លោកឧបនាយករដ្ឋមន្រ្តីប្រចាំការ ប៊ិន ឈិន ថ្វាយសារលិខិតថ្វាយព្រះពរព្រះមហាក្សត្រក្នុងឱកាសព្រះរាជពិធីខួបលើកទី១៣នៃការយាងគ្រងរាជសម្បត្តិ

ក្នុងព្រះរាជពិធីបុណ្យខួបលើកទី១៣នៃការយាងគ្រងព្រះបរមសិរីរាជសម្បត្តិរបស់ព្រះករុណាជាអម្ចាស់ជីវិតលើត្បូងព្រះមហាក្សត្រនៃព្រះរាជាណាចក្រកម្ពុជាដែលនឹងប្រព្រឹត្តទៅនៅថ្ងៃទី២៩ ខែតុលា ឆ្នាំ២០១៧ខាងមុខនេះ លោកឧបនាយករដ្ឋមន្រ្តីប្រចាំការ ប៊ិន ឈិន និងភរិយាតាងនាមថ្នាក់ដឹកនាំ និងមន្រ្តីរាជការគ្រប់ជាន់ថ្នាក់នៃទីស្តីការគណៈរដ្ឋមន្រ្តី សូមព្រះបរមរាជានុញ្ញាតសម្តែងនូវសេចក្តីអំណរសាទរឥតឧបមាចូលរួមថ្វាយនូវសព្ទសាធុការពរជ័យ បវរសួស្តី សិរីវឌ្ឍនា វិបុលសុខ មហាប្រសើរគ្រប់ប្រការប្រកបដោយព្រះកតញ្ញូតកវេទិតាធម៌ដ៏ជ្រាលជ្រៅបំផុតចំពោះព្រះបញ្ញាញាណ និងព្រះរាជសកម្មភាពដ៏ឧត្តុង្គឧត្តមថ្លៃថ្លាជាប្រវត្តិសាស្រ្តរបស់ព្រះករុណាជាអម្ចាស់ ក្នុងវិស័យព្រះពុទ្ធសាសនា អប់រំសិក្សាធិការ សង្គមកិច្ច សុខុមាលភាពជីវភាពរស់នៅរបស់ប្រជានុរាស្រ្ត និងការងារកិច្ចការបរទេសនាពេលកន្លងមកដែលបានរួមចំណែកយ៉ាងថ្លៃថ្លាក្នុងការលើកកម្ពស់កិត្យានុភាពរបស់ព្រះរាជាណាចក្រកម្ពុជា ការស្តារ ការអភិវឌ្ឍ និងការកែទម្រង់រដ្ឋស៊ីជម្រៅលើគ្រប់វិស័យដើម្បីកំណើនការងារ សមធម៌ និងប្រសិទ្ធភាព ការកាត់បន្ថយភាពក្រីក្ររបស់ប្រជានុរាស្រ្តដែលបានធ្វើឱ្យមាតុភូមិអង្គរជាទីស្នេហាមានការរីកចម្រើនថ្កុំថ្កើងជឿនលឿនយ៉ាងឆាប់រហ័ស។