ព្រះមហាក្សត្រខ្មែរ ផ្ញើព្រះរាជសាររំលែកទុក្ខជូនប្រធានាធិបតី ស៊ី ជិនពីង ក្រោយមានករណីរញ្ជួយដីនៅប្រទេសចិន

ព្រះករុណា ព្រះបាទសម្តេចព្រះបរមនាថ នរោត្តម សីហមុនី កាលពីថ្ងៃទី០៩ ខែសីហា ឆ្នាំ២​០១៧ បានផ្ញើព្រះរាជសាររំលែកទុក្ខ ជូនលោក ស៊ី ជិនពីង ប្រធានាធិបតីចិន បន្ទាប់ពីប្រ​ទេសនេះ បានរងគ្រោះដោយគ្រោះរញ្ជួយដីដែលបណ្តាលឱ្យមនុស្សស្លាប់ និងរបួសរាប់រយនាក់។ ក្នុងព្រះរាជសារព្រះមហាក្សត្របានបញ្ជាក់ថា «ខ្ញុំមានការសោកស្តាយយ៉ាងជ្រាលជ្រៅដោយបានដឹងថា មានមនុស្សជាច្រើនត្រូវបានសម្លាប់និងរងរបួសបន្ទាប់ពីការរញ្ជួយព្រះធរ​ណី​ដ៏ខ្លាំងមួយបានវាយប្រហារ ទីក្រុងជីហ្សូហ្គូដែលជាតំបន់ទេសចរដ៏ពេញនិយមនៅក្នុងខេត្តស៊ីឈួនភាគនិរតីប្រទេសចិន។ ក្នុងនាមរាជវង្សានុវង្ស និងប្រជាជនកម្ពុជា និងក្នុងនាមខ្លួនខ្ញុំផ្ទាល់ ខ្ញុំសូមជូនពរឯកឧត្ដមប្រធានាធិបតី និងតាមរយៈព្រះរាជសារផ្ញើជូនឯកឧត្តមនេះ ខ្ញុំសូមផ្ញើជូនប្រជាជនដ៏មហិមានៃប្រទេសចិន ជាពិសេសក្រុមគ្រួសារសាច់ញាតិនៃជនរងគ្រោះ នូវការចូលរួមរំលែកទុក្ខយ៉ាងក្រៀមក្រំ និងការអាណិតអាសូរជាពន់ពេក»។

សូមបញ្ជាក់ថា ចំនួនមនុស្សស្លាប់ដោយសារគ្រោះរញ្ជួយដីកម្រិតធ្ងន់ ៧.០រ៉ិចទ័រ ដែលបានវាយប្រហារតំបន់មួយកន្លែងក្នុងខេត្ត Sichuan ភាគនិរតីនៃប្រទេសចិន កាលពីយប់ថ្ងៃអង្គារ បានកើនដល់ ១៣នាក់ ហើយ ខណៈអ្នករងរបួសក៏បានឡើងដល់ ១៧៥នាក់ ផងដែរ។ គ្រោះរញ្ជួយផែនដីដ៏អាក្រក់នេះ បានកើតមានឡើងនៅចំស្រុក Jiuzhaigou កាលពីវេលាម៉ោង៩៖១៩នាទីយប់ ថ្ងៃអង្គារ ហើយបើតាមមជ្ឈមណ្ឌលស្ទាបស្ទង់គ្រោះរញ្ជួយដីចិន វាមានជម្រៅប្រមាណ ២០គីឡូម៉ែត្រ នៅក្រោមដីតែម្តង ខណៈគិតត្រឹមព្រឹកថ្ងៃពុធនេះ មនុស្សចំនួន ១៣នាក់ បានបាត់បង់ជីវិត និង ១៧៥នាក់ ផ្សេងទៀតបានទទួលរបួស។

ប្រធានធិបតីចិនលោក ស៊ី ជិនពីង រួមទាំងនាយករដ្ឋមន្រ្តីចិន លោក Li Keqiang ក៏បានបង្គាប់ឱ្យគ្រប់ស្ថាប័នពាក់ព័ន្ធទាំងអស់ ខិតខំប្រឹងប្រែងឱ្យអស់ពីលទ្ធភាពដើម្បីជួយសង្រ្គោះ អ្នកដែ​ល​បានទទួលរបួសដោយសារគ្រោះរញ្ជួយដីនេះ ជាបន្ទាន់ផងដែរ៕

(ប្រភព៖ Fresh News)