នៅថ្ងៃទី១១ ខែកក្កដា ឆ្នាំ២០១៧នេះ ប្រធានរដ្ឋសភា លោក ហេង សំរិន តាងនាមថ្នាក់ដឹកនាំ សមាជិក សមាជិការដ្ឋសភាទាំងអស់ បានគោរពជូនពរ និងអបអរសាទរយ៉ាងក្លៀវក្លាបំផុតចំពោះ លោកនាយករដ្ឋមន្រ្តី ហ៊ុន សែន ក្នុងការបំពេញបេសកកម្មជាប្រវត្តិសាស្រ្តដ៏ឧត្តុង្គឧត្តមដែលតំបន់ប្រាសាទសំបូរព្រៃគុក ត្រូវបានគណៈកម្មការបេតិកភណ្ឌពិភពលោកនៃអង្គការយូណេស្កូ សម្រេចដាក់បញ្ចូលទៅក្នុងបញ្ជីបេតិកភណ្ឌពិភពលោក ក្នុងកិច្ចប្រជុំលើកទី៤១ នៅទីក្រុង Krakow ប្រទេសប៉ូឡូញ កាលពីថ្ងៃទី០៨ ខែកក្កដា ឆ្នាំ២០១៧កន្លងទៅនេះ។
ការសម្រេចរបស់គណៈកម្មការបេតិកភណ្ឌពិភពលោកនៃអង្គការយូណេស្កូនេះ គឺជាមោទនភាព និងជាស្នាដៃដ៏ធំធេងថ្មីមួយទៀត ដែលកើតចេញពីការខិតខំប្រឹងប្រែងឥតរាថយរបស់រាជរដ្ឋាភិបាលកម្ពុជាដែលមានលោកនាយករដ្ឋមន្រ្តី ហ៊ុន សែន ជាប្រមុខដឹកនាំដោយភាពប៉ិនប្រសប់ និងឈ្លាសវៃជានិច្ចកាលតែងយកចិត្តទុកដាក់ខ្ពស់បំផុតចំពោះកិច្ចការការពារបូរណភាពទឹកដី និងការលើកតម្កើងកិត្តិយសជាតិ លើឆាកអន្តរជាតិ ក៏ដូចជាការឆ្លុះបញ្ចាំងពីការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការគ្រប់គ្រងការងារអភិរក្ស និងអភិវឌ្ឍបេតិកភណ្ឌប្រកបដោយចីរភាព៕
No comments:
Post a Comment