ពាក់ព័ន្ធការអំពាវនាវស្វែងរកថវិការបស់គណបក្សប្រឆាំងនេះ បានធ្វើឲ្យមានចម្ងល់ និងការចោទសួរជាច្រើនពីមហាជន ជាពិសេសសកម្មជនតូចតាចក្នុងបក្សសង្គ្រោះជាតិ រឿងមូលនិធិដែលគណបក្សធ្លាប់បានបង្កើតឡើងនាពេលកន្លងមក មានដូចជា មូលនិធិសង្គ្រោះជាតិ ដែលគណបក្សសង្គ្រោះជាតិបង្កើតឡើងក្នុងពេលធ្វើបាតុកម្មតវ៉ាប្រឆាំងនឹងលទ្ធផលនៃការបោះឆ្នោតកាលពីឆ្នាំ២០១៣ កន្លងទៅ។ កាលណោះថវិកាជាច្រើនលានដុល្លារ ត្រូវបានគណបក្សប្រឆាំងប្រមូលបានពីសកម្មជន និងអ្នកគាំទ្ររបស់ខ្លួនទាំងនៅក្នុង និងក្រៅប្រទេស។ ទីបំផុតថវិកាទាំងអស់នោះ គេមិនបានដឹងថា តើថ្នាក់ដឹកនាំបក្សយកទៅចំណាយលើអ្វីខ្លះទេ? ប៉ុន្តែក្រោយការធ្វើបាតុកម្មប្រមូលថវិកា គេឃើញមេដឹកនាំគណបក្សសង្គ្រោះជាតិ ពិសេសលោក កឹម សុខា មានផ្ទះវីឡាថ្មី មានដីចំការម្រេចរាប់សិបហិកតានៅខេត្តកំពង់ចាម និងមានឡានទំនើបៗតម្លៃរាប់សិបម៉ឺនដុល្លារជាច្រើនគ្រឿងទៀត។ ដូចគ្នានេះដែរ មូលនិធិទូរទស្សន៍ព្រះអាទិត្យ ដែលគណបក្សប្រឆាំងបានបង្កើតកន្លែងប្រមូលថវិកាពីប្រជាពលរដ្ឋក្រីក្រនៅក្នុងប្រទេស និងជាពិសេសពីប្រជាពលរដ្ឋខ្មែររស់នៅក្រៅប្រទេសដែលខិតខំធ្វើការងាររកប្រាក់យ៉ាងលំបាក ហើយទទួលបានថវិកាចំនួនជិត ១លានដុល្លារ ក៏មិនដឹងថា បក្សយកទៅណាអស់ដែរ?
តាមរយៈឧទាហរណ៍ជាក់ស្តែងដូចខាងលើនេះ មហាជនចង់ឲ្យគណបក្សសង្គ្រោះជាតិបង្ហាញពីតម្លាភាព គណនេយ្យភាព ដែលគណបក្សមួយនេះ គួរតែបង្ហាញពីរបាយការណ៍មូលនិធិ ដែលខ្លួនធ្លាប់បានធ្វើនាពេលកន្លងមក។
ជុំវិញករណីនេះ អ្នកវិភាគលើកឡើងថា គណបក្សសង្គ្រោះជាតិ មិនត្រឹមតែមិនអាចអនុវត្តគោលនយោបាយរបស់ខ្លួនដែលដាក់ចេញនាពេលកន្លងមកបានទេ តែថែមទាំងបង្កើតកម្មវិធីមូលនិធិជាច្រើនទៀត ដូចជា មូលនិធិទ្រទ្រង់បក្ស (ប្រមូលលុយពីពលករនៅកូរ៉េ អាមេរិក បារាំង អូស្រ្តាលី។ល។) មូលនិធិទូរទស្សន៍ព្រះអាទិត្យ និងចុងក្រោយនេះ បង្កើតមូលនិធិដើម្បីដោះដូរស្លាកសញ្ញារបស់គណបក្សថែមទៀតផង។
អ្នកវិភាគមើលឃើញថា ការបង្កើតមូលនិធិដើម្បីប្រមូលថវិកានេះ តាមពិតទៅគណបក្សសង្រ្គោះជាតិមិនបានយកប្រាក់ដែលប្រមូលបានទាំងអស់នោះ ទៅធ្វើអ្វីតាមការឃោសនា ក៏ដូចជាការសន្យារបស់ពួកគេទេ គឺយកទៅចែកគ្នាតាមតួនាទី តំណែង ខ្សែ បក្ខពួក គ្រួសារ រហូតដល់មានការបែងចែកមិនត្រូវគ្នា បណ្តាលឲ្យបែកបាក់ផ្ទៃក្នុងថែមទៀតផង ដូចឃើញកន្លងមកហើយ គឺមានការចាក់ចេញជាបន្តបន្ទាប់ពីសំណាក់មន្ត្រីសំខាន់ៗក្នុងបក្ស។ ឧទាហរណ៍ ករណីលោកស្រី ឡាក់ សុភាព សមាជិកគណៈកម្មាធិការនាយក ត្រូវបានគណបក្សសង្គ្រោះជាតិបណ្តេញចេញ ក្រោយពីលោកស្រីបានទម្លាយអាថ៌កំបំាងលោក សម រង្ស៊ី និង លោក កឹម សុខា ប្រព្រឹត្តអំពើពុករលួយមានទឹកបា្រក់រហូតដល់ ៤០លានដុល្លារ។ អ្វីដែលសកម្មជនបក្ស និងអ្នកគាំទ្រគណបក្សសង្គ្រោះជាតិ ត្រូវតែពិចារណា ថាតើមូលនិធិដែលប្រមូលបានកន្លងមកថ្នាក់ដឹកនាំបក្សយកទៅណា? ព្រោះតាំងពីគណបក្សនេះ ទទួលបានអាសនៈក្នុងរដ្ឋសភាមក មិនដែលបានធ្វើអំណោយមនុស្សធម៌អ្វីទាល់តែសោះ។
សម្រាប់អ្នកតាមដានស្ថានការណ៍នយោបាយនៅកម្ពុជាមើលឃើញថា នេះគឺជាឱកាសមាសឱកាសប្រាក់របស់ថ្នាក់ដឹកនាំគណបក្សប្រឆាំងធ្វើមានបានពីការរៃអង្គាសថវិកា ក្រោមលេសដោះដូរស្លាកសញ្ញាគណបក្ស ព្រោះការបង្កើតមូលនិធិ នាពេលកន្លងមកគណបក្សសង្គ្រោះជាតិ មិនដែលបង្ហាញពីគម្រោងថវិកាចំណូល-ចំណាយ ឲ្យបានច្បាស់លាស់ដល់ម្ចាស់ថវិកានោះទេ។
ខាងលើនេះ គ្រាន់តែជាចំណុចតូចមួយនៃអំពើបោកប្រាស់របស់គណបក្សសង្រ្គោះជាតិប៉ុណ្ណោះ ហើយនៅមានចំណុចផ្សេងៗជាច្រើនទៀត ដែលប្រជាពលរដ្ឋស្លូតត្រង់ ក៏ដូចជាសកម្មជនអ្នកចាញ់បោកបក្សនេះ ត្រូវភ្ញាក់ខ្លួន និងដឹងពីអំពើពុតត្បុតរបស់ពួកគេ៕
ដោយ៖ សុខ សុវណ្ណ
No comments:
Post a Comment