- កសាងសមត្ថភាពវិទ្យាសាស្រ្ត និងបច្ចេកទេសដោយការចែករំលែកបទពិសោធន៍ និងវិធីសាស្រ្តរបស់ភាគីចិនក្នុងការកសាងផែនទីភូគព្ភសាស្រ្ត និងរូបភូគព្ភសមុទ្រ ការត្រួតពិនិត្យតាមដានគ្រោះអន្តរាយភូគព្ភសាស្រ្តតំបន់ឆ្នេរនិងការវាយតម្លៃហានិភ័យ កាចងក្រងផែនទី។ល។
២- បង្កើតបណ្តាញ និងវេទិកាសហប្រតិបត្តិការសម្រាប់អ្នកជំនាញការភូគព្ភវិទ្យាសាស្រ្តសមុទ្ររបស់ភាគីទាំងពីរ។
៣- ដំណើរការសិក្សាប្រៀបធៀបលើលក្ខណៈហានិភ័យភូគព្ភសាស្រ្តតំបន់ឆ្នេរ និងយន្តការសម្រាប់ការធ្វើអោយប្រសើរឡើងនូវសមត្ថភាពក្នុងការកាត់បន្ថយ និងបង្កាគ្រោះអន្តរាយ។
៤-ដំណើរការចងក្រងស៊េរីផែនទីភូគព្ភសាស្រ្តដី-សមុទ្រ និងការសិក្សាស្រាវជ្រាវចលនាសម្ព័ន្ធសមុទ្រជ្រៅនៅកម្ពុជា៕