ស្ថាប័នផ្តល់យោបល់បាននិយាយកាលពីថ្ងៃព្រហស្បតិ៍ថា ខណៈដែលការយកចិត្តទុកដាក់នៅតំបន់អាស៊ីត្រូវបានរំខានដោយវិបត្តិនុយក្លេអ៊ែររបស់កូរ៉េខាងជើងកាលពីឆ្នាំកន្លងទៅនេះ ចិនបានបន្តតម្លើងរ៉ាដាដែលមានហ្រ្វេកង់ខ្ពស់ និងទីតាំងដទៃទៀតដែលអាចត្រូវបានប្រើប្រាស់សម្រាប់ទិសដៅយោធានៅលើកោះសិប្បនិម្មិតរបស់ខ្លួននៅសមុទ្រចិនខាងត្បូង។
បើយោងតាមស្ថាប័នគំនិតផ្តួចផ្តើមតម្លាភាពដែនសមុទ្រអាស៊ីនៃមជ្ឈមណ្ឌលសម្រាប់ការសិក្សាយុទ្ធសាស្រ្តអន្តរជាតិរបស់ទីក្រុងវ៉ាស៊ីនតោន (Asia Maritime Transparency Initiative of Washington’s Center for Strategic and International Studies) បានឱ្យដឹងថា សកម្មភាពរបស់ចិនមានការងារជាប់ពាក់ព័ន្ធគ្នាលើទីតាំងមួយចំនួនដែលគ្របដណ្តប់លើផ្ទៃទំហំចំនួន២៩ ហិកតានៃកោះ Spratly និងកោះ Paracel ដែលជាដែនដីជម្លោះជាមួយនឹងប្រទេសដទៃទៀតនៅតំបន់អាស៊ី។ របាយការណ៍នេះក៏បានបង្ហាញពីរូបភាពតាមផ្កាយរណបផងដែរ។
សហរដ្ឋអាមេរិក និងសម្ព័ន្ធមិត្តបានជំទាស់នឹងការសាងសង់កោះសិប្បនិម្មិត្តរបស់ចិននៅសមុទ្រចិនខាងត្បូង ហើយនិងការប្រែក្លាយទៅជាបែបយោធារបស់ពួកគេ ដោយមានក្តីកង្វល់ថា ទីក្រុងប៉េកាំងមានផែនការប្រើប្រាស់វាដើម្បីរាំងខ្ទប់ការចូលទៅដល់ផ្លូវយុទ្ធសាស្រ្តនេះ។
របាយការណ៍បាននិយាយថា ក្នុងរយៈពេលប៉ុន្មានខែចុងក្រោយនេះ ចិនបានសាងសង់នូវអ្វីដែលហាក់ដូចជារ៉ាដាថ្មីដែលមានហ្រ្វេកង់ខ្ពស់នៅប៉ែកខាងជើងបំផុតនៃតំបន់ថ្មប៉ប្រះទឹក Fiery Cross Reef លើកោះ Spratly។
របាយការណ៍ដដែលបានឱ្យដឹងថា តំបន់ថ្មប៉ប្រះទឹក Subi Reef ត្រូវបានគេមើលឃើញថា បានកសាងរួចហើយ គឺទំនងជាសម្រាប់រក្សាទុកសព្វាវុធ និងអង់តែនផ្កាយរណបមួយផ្សេងទៀត និងប្រព័ន្ធរ៉ាដា។
ការសាងសង់នៅតំបន់ថ្មប៉ប្រះទឹក Mischief Reef រាប់បញ្ចូលទាំងការរក្សាទុកសព្វាវុធ និងកន្លែងសំចតយន្តហោះលាក់លួច របាំងការពារមីស៊ីល និងប្រព័ន្ធរ៉ាដា។
ការងារខ្នាតតូចបានបន្តនៅលើកោះ Paracel ដែលរាប់បញ្ចូលទាំងកន្លែងចុះចតឧទ្ធម្ភាគចក្រថ្មី និងទូរប៊ីនខ្យល់នៅលើកោះ Tree និងអាគារដាក់រ៉ាដាធំៗចំនួនពីរនៅលើកោះ Triton។
របាយការណ៍បាននិយាយថា រចនាសម្ព័ន្ធខាងលើនេះ គឺមានលក្ខណៈសំខាន់ណាស់ គឺជាដែនទឹកនៅជុំវិញកោះ Triton ជាកន្លែងដែលមានឧបទ្ទវហេតុកើតឡើងនាពេលថ្មីៗនេះរវាងវៀតណាម និងចិន និងជាការធ្វើប្រតិបត្តិការនាវាចរណ៍ដោយសេរីរបស់អាមេរិក។
របាយការណ៍បានឱ្យដឹងថា កោះ Woody គឺជាទីបញ្ជាការយោធា និងរដ្ឋបាលរបស់ចិននៅសមុទ្រចិនខាងត្បូង ដែលត្រូវបានគេមើលឃើញថា មានការដាក់ពង្រាយជាលើកដំបូងនូវយន្តហោះចំនួនពីរគ្រឿង៕
ប្រភព: Reuters ចុះថ្ងៃទី១៧ ខែធ្នូ ឆ្នាំ២០១៧
No comments:
Post a Comment