ជនពិការ​ត្រូវបាន​លើកទឹកចិត្ត ​និងតែងតាំង​ជាប្រធាន​មន្ទីរមុខងារ​សាធារណៈ​ខេត្តតាកែវ​

លោក ទេព វណ្ណហេង អនុប្រធានមន្ទីរមុខងារសាធារណៈខេត្តតាកែវ ដែលជាជនពិការ ត្រូវបាន ប្រកាសចូលកាន់តំណែងជាប្រធានមន្ទីរមុខងារសាធារណៈខេត្តតាកែវ នៅថ្ងៃទី១២ ខែកក្កដា ឆ្នាំ២០១៧នេះ ក្រោមអធិបតីភាពលោក រស់ សូផាន់ រដ្ឋលេខាធិការក្រសួងមុខងារសាធារណៈ និងលោក យស ណាស៊ី អភិបាលរងខេត្តតាកែវ។

លោក រស់ សូផាន់ បានថ្លែងថា ការតែងតាំងនេះបានបង្ហាញឲ្យឃើញថា រាជរដ្ឋាភិបាល តាមរយៈក្រសួងមុខងារសាធារណៈ និងរដ្ឋបាលខេត្តតាកែវ បានផ្តល់ការយកចិត្តទុកដាក់ និងទទួលស្គាល់នូវតម្លៃមន្រ្តីរាជការជាជនពិការ ដែលមានលក្ខណសម្បត្តិគ្រប់គ្រាន់ក្នុងការតែងតាំងឲ្យកាន់មុខតំណែងដឹកនាំ នៅរដ្ឋបាលថ្នាក់ក្រោមជាតិ ស្របតាមផែនការយុទ្ធសាស្រ្តជាតិ ស្តីពីពិការភាព ២០១៤-២០១៨ និងច្បាប់ ស្តីពីកិច្ចការពារ និងលើកកម្ពស់សិទ្ធិជនពិការ៕