អភិបាលស្រុកស្វាយជ្រំ រំលឹកទៅ​មេឃុំ​ទាំងអស់​ ពិសេស​មេឃុំថ្មី​ទាំង១០​របស់ស្រុក​ ត្រូវអនុវត្ត​ឲ្យបានត្រឹម​ត្រូវតាម​ច្បាប់​

នៅថ្ងៃទី១២ ខែកក្កដា ឆ្នាំ២០១៧នេះ លោក សុទ្ធ គឹមច័ន្ទ អភិបាលស្រុកស្វាយជ្រំ បានដឹកនាំកិច្ចប្រជុំបូកសរុបការងារប្រចាំខែ និងលើកទិសដៅបន្ត ដោយមានការិយាល័យអង្គភាពជំនាញស្រុក មេឃុំ និងស្មៀនឃុំ ចូលរួមផងដែរ។

អភិបាលស្រុកស្វាយជ្រំ បានឲ្យដឹងថា នេះជាកិច្ចប្រជុំដំបូងសម្រាប់មេឃុំអាណត្តិទី៤ បន្ទាប់ពីប្រកាសសុពលភាពរួច។

ក្នុងកិច្ចប្រជុំនេះ លោកអភិបាលស្រុក ក៏បានរំលឹកទៅមេឃុំទាំងអស់ ពិសេសមេឃុំថ្មីទាំង១០របស់ស្រុក ត្រូវអនុវត្តអោយបានត្រឹមត្រូវតាមច្បាប់ លិខិតបទដ្ឋាននានាដែលនៅជាធរមាន។ ជាមួយគ្នានេះ ត្រូវប្រជុំក្រុមប្រឹក្សាដើម្បីពិភាក្សា និងអនុម័តបទបញ្ជាផ្ទៃក្នុង កែសម្រួលសមាសភាពគណ:កម្មាធិការ ដែលជាកាតព្វកិច្ចតាមការចាំបាច់ ការកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិល និងត្រូវយកចិត្តទុកដាក់ពិនិត្យអោយបានហ្មត់ចត់មុននឹងចុះហត្ថលេខាលើឯកសារអត្រានុកូលដ្ឋាននានា។

លើសពីនោះ លោកអភិបាលស្រុក ក៏បានរំលឹកទៅមេឃុំថ្មីទាំង១០រូបថា បើមិនចេះ ឆ្ងល់ មិនយល់កន្លែងណាមួយ ត្រូវសួរគ្នា ពិសេសសួរមេឃុំចាស់ កុំខ្លាចខ្មាស់សំខាន់យើងធ្វើទៅមិនខុសច្បាប់ និងលិខិតបទដ្ឋាន ឬការណែនាំផ្សេងៗ៕