នៅពេលដែលប្រធានាធិបតីចិន Xi Jinping បានដើរចូលទៅក្នុងវិមានរដ្ឋាភិបាលនៅសប្តាហ៍នេះ ដើម្បីបង្ហាញក្រុមមេដឹកនាំដែលនឹងជួយគាត់ក្នុងការគ្រប់គ្រងប្រទេសចិនរយៈពេលពាក់កណ្តាលទសវត្សរ៍ខាងមុខទៀត អ្នករាល់គ្នានឹងសម្លឹងមើលថាតើបញ្ជីឈ្មោះ រាប់បញ្ចូលមានមនុស្សវ័យក្មេងម្នាក់ ឬពីរនាក់ដែលកំពុងតែប្រកួតប្រជែង ដើម្បីក្លាយជាអ្នកស្នងតំណែងជំនួសគាត់ដែរឬទេ។
ទោះបីជាយ៉ាងណាក៏ដោយ វាបង្ហាញឱ្យឃើញយ៉ាងច្បាស់ថា រឿងនោះប្រហែលជាមិនកើតឡើងទេ។
លោក Xi ដែលមានវ័យ ៦៤ ឆ្នាំ កាលពីថ្ងៃពុធទំនងជាប្រកាសបញ្ជីឈ្មោះថ្មីនៃគណៈកម្មាធិការអចិន្រ្តៃយ៍ទទួលបន្ទុកកិច្ចការនយោបាយ ដែលជាតំណែងកំពូលរបស់បក្សកុម្មុយនីស្ត ទោះបីជាកាលបរិច្ឆេទផ្លូវការមិនទាន់ត្រូវបានគេកំណត់ក៏ដោយ។ នៅពេលដែលគាត់រៀបចំឡើង អ្នកនយោបាយនៅខាងក្នុងមួយចំនួនបានព្យាករណ៍ថា នឹងមិនមានសមាជិកវ័យក្មេង ឬប្រវត្តិរូបដើម្បីសម្គាល់ពួកគេថាជាអ្នកស្នងតំណែងឡើយ។
ការរាយបញ្ជីឈ្មោះសមាជិកគណៈកម្មាធិការអចិន្រ្តៃយ៍នឹងផ្តល់សញ្ញាយ៉ាងច្បាស់លាស់បំផុត ប៉ុន្តែមិនទាន់មានសំណួរដែលគ្របដណ្តប់លើសមាជបក្សកុម្មុយនីស្តដែលរៀបចំឡើងក្នុងរយៈពេល ៥ ឆ្នាំម្តងនៅឡើយទេ ដែលឥឡូវនេះកំពុងតែដំណើរការនៅក្នុងទីក្រុងប៉េកាំង៖ ថាតើលោក Xi អាចព្យាយាមបន្តគ្រប់គ្រងប្រទេសមហាអំណាចថ្មីបំផុតនៅលើពិភពលោកបានយូរប៉ុនណា ក្នុងនាមជាមេដឹកនាំផ្លូវការ និងអំណាចនៅពីក្រោយការគ្រងរាជ្យនោះ។
ប្រសិនបើពុំមានអ្នកស្នងតំណែងលេចមុខឡើងទេ នោះនឹងធ្វើឱ្យមានការសង្ស័យថា លោក Xi អាចព្យាយាមរក្សាអំណាចតាមរបៀបមួយចំនួនទៀត បន្ទាប់ពីអាណត្តិទី ២ របស់គាត់ ក្នុងនាមជាប្រធានាធិបតីដែលនឹងត្រូវបញ្ចប់នៅឆ្នាំ២០២៣។ យ៉ាងហោចណាស់ វានឹងបន្ថែមនូវកិច្ចព្រមព្រៀងដ៏អស្ចារ្យដែលគ្មានភាពច្បាស់លាស់ ចំពោះដំណើរការនៃការស្នងតំណែង ដែលបណ្តាមេដឹកនាំចិនបច្ចុប្បន្នបានព្យាយាមធ្វើឱ្យស្ថានភាពនេះកាន់តែមានស្ថិរភាព និងអាចព្យាករណ៍បាន។
លោក Minxin Pei ដែលជាសាស្រ្តាចារ្យនៅឯមហាវិទ្យាល័យ Claremont McKenna ក្នុងរដ្ឋ California ដែលសិក្សាពីនយោបាយចិនបាននិយាយថា «លទ្ធផលសំខាន់បំផុតនៃសមាជពាក់កណ្តាលអាណត្តិបែបនេះ គឺជាការរៀបចំអ្នកស្នងអំណាច។ ប្រសិនបើច្បាប់ចាស់ត្រូវបានគេយកមកអនុវត្តន៍នោះ យើងគួរតែរំពឹងថានឹងឃើញនូវលទ្ធផលស្រដៀងគ្នា»។
លោក Wu Qiang ជាអ្នកវិភាគកិច្ចការចិននាពេលបច្ចុប្បន្ន ដែលធ្លាប់បង្រៀនវិទ្យាសាស្រ្តនយោបាយនៅឯសាកលវិទ្យាល័យ Tsinghua ក្នុងទីក្រុងប៉េកាំង បាននិយាយថា «ការដាក់ឱ្យមានអ្នកស្នងតំណែងប្រញាប់ពេក នឹងបង្កើតនូវភាពមិនច្បាស់លាស់សម្រាប់លោក Xi ថាតើគាត់អាចរក្សាអំណាចកំពូលរបស់គាត់បានយូរប៉ុនណា។ ការពន្យារពេលក្នុងការសម្រេចចិត្ត ស្តីអំពីអ្នកស្នងតំណែងនឹងបង្កើតនូវភាពមិនច្បាស់លាស់មួយប្រភេទទៀតអំពីអ្វីដែលលោក Xi នឹងធ្វើនៅពេលអនាគត។ ខ្ញុំគិតថា គាត់មិនទាន់ធ្វើសេចក្តីសម្រេចចិត្តនៅឡើយទេ»។
អ្នកវិភាគមួយចំនួន ដូចជាលោក Wu ជឿថា លោក Xi ប្រហែលជាចង់បន្តអំណាចលើសពីអាណត្តិទី២ របស់គាត់ទៀត។ ស្ថិតក្រោមការអនុវត្តនូវការបន្តវេននាពេលបច្ចុប្បន្ននេះ គាត់ត្រូវតែចុះចេញពីតំណែងប្រធានាធិបតី និងប្រមុខរដ្ឋរបស់ចិន បន្ទាប់ពីកាន់តំណែងអស់រយៈពេល ២ អាណត្តិ ប៉ុន្តែពុំមានការកំណត់ជាផ្លូវការលើតំណែងជាមេដឹកនាំសំខាន់របស់គាត់ ដូចជាប្រធានបក្សកុម្មុយនីស្តនៅឡើយទេ។ លោក Xi អាចព្យាយាមបន្តធ្វើជាប្រធានគណៈកម្មការយោធាមជ្ឈឹមផងដែរ ដែលជាតំណែងកំពូលដ៏មានឥទ្ធិពលលើកងកម្លាំងប្រដាប់អាវុធរបស់ជាតិ ឬស្ថិតនៅក្នុងតួនាទីថ្មីមួយទៀតដែលគេបានបង្កើតឡើង៕
ប្រភព: The New York Times ចុះថ្ងៃទី២៤ ខែតុលា ឆ្នាំ២០១៧
No comments:
Post a Comment