អតីតសមាជិកក្រុមប្រឹក្សាក្រុង ឃុំ សង្កាត់ បក្សសង្គ្រោះជាតិ ក្នុងខេត្តតាកែវចំនួន២៣នាក់ សុំចូលរួមជាមួយគណបក្សប្រជាជន

គិតមកដល់ពេលនេះ អតីតសមាជិកក្រុមប្រឹក្សាក្រុង ឃុំ សង្កាត់ របស់គណបក្សសង្គ្រោះជាតិ២៣នាក់ហើយ ដែលបានសម្រេចចិត្តដើរចេញពីគណបក្សសង្គ្រោះជាតិ ដែលទើបរលាយ ហើយសុំចូលរួមរស់ជាមួយ គណបក្សប្រជាជនកម្ពុជា។

សមាជិកទាំងអស់ដែលបានមកចូលរួមជាមួយគណបក្សប្រជាជនកម្ពុជាក្នុងខេត្តតាកែវ សុទ្ធតែបានអះអាងថា ដោយសារការភ័ន្តច្រឡំ អំពីគោលនយោបាយ និងសកម្មភាពគណបក្សសង្គ្រោះជាតិ ដែលតាមពិត សកម្មភាពទាំងនោះគឹជាការធ្វើបដិវត្តន៍ពណ៌ដើម្បីផ្តួលរំលំរាជរដ្ឋាភិបាលស្របច្បាប់ ហើយថ្មីៗនេះតាមរយៈ វីដេអូឃ្លឹប របស់លោក កឹម សុខា និងថ្នាក់ដឹកនាំគណបក្សសង្គ្រោះជាតិ បានបង្ហាញយ៉ាងច្បាស់លាស់ ពីអ្វីៗដែលជាការឃុបឃិត និងធ្វើតាមការរៀបចំរបស់បរទេស ដោយមិនគិតពីមហន្ដរាយដល់ប្រទេសជាតិ និងភាពសុខសាន្ដ របស់ប្រជាជនឡើយ ដូច្នេះទើបពួកគាត់សម្រេចចិត្តមករួម រស់ជាមួយគណបក្ស ប្រជាជនកម្ពុជា ដើម្បីបានចូលរួមបម្រើប្រជាពលរដ្ឋ ការពារសន្តិភាព និងអភិវឌ្ឍប្រទេសជាតិជាមួយ គណបក្សប្រជាជនកម្ពុជា។

អតីតសមាជិកក្រុមប្រឹក្សាគណបក្សសង្គ្រោះជាតិ បានចុះចូលរួមជីវភាពនយោបាយជាមួយគណបក្ស ប្រជាជនកម្ពុជា រួមមានសមាជិកក្រុមប្រឹក្សាក្រុងដូនកែវ ០១នាក់ និងសមាជិក្រុមប្រឹក្សាឃុំ សង្កាត់ចំនួន ២២នាក់ ក្នុងនោះមាន៖
១.ស្រុកត្រាំកក់ : សរុប ០៣នាក់ ក្នុងនោះសមាជិកក្រុមប្រឹក្សាឃុំអង្គតាសោម ២នាក់ និងឃុំតាភេម ០១នាក់, ២ស្រុកបាទី : សរុប ០៣នាក់ ក្នុងនោះសមាជិកក្រុមប្រឹក្សាឃុំចំប៉ី ០១នាក់ និងឃុំកណ្តឹង ០២នាក់, ៣ស្រុកសំរោង : សរុប០១នាក់ សមាជិកក្រុមប្រឹក្សាឃុំសំរោង ០១នាក់, ៤.ស្រុកគិរីវង់ : ០៣នាក់ ក្នុងនោះសមាជិកក្រុប្រឹក្សាឃុំព្រះបាទជាន់ជុំ ០១នាក់ ឃុំតាអូ ០១នាក់ និងឃុំសោម ០១នាក់, ៥.ក្រុងដូនកែវ : សរុប ០៣នាក់ ក្នុងនោះសមាជិកក្រុមប្រឹក្សាសង្កាត់រកាក្រៅ ០២នាក់ និងសង្កាត់រកាក្នុង ០១នាក់, ៦.ស្រុកកោះអណ្តែត : សរុប ០១នាក់ សមាជិកក្រុមប្រឹក្សាឃុំរមេញ ០១នាក់, ៧.ស្រុកបូរីជលសារ : សរុប ០១នាក់ សមាជិកក្រុមប្រឹក្សាឃុំគោកពោធិ៍ ០១នាក់, ៨.ស្រុកទ្រាំង : ០៣នាក់ ក្នុងនោះ សមាជិកក្រុមប្រឹក្សាឃុំព្រៃស្លឹក ០១នាក់ ឃុំសំបួរ ០១នាក់ និងឃុំរនាម ០១នាក់, ៩.ស្រុកព្រៃកប្បាស : សរុប ០២នាក់ ក្នុងនោះសមាជិកក្រុមប្រឹក្សាឃុំតាំងយ៉ាប ០១នាក់ និងឃុំពោធិ៍រំចាក ០១នាក់, ១០.ស្រុកអង្គរបូរី : សរុប ០២នាក់ សមាជិកក្រុមប្រឹក្សាឃុំគោកធ្លក ០២នាក់ ៕