នៅព្រឹកថ្ងៃទី៣ ខែកក្កដា ឆ្នាំ២០១៥ ដែលជាថ្ងៃទី២នៃការស្នាក់អាស្រ័យអញ្ជើញចូលរួមកិច្ចប្រជុំកំពូលមេគង្គ-ជប៉ុន លើកទី៧ នៅទីក្រុងតូក្យូប្រទេសជប៉ុន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា អញ្ជើញពិសារអាហារពេលព្រឹកការងារជាមួយ សមាគមន៍មិត្តភាពសភាកម្ពុជា- ជប៉ុន ដឹកនាំដោយឯកឧត្តម Takeo Hiranuma ប្រធានសមាគមមិត្តភាពសភាកម្ពុជា-ជប៉ុន។
ឯកឧត្តម Takeo Hiranuma មានប្រសាសន៍សំដែងនូវការស្វាគមន៍សាជាថ្មីម្តងទៀត ដែលបានជួបពិភាក្សាការងារ ក្នុងពេលអាហារពេលព្រឹកជាមួយសម្តេចតេជោនាយករដ្ឋមន្រ្តី។
ឯកឧត្តមមានប្រសាសន៍សំដែងនូវការវាយ តម្លៃខ្ពស់ចំពោះភាពរីកចំរើននៃទំនាក់ទំនងរបស់ប្រទេសទាំងពីរកម្ពុជា ជប៉ុន ពិសេសក្នុងទំនាក់ទំនងក្នុងរយៈពេល៦០ឆ្នាំបន្ទាប់ពីប្រទេសទាំងពីរ បានបង្កើតទំនាក់ទំនងការទូតជាមួយគ្នា។ ក្នុងជំនួបពិភាក្សាគ្នា នេះ ឯកឧត្តមប្រធានមានប្រសាសន៍ជំរាបជូន សម្តេចតេជោនាយករដ្ឋមន្រ្តី ពីការចូលរួមរំលែកទុក្ខយ៉ាង ក្រៀមក្រំបំផុត ចំពោះការទទួលមរណៈភាពរបស់សម្តេចអគ្គមហាធម្មពោធិសាល ជា ស៊ីម ក្នុងនោះឯកឧត្តមបានបញ្ជូនគណៈប្រតិភូរបស់សមាគមន៍សភាមិត្តភាពកម្ពុជា ជប៉ុន ទៅមកចូលរួមគោរពវិញ្ញាណក្ខន្ធ សព សម្តេចអគ្គមហាធម្មពោធិសាល ជា ស៊ីម ដល់រាជធានីភ្នំពេញផងដែរ។
ឯកឧត្តមប្រធានក៏បានវាយ តម្លៃខ្ពស់ពីភាពរីកចំរើនរបស់ប្រទេសកម្ពុជា ក្រោមការដឹកនាំរបស់សម្តេចតេជោនាយករដ្ឋមន្រ្តី ពិសេសទៅទៀតនោះ ការកសាងស្ពានភឿបាសាឆ្លងកាត់ទន្លេរអ្នកលឿង ដែលសម្ភោធដាក់ឲ្យប្រើប្រាស់ជាផ្លូវការ កាលពីពេលថ្មីៗកន្លងទៅ និងរួមចំណែកជំរុញកំណើនសេដ្ឋកិច្ចរបស់ប្រទេសកម្ពុជា ឲ្យកាន់តែមានការកើនឡើងបន្លែមទៀ។
ឯកឧត្តមបន្តថា ប្រទេសយើងទាំងពីរបានកសាងនូវទំនាក់ទំនង និងកិច្ចសហប្រតិបត្តិការលើគ្រប់វិស័យ និងពេលបច្ចុប្បន្នបានក្លាយទៅជាទំនាក់ទំនងក្នុងភាពជាយុទ្ធសាស្រ្ត។ ក្នុងជំនួបពិភាក្សាគ្នា នោះដែរ ឯកឧត្តម Takeo Hiranuma មានប្រសាសន៍សំដែងនូវការគាំទ្រ ចំពោះច្បាប់ស្តីពីការគ្រប់គ្រងសមាគមន៍ និងអង្គការក្រៅរដ្ឋាភិបាល ប៉ុន្តែឯកឧត្តមក៏មានការព្រួយបារម្ភពីការអនុម័តច្បាប់ ដ៏មានសារៈសំខាន់នោះ ដែលកម្ពុជាគ្រោងនិងអនុម័តនៅពេលខាងមុខ។
សម្តេចតេជោនាយករដ្ឋមន្រ្តីមានប្រសាសន៍ឯកភាព ចំពោះការលើកឡើងរបស់ឯកឧត្តម Takeo
សម្តេចតេជោបន្តថា ការបង្កើតច្បាប់នោះគឺ មិនមែនសម្លាប់សមាគម និងអង្គការក្រៅរដ្ឋាភិបាលនោះទេ ផ្ទុយទៅវិញគឺដើម្បីធានានូវប្រសិទ្ធភាព និងនិរន្តរភាពរបស់សមាគម និងអង្គការក្រៅរដ្ឋាភិបាលនានា ដែលបំពេញការងារក្នុងប្រទេសកម្ពុជា។ សម្តេចតេជោនាយករដ្ឋមន្រ្តីមានប្រសាសន៍ដែរថា ជាការពិតច្បាប់នោះត្រូវបានយកមកពិភាក្សាជាយូរណាស់មកហើយ ប៉ុន្តែកម្ពុជាបានពន្យារហូតមកដល់ពេលនេះ ទើបយើងយកមកពិនិត្យពិភាក្សា ហើយ នៅថ្ងៃទី១០កក្កដាខាងមុខ សេចក្តីព្រាងច្បាប់នោះនឹងបើកធ្វើ សិក្ខាសាលាដើម្បីពិភាក្សាជាជំហរទៅលើច្បាប់ស្តីពី ការគ្រប់គ្រងសមាគមន៍ និងអង្គការក្រៅរដ្ឋាភិបាល មុននឹងឈានទៅធ្វើការអនុម័តក្នុងសភា។ ក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្រ្តីមានប្រសាសន៍សំណូមពរដល់ឯកឧត្តម លោកជំទាវ ជាសមាជិកសភារបស់ប្រទេសជប៉ុន បន្តការគាំទ្រដល់រដ្ឋាភិបាលជប៉ុន ក្នុងការអនុម័តនូវរាល់សេចក្តីសំរេចណាមួយដែលទាក់ទិនទៅនិង ការគាំទ្រដល់គំរោងអភិវឌ្ឍន៍របស់ប្រទេសកម្ពុជា ប្រទេសក្នុងមហាអនុតំបន់មេគង្គ និងក្នុងក្របខណ្ឌអាស៊ាន៕
No comments:
Post a Comment