កូរ៉េខាងជើងបាននិយាយកាលពីថ្ងៃពុធថា ខ្លួនកំពុងត្រួតពិនិត្យផែនការយ៉ាងយកចិត្តទុកដាក់សម្រាប់ការវាយប្រហារមីស៊ីលលើកោះ Guam នៃទឹកដីអាមេរិក គ្រាន់តែប៉ុន្មានម៉ោងបន្ទាប់ពីប្រធានាធិបតីអាមេរិកលោក Donald Trump បានប្រាប់ទៅកូរ៉េខាងជើងថា ការគំរាមកំហែងណាមួយចំពោះអាមេរិក នឹងទទួលរងផលវិបាកនូវការបាញ់ប្រហារមកវិញដោយគ្មានត្រាប្រណី។
ប្រទេសកូរ៉េខាងជើងមិនបានលាក់បាំងពីផែនការអភិវឌ្ឍមីស៊ីល ដែលមានសមត្ថភាពនុយក្លេអ៊ែរអាចវាយប្រហារអាមេរិក និងមិនអើពើចំពោះការអំពាវនាវជាអន្តរជាតិឱ្យបញ្ឈប់កម្មវិធីនុយក្លេអ៊ែរ និងមីស៊ីលរបស់ខ្លួន។
អ្នកនាំពាក្យរបស់កងទ័ពប្រជាជនកូរ៉េ Korean People’s Army (KPA) បាននិយាយនៅក្នុងសេចក្តីថ្លែងការណ៍មួយដែលផ្សាយដោយទីភ្នាក់ងារព័ត៌មាន KCNA របស់កូរ៉េខាងជើងថា ផែនការវាយប្រហារនេះនឹងត្រូវអនុវត្តន៍នៅពេលណាមួយដែលមេដឹកនាំ Kim Jong Un ធ្វើការសម្រេចចិត្ត។
កងកម្លាំងយុទ្ធសាស្រ្តរបស់ KPA ឥឡូវនេះកំពុងពិនិត្យមើលផែនការប្រតិបត្ដិការយ៉ាងយកចិត្តទុកដាក់ចំពោះការបាញ់គ្របដណ្តប់លើតំបន់ជុំវិញកោះ Guam ដោយគ្រាប់មីស៊ីលយុទ្ធសាស្រ្ត Hwasong-12 ដែលអាចបាញ់ពីរយៈចម្ងាយមធ្យមទៅរយៈចម្ងាយឆ្ងាយដើម្បីការពារមូលដ្ឋានយោធាសំខាន់ៗរបស់អាមេរិកនៅលើកោះ Guam រួមទាំងមូលដ្ឋានកងទ័ពអាកាស Anderson ផងដែរ»។
អ្នកនាំពាក្យរូបនោះបាននិយាយថា ផែនការនេះនឹងត្រូវបានរាយការណ៍ទៅមេបញ្ជា ការជាន់ខ្ពស់របស់កូរ៉េខាងជើងក្នុងពេលឆាប់ៗនេះ។
មន្ត្រីអាមេរិកម្នាក់បាននិយាយថា កាលពីថ្ងៃចន្ទយន្តហោះទម្លាក់គ្រាប់បែក B-1 របស់អាមេរិកចំនួនពីរគ្រឿងបានហោះពីកោះ Guam ទៅឧបទ្វីបកូរ៉េ ជាផ្នែកមួយនៃវត្តមានរបស់យន្តហោះទម្លាក់គ្រាប់បែកជាបន្តបន្ទាប់របស់ខ្លួន ដែលជាសញ្ញាបង្ហាញពីសារៈសំខាន់ជាយុទ្ធសាស្ត្រដែលកោះ Guam មាន។
នៅក្នុងសេចក្តីថ្លែងការណ៍មួយ ដោយលើកឡើងពីអ្នកនាំពាក្យយោធាម្នាក់ផ្សេងទៀតបានឱ្យដឹងថា កូរ៉េខាងជើងក៏បានចោទប្រកាន់អាមេរិកថា បានគាស់កកាយ «សង្គ្រាមទប់ស្កាត់ជាមុន» ហើយបាននិយាយថា ផែនការណាមួយដើម្បីធ្វើសង្រ្គាមនេះនឹងជួបជាមួយ «សង្គ្រាមពេញទំហឹងនៃការបោសសំអាតមូលដ្ឋានដ៏រឹងមាំងទាំងអស់របស់សត្រូវរួមទាំងអាមេរិកដែនគោក»។
អ្នកនាំពាក្យកងទ័ពរូបនេះបាននិយាយថា អាមេរិកគួរតែបញ្ឈប់ «ការញុះញង់ផ្នែកយោធាដ៏ធ្វេសប្រហែសរបស់ខ្លួន» របស់ខ្លួនប្រឆាំងនឹងកូរ៉េខាងជើង ដើម្បីចៀសវាងសកម្មភាពយោធា។
ក្រុមប្រឹក្សាសន្តិសុខអង្គការសហប្រជាជាតិ បានធ្វើការដាក់ទណ្ឌកម្មថ្មីទៅលើកូរ៉េខាងជើងកាលពីថ្ងៃសៅរ៍ជុំវិញការសាកល្បងមីស៊ីលរបស់ខ្លួន។
លោក Trump បានលើកឡើងពីវោហាសាស្ត្រប្រឆាំងនឹងកូរ៉េខាងជើងកាលពីថ្ងៃអង្គារដោយនិយាយថា ទីក្រុងព្យុងយ៉ាងមិនគួរធ្វើការគំរាមកំហែងណាមួយប្រឆាំងនឹងអាមេរិកនៅក្នុងកិច្ចប្រជុំជាមួយអ្នកយកព័ត៌មាននៅ Trump National Golf Club នៅ Bedminster ក្នុងរដ្ឋ New Jersey នោះទេ៕
ប្រភព៖ Reuters ចុះថ្ងៃទី០៩ ខែសីហា ឆ្នាំ២០១៧
No comments:
Post a Comment