ក្នុងជំនួបពិភាក្សា ជាមួយឯកឧត្តម កែវ រ៉េមី រដ្ឋលេខាធិការនៃទីស្ដីការគណៈរដ្ឋមន្រ្ដី នៅអាគារមិត្តភាព នាព្រឹកថ្ងៃទី២ ខែកក្កដា ឆ្នាំ២០១៥ ប្រតិភូសហរដ្ឋអាមេរិកមួយក្រុម ដឹកនាំដោយ ឯកឧត្តម STEPHEN RAPPឯកអគ្គរដ្ឋទូតគោចរ សហរដ្ឋអាមេរិកទទួលបន្ទុកឧក្រិដ្ឋកម្មសង្គ្រាមបានមានប្រសាសន៍ថា៖ គោលបំណងសំខាន់របស់ប្រតិភូមកកាន់ប្រទេសកម្ពុជានាពេលនេះ គឺក្នុងន័យគាំទ្រអំពីដំណើរការ អង្គជំនុំជម្រះវិសាមញ្ញក្នុងតុលាការកម្ពុជា អ.វ.ត.ក ឬសាលាក្ដីខ្មែរក្រហម ដែលសហរដ្ឋអាមេរិក បានជួយគាំទ្រចាប់តាំងពីថ្ងៃការបង្កើត សាលាក្ដីកូនកាត់មួយនេះមក។
ឯកឧត្តម STEPHEN RAPP បានប្រសាសន៍បន្ដទៀតថា៖ ទាក់ទងទៅនឹងដំណើរការនៃ អង្គជំនុំជំរៈ វិសាមញ្ញក្នុងតុលាការកម្ពុជាក្នុងការកាត់ទោសអតីតៈមេដឹកនាំខ្មែរក្រហមដើម្បីស្វែងរកយុត្តិធម៌ជូនដល់ជនរងគ្រោះនេះដែរ ប្រតិភូសហរដ្ឋអាមេរិក ក៍មានបំណងចូលរួមស្ដាប់ការបកស្រាយករណី បណ្ដឹង០០២របស់តុលាការ ដែលនឹងបើកដំណើរការនៅថ្ងៃទី២ដល់់ថ្ងៃទី៧ ខែកក្កដាឆ្នាំ២០១៥ អំពីបណ្ដឹង ឧទ្ធរណ៍ទាក់ទងនឹងសាលក្រម ដែលតុលាការបានចេញដីកា កាលពីខែសីហា ឆ្នាំ២០១៤ កន្លងមក ដោយបានកាត់ទោស អតីតៈមេដឹកនាំខ្មែរក្រហមចំនួន២រូប គឺ ទណ្ឌិត នួន ជា និង ខៀវ សំផន តម្រូវជាប់ព័ន្ធធានាគារអស់មួយជីវិតពីបទឧក្រិដ្ឋកម្មប្រឆាំង មនុស្សជាតិ នៅក្នុងរបបកម្ពុជាប្រជាធិបតេយ្យ ចន្លោះពីថ្ងៃ១៧ មេសាឆ្នាំ១៩៧៥ ដល់ខែធ្នូ ឆ្នាំ ១៩៧៧ ។
ក្នុងនាមរាជារដ្ឋាភិបាលកម្ពុជា ឯកឧត្តម កែវ រ៉េមី បានថ្លែងអំណរគុណ ដល់រដ្ឋាភិបាល សហរដ្ឋអាមេរិក ដែលបានចូលរួមចំណែក ជាមួយរាជរដ្ឋាភិបាលកម្ពុជា ក្នុងការបង្កើតសាលាក្ដីខ្មែរក្រហម ដើម្បីធ្វើការកាត់ទោសអតីតៈមេដឹកនាំខ្មែរក្រហម ស្វែងរកយុត្តិធម៌ជូនដល់ជនរងគ្រោះ ពិសេសតាមរយៈការបញ្ជូនគណៈប្រតិភូ មកចូលរួមតាមដានស្ដាប់ការបើកសវនាការបណ្ដឹងឧទ្ធរណ៍លើករណីសំណុំរឿង០០២ ដែលអង្គជំនុំជម្រះវិសាមញ្ញក្នុងតុលាការកម្ពុជា នឹងធ្វើឡើងចាប់ពីថ្ងៃទី២ ដល់ថ្ងៃទី៧ ខែកក្កដា ឆ្នាំ២០១៥នេះផងដែរ៕
No comments:
Post a Comment