ឆ្នាំ ២០១៧ មិនមែនជាឆ្នាំប្រសើរខាងនយោបាយសម្រាប់នាយករដ្ឋមន្ត្រីម៉ាឡេស៊ី Najib Razak ទេ។ នៅផ្ទៃក្រៅ Najib ហាក់ដូចជាមានបញ្ហានយោបាយជាមួយរឿងអាស្រូវ 1MBD នៅតាមលងគាត់ និងជាមួយអតីតនាយករដ្ឋមន្ត្រីនិងជាគូប្រជែងស្លាប់រស់របស់គាត់គឺ Mahathir Mohammad ដែលកំពុងដឹកនាំសម្ព័ន្ធបក្សប្រឆាំងថ្មី Pakatan Harapan ។ ប៉ុន្តែ តាមធាតុជាក់ស្តែង Najib មិនអាចមានសុវត្ថិភាពខាងនយោបាយទេ។ ដោយការបោះឆ្នោតជាតិគ្រោងធ្វើនៅដើមឆ្នាំក្រោយ គាត់កំពុងស្ថិតក្នុងការស្ថានភាពរឹងមាំដែលនឹងត្រូវជាប់ឆ្នោតឡើងវិញទៀត។
Najib នឹងពិតជាសប្បាយចិត្តជាមួយនឹងកិច្ចព្រមព្រៀងជាលក្ខណៈបុគ្គលដែលគាត់បានធ្វើជាមួយ Abdul Hadi Awang ជាមេដឹកនាំរបស់បក្ស Parti Islam Malaysia (PAS)។ ស្ថិតក្រោម Hadi បក្ស PAS បានបដិសេធចូលរួមជាមួយបក្ស Pakatan Harapan ដោយលើកឡើងពីការមានឥទ្ធិពលពីបក្ស Democratic Action Party (DAP) ដែលមានមូលដ្ឋាននៅចិន។ លោក Hadi បានអះអាងថា ផែនកការសម្ងាត់របស់ DAP គឺបញ្ឈប់ការបង្កើតរដ្ឋអ៊ីស្លាមមួយ និងដើម្បីលើកកម្ពស់សាសនាគ្រឹស្ត។ ក្នុងខណៈនេះអាចជាការព្រួយបារម្ភពិតប្រាកដនៅក្នុងសហគមន៍ម៉ាឡេនោះ មូលហេតុកាន់តែជាក់ស្តែងទៀតនោះគឺការស្អប់របស់លោក Hadi លើលោក Mahathir ចំពោះការបង្គ្រាបផែនការនយោបាយរបស់បក្ស PAS យ៉ាងជោគជ័យនៅពេលគាត់កាន់អំណាច។
ប៉ុន្តែ Najib កំពុងចុះសម្រុងគ្នាល្អជាមួយលោក HAdi។ លោក Najib បានសន្យាដល់លោក Hadi ថា បក្សចម្រុះ UMNO នឹងគាំទ្រការធ្វើវិសោធន៍កម្មមាត្រា RUU 355 ដើម្បីបង្កើនការដាក់ទណ្ឌកម្មតាមផ្លូវតុលាការស្ថិតក្រោមច្បាប់សារីយ៉ា (Sharia Law)។ អ្នកជំនាញច្បាប់ភាគច្រើនជឿថា នៅពេលមាត្រា RUU 355 អនុម័តដោយសភា វានឹងជាជំហានដំបូងក្នុងការផ្លាស់ប្តូររដ្ឋធម្មនុញ្ញសហព័ន្ធរបស់ម៉ាឡេស៊ី។ កិច្ចព្រមព្រៀងមិនលាយលក្ខអក្សររវាង Hadi និង Najib គឺថា នៅពេល Najib ឈ្នះឆ្នោត បក្ស UMNO នឹងទទួលយច្បាប់ RUU 355 មកធ្វើជាច្បាប់រដ្ឋាភិបាល។
ប្រសិនបើកិច្ចព្រមព្រៀងនោះអនុវត្តមែន បក្ស PAS នឹងដាក់បេក្ខជនជាច្រើនដើម្បីប្រជែងនៅក្នុង ១១០ ដែលមានភាគច្រើនជាជនម៉ាឡេ។ ក្នុងខណៈដែលរឿងនេះមើលទៅអាក្រក់សម្រាប់ Najib នោះ គេត្រូវតែយល់នៅក្នុងបរិបទនៃបក្ស Patatan Harapan ដែលក៏កំពុងដណ្តើមយកអាសនៈរបស់ពួកម៉ាឡេទាំងនេះដែរ។ វាមិនអាចទៅរួចដើម្បីឈ្នះការបោះឆ្នោតជាតិនៅម៉ាឡេស៊ីដោយគ្មានការឈ្នះអាសនៈភាគច្រើនពីពួកម៉ាឡេនោះទេ។
ម៉ាឡេស៊ីបានស្ថិតក្នុងប្រព័ន្ធបោះឆ្នោតតាមសម្លេងភាគច្រើន ដូច្នេះ ដោយមានការបែកសម្លេងប្រឆាំងរវាង PAS និង Pakatan Harapan បក្ស UMNO នឹងឈ្នះអាសនៈពីពួកម៉ាឡេភាគច្រើន ហើយនាំឲ្យឈ្នះការបោះឆ្នោតជាតិ។ Najib ក៏មានទំនុកចិត្តក្នុងយុទ្ធសាស្ត្រនេះដែរដែលថា គាត់បានប្រាប់ក្រុមគាត់ថា បក្ស UMNO គឺមានគោលដៅឈ្នះអាសនៈចន្លោះ ១៤០ និង ១៦០ នៅក្នុងសភាដែលមានអាសនៈ ២២២។
ផ្ទុយទៅវិញ ដោយគ្មានអំណាចនៃបរិបាលកិច្ច និងក្បាលម៉ាស៊ីនរដ្ឋាភិបាលនោះទេ មេដឹកនាំបក្សប្រឆាំង Mahathir កាន់តែលំបាកក្នុងការមានឥទ្ធិពលលើម្ចាស់ឆ្នោត។ បញ្ហារបស់ Mahathir នោះគឺកេរ្តិ៍តំណែលបុរសខ្លាំងរបស់គាត់។ មនុស្សជាច្រើននៅក្នុងវណ្ណៈកណ្តាលនិងបក្សប្រឆាំងចង់ឲ្យគាត់សុំទោសដល់ការរំលោភបំពានសិទ្ធិមនុស្សក្នុងពេលកាន់អំណាច ២២ ឆ្នាំរបស់គាត់ រាប់ទាំងការដាក់គុកមេបក្សប្រឆាំងស្ថិតក្រោមច្បាប់សន្តិសុខផ្ទៃក្នុងដ៏អាក្រក់នោះ។ លោក Mahathir បានបដិសេធខ្លាំងក្នុងការសុំទោស ហើយគ្រាន់តែនិយាយថា គាត់សោកស្តាយដល់សកម្មភាពខ្លះរបស់គាត់។
អ្នកបោះឆ្នោតតាមទីប្រជុំជនហាក់ដូចជាមិនអាចទុកចិត្តលោក Mahathir ដែលកំពុងប្រើប្រាស់បក្សប្រឆាំងដើម្បីចាប់យកអំណាចប៉ុណ្ណោះ។ អ្នកខ្លះព្រួយថា នៅពេលឡើងកាន់អំណាច គាត់នឹងងាកទៅរករបៀបដឹកនាំផ្តាច់ការទៀត។ ដូច្នេះ មានគ្រោះថ្នាក់ពិតប្រាកដដែលថា អ្នកបោះឆ្នោតនៅតាមទីក្រុងនិងមានការអប់រំខ្ពស់នឹងប្រឆាំងវត្តមានរបស់ Mahathir ដោយគ្រាន់តែស្នាក់នៅផ្ទះក្នុងពេលបោះឆ្នោត ជាជាងទៅបោះឆ្នោតឲ្យបក្សប្រឆាំង ដែលបានជួយ Najib ដោយប្រយោល។
រឿងអាស្រូវ 1MDB នោះក៏មិនហាក់ដូចជាទាញយកចំណេញនយោបាយទេ។ ទោះជាមានការខិតខំបំផុតរបស់បក្សប្រឆាំងក្នុងការលាបពណ៌ Najib ថា ជាអ្នកពុករលួយនិងជាជនផ្តាច់ការអន្តរជាតិក៏ដោយ ក៏ Najib លៃលកជួបប្រធានាធិបតីអាមេរិក ដូណាល់ ត្រាំ នៅសេតវិមានដែរ។ Najib ថែមទាំងបានប្រាប់ ត្រាំ ថា ម៉ាឡេស៊ីនឹង “ធ្វើឲ្យអាមេរិកអស្ចារ្យឡើងវិញ” ដោយការវិនិយោគជាង ២០ ពាន់លានដុល្លារនៅអាមេរិក។
ភ្លាមបន្ទាប់ពីវ៉ាស៊ីនតោន Najib បានទៅកាន់ក្រុងឡុងដ៍ដើម្បីជួបនាយករដ្ឋមន្ត្រីអង់គ្លេស។ រូបថតជាមួយ ត្រាំ និង May បានធ្វើឲ្យស្លាប់ដល់យុទ្ធនាការឃោសនារបស់បក្សប្រឆាំងនៅតំបន់ជនបទម៉ាឡេស៊ី។
Najib ក៏បានបង្អាក់ដល់ការអះអាងរបស់បក្សប្រឆាំងដែលថា Saudi Arabia មិនសប្បាយចិត្តជាមួយ Najib ចំពោះការភ្ជាប់ពួក Saudi នៅក្នុង 1MDB ដោយការទទួលស្តេច Salman នៅម៉ាឡេស៊ី។ Najib ថែមទាំងថតរូបស៊ែលហ្វីជាមួយស្តេច Salman ហើយពួក Saudi សន្យាវិនិយោគនៅម៉ាឡេស៊ីដែលមានតម្លៃ ៧ ពាន់លានដុល្លារ។
ចំណុចខ្សោយមួយរបស់ Najib គឺសេដ្ឋកិច្ច ពិសេសកម្លាំងនៃប្រាក់រីងហ្គីតម៉ាឡេស៊ី ដែលបានបាត់បង់ជាង ២០ ភាគរយនៃតម្លៃរបស់វាចាប់ពីគាត់ឡើងកាន់អំណាច។ ប៉ុន្តែសហគមន៍ធុរកិច្ចបានបន្សាំទៅនឹងប្រាក់ខ្សោយនោះគឺ អត្រាការប្រាក់មិនត្រូវគេរំពឹងថា នឹងវិលទៅកាន់ចំនួន ៣ រីងហ្គីតក្នុង ១ ដុល្លារអាមេរិកនៅពេលណាឆាប់វិញ ដែលតម្លៃបច្ចុប្បន្នមានចំនួន ៤ រីងហ្គីតក្នុង ១ ដុល្លារអាមេរិក។
Najib បានប្រើប្រាស់យ៉ាងឈ្លាសវៃនូវថវិកាឆ្នាំ ២០១៨ ដើម្បីលំហូជំនួយទៅកាន់ប្រជាជនម៉ាឡេស៊ីជាង ៧ លាននាក់នៅក្នុងចំណោមប្រជាជនក្រីក្រ ៤០ ភាគរយ ដោយប្រើប្រាស់ការផ្ទេប្រាក់និងការកាត់បន្ថយពន្ធលើបុគ្គល។ សេវាស៊ីវិលចំនួន ១,៥ លាននាក់នឹងទទួលបានការឈប់សម្រាកបន្ថែម រាប់បញ្ចូលទាំងការសុំច្បាប់សម្រាប់ក្បួនព្យុះហយាត្រា umrah និងការតម្លើងតំណែងងាយស្រួលជាងមុន។
នៅត្រឹមចុងឆ្នាំ Najib នឹងមានកម្លាំងនយោបាយកាន់តែខ្លាំង។ កិច្ចព្រមព្រៀងរបស់គាត់ជាមួយ PAS បានធ្វើឲ្យភ្ញាក់ផ្អើលដល់ Mahathir និងបក្ស Pakatan Harapan ហើយការចោទប្រកាន់អំពើពុករលួយ 1MDBនោះ ត្រូវគេចាត់ទុកថា ជា “ព័ត៌មានចាស់” ដោយអ្នកបោះឆ្នោតកំណើតម៉ាឡេនៅតាមតំបន់ជនបទ។
ដោយមានដំណើរឆ្ពោះទៅមុខ គ្រោះថ្នាក់តែមួយគត់ដែល Najib កំពុងប្រឈមមុខគឺសុខភាពរបស់ Hadi។ លោក Hadi បានរងគ្រោះពីការវាយប្រហារជម្ងឺបេះដូងជាច្រើនដង ហើយអាចមានការវាយប្រហារបេះដូងរហូតដល់ស្លាប់មួយអាចកើតឡើងនៅគ្រប់ពេល។ ប្រសិនបើគាត់ស្លាប់ បក្ស PAS នឹងបែកខ្ញែក ហើយ Najbi មិនអាចឲ្យមេដឹកនាំបក្ស PAS ថ្មីឲ្យគោរពតាមកិច្ចព្រមព្រៀងដែលធ្វើឡើងជាមួយ Hadi បានទេ។
ឲ្យតែ Hadi នៅរស់រហូតដល់ការបោះឆ្នោតជាតិ ឋានៈនិងមុខមាត់នយោបាយរបស់ Najib ក្នុងនាមជានាយករដ្ឋមន្ត្រីរបស់ម៉ាឡេស៊ីត្រូវបានធានា៕
ប្រភព៖ East Asia Forum ចុះថ្ងៃ១៧ ខែធ្នូ ឆ្នាំ២០១៧
No comments:
Post a Comment