តាមរយៈការធ្វើវិសោធនកម្មច្បាប់ស្តីពីគណបក្សនយោបាយលើកទី២ ដែលត្រូវបានចូលជាធរមានកាលពីថ្ងៃទី២៩ ខែកក្កដា ឆ្នាំ២០១៧កន្លងទៅនេះ បានធ្វើឲ្យគេមើលឃើញថា គណបក្សសង្គ្រោះជាតិកំពុងជួបគ្រោះធំ ដោយសារតែវិបត្តិខ្វះធនធានមនុស្ស និងអ្នកមានសមត្ថភាពគ្រប់គ្រាន់ដើម្បីជួយដល់គណបក្ស មួយនេះ ព្រោះសូម្បីតែប្បញ្ញត្តិដែលមានចែងក្នុងច្បាប់ស្តីពីគណបក្សនយោបាយ ក៏ក្រុមអ្នកច្បាប់របស់បក្សប្រឆាំង មិនមានសមត្ថភាពមើលយល់ មិនដឹងទិសតំបន់ផង។
ជាក់ស្តែងយោងតាមមាត្រា ៦ថ្មី(ពីរ) ត្រង់ចំណុចទី៦ ចែងយ៉ាងច្បាស់ថា គ្រប់គណបក្សនយោបាយមិនត្រូវប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិតជាប់ទោសពីបទឧក្រិដ្ឋ ឬពីបទមជ្ឈិម ដើម្បីជាផលប្រយោជន៍នយោបាយសម្រាប់គណបក្សនយោបាយរបស់ខ្លួន។ ចំណុចនេះ គឺត្រូវអនុវត្តភ្លាមតាមអនុភាពនៃការប្រកាសជាការប្រញាប់នៃច្បាប់ មានន័យថា រូបទណ្ឌិត សម រង្ស៊ី ត្រូវតែដកចេញពីស្លាកគណបក្សសង្គ្រោះជាតិឱ្យអស់នៅទូទាំងប្រទេសកម្ពុជា នៅពេលច្បាប់នេះចូលជាធរមានភ្លាមៗ។ ប៉ុន្តែគណបក្សសង្គ្រោះជាតិហាក់មិនយល់ ឬមិនបានសិក្សាឲ្យលំអិតស៊ីជម្រៅ ពីប្បញ្ញត្តិច្បាប់នេះទេ គឺនៅតែបន្តតាំងរូបទណ្ឌិត សម រង្ស៊ី នៅលើស្លាកគណបក្សដដែល បើទោះបីច្បាប់នេះ ត្រូវបានចូលជាធរមានអស់រយៈពេល ជាង ១សប្តាហ៍ហើយក្តី។
ពាក់ព័ន្ធរឿងនេះ អ្នកវិភាគ ចៅ ចាក់ស្មុក បានសរសេរលិខិតមិត្តអ្នកអានមួយច្បាប់រំលឹក និងពន្យល់ដល់គណបក្សសង្គ្រោះជាតិអំពីមាត្រាមួយចំនួន នៃវិសាលភាពវិសោធនកម្មច្បាប់ស្តីពីគណបក្សនយោបាយ ដែលអាចនឹងធ្វើឲ្យគណបក្សសង្គ្រោះជាតិ ត្រូវប្រឈមមុខទី១-ផ្អាកសកម្មភាពគណបក្សរយៈពេល ៥ឆ្នាំ ឬទី២-រំលាយគណបក្សចោល ប្រសិនបើគណបក្សសង្គ្រោះជាតិ មិនបានអនុវត្តឲ្យបានត្រឹមត្រូវ។ ការដករូបទណ្ឌិត សម រង្ស៊ី ចេញពីស្លាកគណបក្សមិនមែនត្រូវប្រើរយៈពេល ៩០ថ្ងៃ ក្រោយច្បាប់ស្តីពីគណបក្សនយោបាយចូលជាធរមាននោះឡើយ គឺត្រូវអនុវត្តភ្លាមៗតែម្តង។ យោងមាត្រា ៤៥ ថ្មី (ស្ទួន) គណបក្សនយោបាយដែលត្រូវបានសម្រេចផ្អាកសកម្មភាព មិនត្រូវបានអនុញ្ញាតឱ្យចូលរួមប្រកួតប្រជែងក្នុងការបោះឆ្នោតឡើយ។ ត្រូវលុបឈ្មោះចេញពីបញ្ជីគណបក្សនយោបាយឈរឈ្មោះបោះឆ្នោត ក្នុងករណីគណបក្សនយោបាយនោះ ត្រូវបានសម្រេចផ្អាកសកម្មភាព ឬត្រូវសម្រេចរំលាយស្របតាមច្បាប់នេះ។
តាមពិតការទុករយៈពេល ៩០ ថ្ងៃយ៉ាងយូរ គិតចាប់ពីថ្ងៃដែលច្បាប់នេះចូលជាធរមាន គឺច្បាប់ចង់សំដៅតែទៅលើគណបក្សណាដែលយកឈ្មោះ ឬរូបរបស់រូបវ័ន្តបុគ្គល ធ្វើជាឈ្មោះ និងរូបសញ្ញា (Logo) របស់បក្សប៉ុណ្ណោះ ដូចមានចែងក្នុងមាត្រា៤៨ ថ្មី(ស្ទួន)។ គឺចង់សំដៅទៅលើឈ្មោះ ស្លាកសញ្ញាបក្ស (Logo) ដោយមិនត្រូវយករូបវ័ន្តបុគ្គលយកមកដាក់ ដើម្បីកុំឲ្យគណបក្សក្លាយជារបស់បុគ្គល នេះគឺជាចេតនាល្អរបស់ច្បាប់។ តែសម្រាប់ករណីរូបទណ្ឌិត សម រង្ស៊ី គឺតម្រូវឱ្យដកចេញភ្លាមៗតាមអនុភាពនៃច្បាប់ដែលប្រកាសជាការប្រញាប់នេះ។ ដូច្នេះ គឺមិនពាក់ព័ន្ធទៅនឹងការប្រើ Logo របស់គណបក្សសង្គ្រោះជាតិទេ ហើយក៏មិនពាក់ព័ន្ធការប្រើរូបលោក កឹម សុខា ដែរ តែពាក់ព័ន្ធនឹងការប្រើរូបភាពទណ្ឌិត សម រង្ស៊ី។ ត្រង់គណបក្សសង្គ្រោះជាតិ យកទាំងរូបលោក កឹម សុខា ចេញ គឺជាសិទ្ធិស័្វយសម្រេចរបស់គណបក្ស។
ក្រោយការពន្យល់យ៉ាងក្បោះក្បាយរបស់ ចៅ ចាក់ស្មុក ហើយត្រូវបានចុះផ្សាយតាមបណ្តាញសារព័ត៌មាននានា បានធ្វើឲ្យគណបក្សសង្គ្រោះជាតិ ជាពិសេសលោក កឹម សុខា ចលាចល និងបញ្ជារឲ្យគណបក្សនៅមូលដ្ឋានទូទាំងប្រទេសត្រូវបករូបទណ្ឌិត សម រង្ស៊ី ចេញភ្លាមៗ បើទោះបីជានិមិត្តសញ្ញាគណបក្សថ្មី (Logo) មិនទាន់ធ្វើហើយក៏ដោយ។
ដូចគ្នានេះដែរ កាលពីសមាជបក្សរបស់គណបក្សសង្គ្រោះជាតិកាលពីដើមឆ្នាំ២០១៧នេះ អ្នកច្បាប់គណបក្សសង្គ្រោះជាតិ មើលមិនយល់ពីលក្ខន្តិកៈបក្សខ្លួនឯង រហូតលុតជង្គង់អង្វរក្រសួងមហាផ្ទៃជួយប្រាប់ថា តើខុសអ្វីខ្លះ? ហើយម៉េចៗ ឥឡូវនេះ កុំឱ្យគេប្តឹងទាន់រឿងបន្តកេងចំណេញនយោបាយពីការប្រើប្រាស់រូបទណ្ឌិត សម រង្ស៊ី បើពុំនោះទេ បក្សសង្គ្រោះជាតិនេះអាចនឹងត្រូវរំលាយចោលទទេៗបាន ស្របតាមច្បាប់ស្តីពីគណបក្សនយោបាយថ្មី។
អ្នកច្បាប់ អ្នកវិភាគ និងអ្នកតាមដានស្ថានការណ៍នយោបាយបានលើកឡើងថា គណបក្សសង្គ្រោះជាតិគួរតែអរគុណដល់អ្នកវិភាគ ចៅ ចាក់ស្មុក ដែលបានក្រើនរំលឹក និងជួយសង្គ្រោះដល់បក្សសាងគ្រោះជាតិ ពីរដងរួចមកហើយ ដើម្បីគេចចេញពីការរំលាយបក្សចោល។ ការណ៍នេះ បានធ្វើឲ្យគេមើលឃើញពីអសមត្ថភាពរបស់គណបក្សសង្គ្រោះជាតិ ការគ្មានធនធានមនុស្សធ្វើការ កុំថាឡើយចង់ដឹកនាំប្រទេស សូម្បីតែដឹកនាំបក្សខ្លួនឯងក៏គណបក្សនេះមិនអាចធ្វើបានផង៕
ដោយ សុខ សុវណ្ណ
No comments:
Post a Comment