រដ្ឋបាលរាជធានីភ្នំពេញ កំពុងដោះស្រាយគ្រប់មធ្យោបាយ ដើម្បីជួយសម្រួលបញ្ហា កកស្ទះចរាចរណ៍ក្នុងរាជធានីភ្នំពេញ

នៅថ្ងៃទី២៥ ខែតុលា ឆ្នាំ២០១៧ លោកអភិបាលរាជធានីភ្នំពេញ បានជួបប្រជុំជាមួយគណៈកម្មការបច្ចេកទេសក្រសួងសាធារណការ និងដឹកជញ្ជូន ដើម្បីពិភាក្សាដាក់ផ្លូវមួយចំនួនក្នុងរាជធានីភ្នំពេញ ឱ្យចរាចរដោយឯកទិស ព្រោះផ្លូវឯកទិសនឹងអាចកាត់បន្ថយការកកស្ទះចរាចរណ៍ បានមួយផ្នែកធំសម្រាប់អ្នកធ្វើដំណើរ។

លោកអភិបាលបានណែនាំដល់ក្រុមការងារធ្វើការសិក្សាឱ្យអស់ពីលទ្ធភាព ដើម្បីរៀបចំដាក់ឱ្យចរាចរឯកទិស នៅលើផ្លូវលេខ១៩ និងតិរវិថីព្រះស៊ីសុវត្ថិ ក្នុងភូមិសាស្ត្រខណ្ឌដូនពេញ។ ទន្ទឹមនឹងការបង្កើតផ្លូវឯកទិសថ្មីនេះ កម្លាំងនគរបាលចរាចរណ៍ត្រូវយកចិត្តទុកដាក់ពង្រឹងការអនុវត្ដរបស់បងប្អូនប្រជាពលរដ្ឋនៅតាមផ្លូវឯកទិសទាំង១៣ខ្សែ ដែលមានស្រាប់ឱ្យបានខ្ជាប់ខ្ជួនផងដែរ៕