ខេត្តកំពង់ឆ្នាំង រៀបចំវគ្គបណ្ដុះបណ្ដាលស្ដីពី វេទិកាព័ត៌មានទាន់ហេតុការណ៍ និងការប្រើទូរស័ព្ទប្រមូលទិន្នន័យពីគ្រោះមហន្តរាយ

កំពង់ឆ្នាំង៖ នៅថ្ងៃទី២១ ខែវិច្ឆិកា ឆ្នាំ២០១៧ នៅសាលប្រជុំសាលាខេត្តកំពង់ឆ្នាំង បានបើកវគ្គបណ្ដុះបណ្ដាលស្ដីពី វេទិកាព័ត៌មានទាន់ហេតុការណ៍ និងការប្រើប្រាស់ទូរស័ព្ទប្រមូលទិន្នន័យពីគ្រោះមហន្តរាយ ក្រោមអធិបតីភាពលោក សៀត គឹមលៀង អភិបាលរងខេត្ត និងមានការចូលរួមពីកងកម្លាំងប្រដាប់អាវុធទាំងបីប្រភេទ អភិបាលរងក្រុង ស្រុក នាយករងរដ្ឋបាលក្រុង ស្រុក មន្ត្រីមន្ទីរជំនាញជុំវិញខេត្ត និងមន្ត្រីលេខាធិការរដ្ឋានគណៈកម្មាធិការគ្រប់គ្រងគ្រោះមហន្តរាយខេត្ត (PCDM) សុប៤៥នាក់។

ថ្លែងក្នុងឱកាសនោះ លោក សៀត គឹមលៀង បានមានប្រសាសន៍ថា វគ្គបណ្ដុះបណ្ដាលនេះ មានសារៈសំខាន់ណាស់ ដែលទាមទារការផ្ដល់ព័ត៌មានតាមរយៈបណ្ដាញសង្គម និងបណ្ដាញផ្សេងៗទៀត ដើម្បីត្រៀមបង្ការ និងឆ្លើយតបមុនពេល ក្នុងពេល និងក្រោយពេលគ្រោះមហន្តរាយ។
ជាងនេះទៅទៀត លោកបានសំណូមពរឱ្យសិក្ខាកាមដែលបានចូលរួមវគ្គបណ្ដាលនេះ ត្រូវតាមដានឱ្យជាប់គ្រប់មេរៀន ព្រោះវគ្គនេះបាននឹងកំពុងដំណើរការរយៈពេលថ្ងៃដោយចាប់ពីថ្ងៃទី២១ រហូតដល់ថ្ងៃទី២៣ ខែវិច្ឆិកា ឆ្នាំ២០១៧។ ម្យ៉ាងទៀតនោះ សូមកុំមានការផ្លាស់ប្ដូរគ្នាឱ្យសោះ។ ថ្ងៃនេះអ្នកនេះចូលរួម ស្រាប់តែថ្ងៃស្អែកប្ដូរអ្នកផ្សេងទៀតចូលរួមវិញម្ដង។ ការផ្លាស់ប្ដូរគ្នាបែបនេះ គឺយើងមិនអាចក្ដាប់បានព័ត៌មានឱ្យបានគ្រប់ជ្រុងជ្រោយនោះទេ។
ជាចុងក្រោយ លោកក៏បានសំដែងនូវការរំពឹងទុក និងសង្ឃឹមថាគ្រប់សិក្ខាកាមទាំងអស់នឹងទទួលបានចំណេះដឹងថ្មីៗ និងសិក្សាបទពិសោធន៍ពីគ្នាទៅវិញ ទៅមកសំដៅរួមគ្នាទប់ស្កាត់ ការពារ និងកាត់បន្ថយគ្រោះមហន្តរាយនៅសហគមន៍ និងមូលដ្ឋានរបស់ខ្លួន៕