បន្ទាប់ពីបានស្នាក់អាស្រ័យនៅទីក្រុងតូក្យូរយៈពេល៣ថ្ងៃ ដើម្បីអញ្ជើញចូលរួមកិច្ចប្រជុំកំពូលមេគង្គ -ជប៉ុន លើកទី៧ ដែលបានបញ្ចប់ទៅប្រកបដោយលទ្ធផលដ៏ត្រចះត្រចង់រួចមក នៅព្រឹកថ្ងៃទី៥ ខែកក្កដា សម្តេចអគ្គមហាសេនាបតីតេជោ ហ៊ុន សែន និងគណៈប្រតិភូ ជាន់ខ្ពស់រាជរដ្ឋាភិបាលកម្ពុជា បានអញ្ជើញធ្វើដំណើរចាកចេញពីចំណតអាកាសយានដ្ឋានអន្តរជាតិ ហា ណេដា ទីក្រុងតូក្យូ តាមយន្តហោះពិសេសរបស់ព្រះរាជាណាចក្រកម្ពុជា ក្នុងដំណើរអញ្ជើញទៅបំពេញ ទស្សនកិច្ចផ្លូវការទៅកាន់ ទីក្រុងគីតាគ្យូស៊្យូ (Kita-Kyushu) ខេត្តហ៊្វូគុអូកា (Fukuoka) និងទីក្រុងហ្សីម៉ូ ណូសីកគី (Shimonoseki) ខេត្តយ៉ាម៉ាហ្គូជី (Yamaguchi) ដែលជាមណ្ឌលបោះឆ្នោតរបស់ឯកឧត្តម ហ្សិនហ្សូ អាបេ នាយករដ្ឋមន្រ្តីជប៉ុន។
នៅទីក្រុងហ្សីម៉ូ ណូសីកគី ខេត្តយ៉ាម៉ាហ្គូជី សម្តេចតេជោ ហ៊ុន សែន និងគណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញទស្សនាផ្សារត្រីដ៏ល្បីល្បាញ ក្នុងទីក្រុងហ្សីម៉ូ ណូសីកគី ខេត្តយ៉ាម៉ាហ្គូជី ប្រទេសជប៉ុន។
សម្តេចតេជោនាយករដ្ឋមន្រ្តី និងគណៈប្រតិភូរាជរដ្ឋាភិបាលកម្ពុជា អញ្ជើញទស្សនាដោយផ្ទាល់ពីការលក់ដូររបស់ប្រជាពលរដ្ឋជប៉ុន ក្នុងទីផ្សារលក់ត្រីដ៏ល្បីល្បាញបំផុតនេះ។ ផ្សារលក់ត្រីដ៏ទំនើបនេះ ត្រូវបានបង្កើតឡើងដ៏យូរលង់ណាស់មកហើយ ពេលគឺជាប្រជាពលរដ្ឋក្នុងតំបន់នេះ មានមុខរបរជាអ្នកប្រកបរបរនេសាទសមុទ្រទឹកប្រៃ និងនេសាទទឹក សាប ដែលជាផ្នែកមួយនៃដែនដីដ៏សំបូរបែបនេះ។ ទីក្រុងហ្សីម៉ូណូសីកគី ខេត្តយ៉ាម៉ាហ្គូជី គឺជាដែនកោះមួយដែលមានខ្សែទឹកសមុទ្រ ជាប់នឹងសាធារណរដ្ឋប្រជាមានិតចិន និងសាធារណរដ្ឋកូរ៉េ និងស្ថិតនៅភាគ ខាងជើងនៃទីក្រុងតូក្យូ ប្រទេសជប៉ុន។ ប្រជាពលរដ្ឋមានមុខរបរជាអ្នកនេសាទ និងបានប្រែក្លាយពីការនេសាទ និងការលក់ដូរត្រីគ្រប់ប្រភេទឲ្យក្លាយទៅជាតំបន់ទេសចរណ៍ ប្រកបដោយការទាក់ទាញបំផុត ក្នុង ចំណោមប្រជាជនជប៉ុន។
ក្នុងមួយឆ្នាំៗមានប្រជាពលរដ្ឋជប៉ុនប្រមាណពី១លាន៣សែននាក់ ទៅ២លាននាក់ មកពីគ្រប់ទិសទីក្នុងប្រទេសជប៉ុន បានមកទទួលទានត្រីដ៏មានរស់ជាតិនៅក្នុងតំបន់នេះ ដោយបានធ្វើឲ្យតំបន់នេះមានការផ្លាស់ប្តូរមុខមាត់ថ្មី តាមរយៈការអភិវឌ្ឍនៅនឹងកន្លែងផ្ទាល់តែម្តង។
ប្រជាពលរដ្ឋជប៉ុនដែលបានមកកាន់ទីនេះ ប្រសិនជាពួកគេមិនបានទទួលទានត្រីក្នុងតំបន់នេះទេ គឺប្រាកដណាស់ថា ពួកគេហាក់មិនបានស្គាល់ដែនដីកោះដ៏អស្ចារ្យមួយផងដែរ។ ដោយសារតែភាពល្បីល្បាញនេះ ធ្វើឲ្យតំបន់នេះទទួលបាននូវការទាក់ទាញ និងការពេញនិយមពីសំណាក់ប្រជាពលរដ្ឋទូទៅ រួមទាំងអ្នកទេសចរណ៍ អន្តរជាតិនានាផងដែរ។ ជាមួយនិងការអញ្ជើញទស្សនាដល់ទីកន្លែង សម្តេចតេជោ បានទទួលនូវសាច់ត្រីស្រស់ដែលផ្តល់ជូនដោយអ្នកលក់ក្នុងផ្សារ។ បើតាមការអះអាងពីមន្រ្តីថ្នាក់ដឹកនាំផ្សារដ៏ទំនើបនោះបានឲ្យដឹងថា ជាធម្មតាប្រជាពលរដ្ឋបានធ្វើការនេសាទរបស់ពួកគេ ក្នុងនាមជាលក្ខណៈគ្រួសារ ហើយអ្វីដែលពិសេសទៅទៀតនោះ សាច់ត្រីធម្មជាតិទាំងអស់មានរស់ជាតិឆ្ងាញ់យ៉ាងពិសេសបំផុត ដែលយើងមិនអាចមើលរំលងបាន។
ផ្សារលក់ផលិតផលសាច់ត្រីដ៏ទំនើបនេះ ក្រៅពីការលក់រាយជូនភ្ញៀវទេសចរណ៍ក៏ដូចជាប្រជាពលរដ្ឋរស់នៅក្នុងទីក្រុង និងប្រជាពលរដ្ឋមកពីតំបន់ផ្សេងៗទៀតនោះ ទីផ្សារនេះក៏បានធ្វើការលក់ដុំសម្រាប់ធ្វើការនាំចេញ ទៅកាន់ទីផ្សារអន្តរជាតិធំៗផងដែរ។
នៅក្នុងឱកាសនៃ ការអញ្ជើញទស្សនាដោយផ្ទាល់នោះ សម្តេចតេជោបានទទួលនូវការស្វាគមន៍យ៉ាងស្និតស្នាល ពីសំណាក់ប្រជាពលរដ្ឋដែលជាអាជីវករ អ្នកទេសចរណ៍ ដែលមានវត្តមានទិញផលិតផលសាច់ត្រី ក្នុងទីផ្សារដ៏ទំនើបនោះផងដែរ។ សម្តេចតេជោនាយករដ្ឋមន្រ្តីមានប្រសាសន៍ថ្លែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំមូលដ្ឋាន ដែលបានខិតខំថែរក្សានិងអភិរក្សទីផ្សារឲ្យស្ថិតនៅគង់វង់ ពិសេសគឺការប្រែក្លាយតំបន់នេះឲ្យក្លាយទៅជាតំបន់ទេសចរណ៍ ប្រកបដោយការទាក់ទាញបំផុតរបស់ប្រ ទេសជប៉ុន។
សូមបញ្ជាក់ដែរថា គីតាគ្យូស៊្យូ គឺជាទីក្រុងមួយដែលបានបង្កើតឡើងនៅឆ្នាំ១៩៦៣ មានផ្ទៃក្រឡាទំហំជាង៤៨៦គីឡូ ម៉ែត្រក្រឡា និងមានប្រជាជនរស់នៅជាង៩៨៣ពាន់នាក់។
ទីក្រុងគីតាគ្យូស៊្យូ មានរោងចក្រ Nippon Steel Comporation Zenrin Company ដែលមានជំនាញខាងផែនទី និងបង្កើត Sottwareនាវាចរណ៍ រោងចក្រ TOTO ដែលផលិតចានបង្គន់ល្បីឈ្មោះ ក្រុមហ៊ុន Yaskawa និងក្រុមហ៊ុន StarFlyer ជាក្រុមហ៊ុនអាកាសចរណ៍ ដែលមានការិយាល័យកណ្តាលក្នុងទីក្រុង។ ថ្មីៗនេះគឺនៅឆ្នាំ២០០៩ Bridgestone Comporation បានបើកស្នាក់ការក្នុងទីក្រុងនេះ ដើម្បីផលិតកៅស៊ូកង់រថយន្តប្រភេទធំសម្រាប់រថយន្ត ក្នុងវិស័យសំណង់និងរុករករ៉ែ៕
បន្ទាប់មកនៅវេលាថ្ងៃត្រង់នោះដែរ ឯកឧត្តម តូម៉ូអាគី ណាកាអូ អភិបាលក្រុងហ្សីម៉ូណូសីកគី បាន ប្រារព្ធរៀបចំពិធីទទួលទានអាហារថ្ងៃត្រង់ ជូនសម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជ រដ្ឋាភិបាលកម្ពុជា ដែលបានចំណាយពេលវេលាដ៏មានតម្លៃបំផុត អញ្ជើញមកទស្សនាទីក្រុងហ្សីម៉ូណូសីកគី ខេត្តយ៉ាម៉ាហ្គូជី លើទឹកដីដ៏ពិសិដ្ឋនេះ។ ឯកឧត្តម តូម៉ូអាគី ណាកាអូ អភិបាលក្រុងហ្សីម៉ូណូសីកគី មាន ប្រសាសន៍ថ្លែងនូវអំណរគុណយ៉ាងជ្រាលជ្រៅ និងសូមសំដែងនូវការធ្វើគារវកិច្ចយ៉ាងកក់ក្តៅបំផុត ក្នុងនាមថ្នាក់ដេកនាំនិងប្រជាជនទីក្រុងហ្សីម៉ូណូសីកគី ជូនចំពោះវត្តមានដ៏ឧត្តុង្គឧត្តមរបស់សម្តេចតេជោនាយករដ្ឋ មន្រ្តី និងគណៈប្រតិភូដែលបានចំណាយពេលវេលាដ៏មានតម្លៃ អញ្ជើញមកទស្សនាដែនដីដ៏ពិសិដ្ឋនេះ។
ក្នុងពិធីដ៏មានអត្ថន័យនោះ ឯកឧត្តមអភិបាលក្រុងហ្សីម៉ូណូសីកគី មានប្រសាសន៍ថា នេះគឺជាលើកទី១ ហើយដែលមេដឹកនាំប្រមុខរដ្ឋាភិបាល នៃប្រទេសមេគង្គ ដែលបានអញ្ជើញមកធ្វើទស្សនកិច្ចផ្សារត្រីដ៏ល្បី ល្បាញបំផុតនេះ ដែលនោះបានបង្ហាញឲ្យឃើញពីការយកចិត្តទុកដាក់បផុត ពីសំណាក់សម្តេចតេជោ នាយករដ្ឋមន្រ្តី ចំពោះទំនាក់ទំនងជាប្រពៃណីនៃប្រទេសយើងទាំងពីរកម្ពុជា‑ជប៉ុន។
ក្នុងពិធីទទួលទានអាហារថ្ងៃត្រង់នោះដែរ ឯកឧត្តមអភិបាលក្រុងហ្សីម៉ូណូសីកគី បានជំរាបជូនសម្តេចតេជោនាយករដ្ឋមន្រ្តីពី សក្តានុពល កំណើនសេដ្ឋកិច្ច និងជីវភាពរស់នៅរបស់ប្រជាពលរដ្ឋរស់នៅទីក្រុងហ្សីម៉ូណូសីកគី ជូនសម្តេចតេជោនាយករដ្ឋមន្រ្តី និងគណៈប្រតិភូបានស្វែងយល់ផងដែរ។ ជាការឆ្លើយតបសម្តេចតេជោនាយក រដ្ឋមន្រ្តីមានប្រសាសន៍ថ្លែងនូវអំណរគុណយ៉ាងជ្រាលជ្រៅបំផុត ជូនចំពោះថ្នាក់ដឹកនាំនិងប្រជាពលរដ្ឋទីក្រុងហ្សីម៉ូណូសីកគី ដែលបានទទួលបដិសណ្ឋារកិច្ចនិងស្វាគមន៍យ៉ាងកក់ក្តៅបំផុត ចំពោះវត្តមានរបស់ សម្តេចនិងគណៈប្រតិភូរាជរដ្ឋាភិបាលកម្ពុជា មកកាន់ទីក្រុងហ្សីម៉ូណូសីកគី ដ៏ស្រស់បំព្រងនេះ។
សម្តេចតេជោនាយករដ្ឋមន្រ្តីក៏បានគូសបញ្ជាក់ពីភាពជាអ្នកជិតខាងល្អ នៃទំណាក់ទំនងកិច្ចសហប្រតិបត្តិការ នៃប្រទេសនិងប្រជាជនទាំងពីរ ដែលបានឈានដល់ភាពជាដៃគូយុទ្ធសាស្រ្ត ហើយនៅពេលខាងមុខថ្នាក់ដឹកនាំ ទាំងពីរនឹងខិតខំជំរុញទំនាក់ទំនងនៃប្រទេសពីរ ឲ្យឈានដល់ភាពជាដៃគួយុទ្ធសាស្រ្តទូលំទូលាយ៕
No comments:
Post a Comment