ពិធីបើកវគ្គផ្សព្វផ្សាយការអប់រំពីគ្រោះថ្នាក់នៃការប្រើប្រាស់គ្រឿងញៀនខុសច្បាប់

នៅរសៀលថ្ងៃទី២០ ខែមេសា ឆ្នាំ២០១៧ នៅមជ្ឈមណ្ឌលគរុកោសល្យភូមិភាគរាជធានីភ្នំពេញ បានប្រារព្ធពិធីបើកវគ្គផ្សព្វផ្សាយការអប់រំពីគ្រោះថ្នាក់នៃការប្រើប្រាស់គ្រឿងញៀនខុសច្បាប់ក្រោមអធិបតីភាពលោក ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ព្រមទាំងមានការអញ្ជើញចូលរួមពីសំណាក់ លោក លោកស្រីតំណាងអង្គភាពពាក់ព័ន្ធ អាជ្ញាធរជាតិប្រយុទ្ធប្រឆាំងគ្រឿងញៀន នឹងលោកគ្រូ អ្នកគ្រូ សិស្សានុសិស្សសរុបជាង៣០០នាក់ ។

ក្រសួងអប់រំ យុវជន និងកីឡា ជាសមាជិកនៃអាជ្ញាធរជាតិប្រយុទ្ធប្រឆាំងគ្រឿងញៀន និងជាស្ថាប័នស៊ីវិលមួយដែលមានវិសាលភាព និងសក្ដានុពលយ៉ាងធំធេង បានខិតខំរួមចំណែកអនុវត្ត យុទ្ធសាស្ត្រជាតិប្រយុទ្ធប្រឆាំងគ្រឿងញៀន សំដៅធ្វើយ៉ាងណាឱ្យសាលារៀនជាប្រភេទសាលាពណ៌បៃតង ពោលគឺសាលារៀនមិនមានការជួញដូរ ការផលិត និងការប្រើប្រាស់គ្រឿងញៀនខុសច្បាប់៕