លោក សុខ ឥសាន អ្នកនាំពាក្យគណបក្សប្រជាជនកម្ពុជាបានឡើងថាព្រះរាជាណាចក្រកម្ពុជា បានអនុវត្តរបបប្រជាធិបតេយ្យសេរីពហុបក្សតាំងពីឆ្នាំ១៩៩៣មក យោងតាមស្មារតីនៃកិច្ចព្រមព្រៀងទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ ដែលត្រូវបានបញ្ចូលទៅក្នុងខ្លឹមសាររដ្ឋធម្មនុញ្ញ ។ លោកបានបន្តថា អស់រយៈពេលជាង២០ឆ្នាំហើយ ការអនុវត្តតាមរបបប្រជាធិបតេយ្យសេរីពហុបក្សបានដំណើរដោយរលូន ដែលការបោះឆ្នោតនៅគ្រប់កម្រិត បានប្រព្រឹត្តទៅដោយសេរី ត្រឹមត្រូវ និងយុត្តិធម៌ ហើយត្រូវបានអ្នកសង្កេតការណ៍ជាតិ និង អន្តរជាតិបានវាយតម្លៃស្របគ្នាថាមានលក្ខណៈល្អ គ្មានអំពើហឹង្សា និងអាចទទួលយកបាន តាមការប្រកួតប្រជែងរវាងគណបក្សនយោបាយច្រើន ក្នុងការដណ្តើមយកអំណាចដឹកនាំប្រទេស។ នេះហើយហៅថារបបប្រជាធិបតេយ្យសេរីពហុបក្សបើកមុខ មានតម្លាភាព មានយុត្តិធម៌ និងមានការគាំទ្រពីប្រជាជនទូទៅ ។
លោក សុខ ឥសាន បានលើកឡើងបន្តទៀតថា ប៉ុន្តែដោយសារមិនអាចដណ្តើមយកជ័យជំនះបាន ទើបគណបក្សមួយដែលតាំងខ្លួនជាគណបក្សប្រឆាំងដ៏ធំជាងគេ បានប្រើឧបាយកលទុច្ចរិត ឃុបឃិតជាមួយបរទេស អនុវត្តផែនការផ្តួលរំលំរាជរដ្ឋាភិបាលស្របច្បាប់ ដោយរំលងការអនុវត្តលទ្ធិប្រជាធិបតេយ្យក្នុងការប្រកួតប្រជែង។ លោកបន្តថា ពួកគេបានអនុវត្តរបបប្រជាធិបតេយ្យដែលអាចហៅថាជារបបប្រជាធិបតេយ្យសេរីពហុបក្សបិទមុខ ដោយយកពាក្យប្រជាធិបតេយ្យមកបិទបាំងពីមុខជាការបន្លំភ្នែកមហាជន ប្រជាជនតែប៉ុណ្ណោះ ឲ្យយល់ច្រឡំ ។
ដូច្នេះ ការអនុវត្តរបបប្រជាធិបតេយ្យសេរីពហុបក្ស បិទមុខដោយឆ្លងកាត់តាមឧបាយកលផ្តួលរំលំរាជរដ្ឋាភិបាលស្របច្បាប់ ដោយយកលទ្ធិប្រជាធិបតេយ្យគ្រានតែបន្លំភ្នែកមហាជន ប្រជាជន នោះមិនអាចទទួលយកបានជាដាច់ខាត ពីព្រោះនេះហើយជារូបភាពនៃបដិវត្តន៍ពណ៌ ដូចដែលពួកប្រកិរិយាអន្តរជាតិបានយកមកប្រើនៅតាមបណ្តាប្រទេសនានាមួយចំនួននៅលើពិភពលោក ដែលបានបន្សល់ទុកនូវសោកនាដកម្ម វិនាសអន្តរាយ ទុក្ខសោកខ្លោចផ្សារដល់ប្រជាជនរកទីបំផុតគ្មាន ។
លោក សុខ ឥសាន បញ្ជាក់ថា គណបក្សប្រជាជនកម្ពុជា និងប្រជាជនកម្ពុជាចង់បានការអនុវត្តមួយឲ្យបានត្រឹមត្រូវតាមគោលការណ៍ប្រជាធិបតេយ្យសេរីពហុបក្សពិតប្រាកដ លាតត្រដាងនៅទីភ្លឺទាំងអស់គ្នា តែមិនអាចទទួលយកបានជាដាច់ខាតទេចំពោះប្រជាធិបតេយ្យក្លែងក្លាយស្ថិតនៅក្នុងទីងងឹត ដែលចង់យកគ្រោះមហន្តរាយពីអតីតៈកាល មកដាក់ឲ្យកម្ពុជាទទួលជាថ្មីម្តងទៀតជាដាច់ខាត៕
No comments:
Post a Comment