កំពង់ចាម៖ បើទោះបីជាលទ្ធផលសម្រេចកន្លងទៅបានល្អហើយក្ដី លោក សោ សាវឿន មេបញ្ជាការកងរាជអាវុធហត្ថខេត្តកំពង់ចាម បញ្ជាឱ្យមន្ដ្រីក្រោមឱវាទត្រូវខិតខំ បង្ការ ទប់ស្កាត់ និងបង្ក្រាបបទល្មើសក្នុងភូមិសាស្ដ្ររបស់ខ្លួនឲ្យល្អថែមទៀត។
ការថ្លែងបញ្ជាបែបនេះ របស់លោក មេបញ្ជាការត្រូវបានធ្វើឡើងក្នុងកិច្ចប្រជុំបូកសរុបលទ្ធផងការងារឆមាសទី១ និងលើកទិសដៅបន្ដ ព្រមទាំងផ្សព្វផ្សាយបទបញ្ជារបស់ថ្នាក់នាំ នៅព្រឹកថ្ងៃទី២៤ ខែឧសភា ឆ្នាំ២០១៧នេះ។
ក្នុងនោះក៏មានការចូលរួមពី លោកមេបញ្ជាការរង ប្រធាន-អនុប្រធានមន្ទីរ នាយរងសេនាធិការដ្ឋាន នាយការិយាល័យ មេបញ្ជាការក្រុង ស្រុក ស្នាក់ការ នាយនាយរង ចំណុះបញ្ជាការដ្ឋានអាវុធហត្ថខេត្តជាច្រើននាក់ផងដែរ ។
យ៉ាងណាមិញ លោក ក៏បាននាំនូវការសាកសួរសុខទុក្ខពីសំណាក់ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជា មេបញ្ជាការកងរាជអាវុធហត្ថលើផ្ទៃប្រទេស ជូនមន្ដ្រីអាវុធទាំងអស់ផងដែរ។
ជាមួយគ្នានោះ លោកមេបញ្ជាការ ក៏បានយកបទបញ្ជារបស់លោក គួច ចំរើន អភិបាលខេត្តកំពង់ចាម និងជាប្រធានគណៈបញ្ជាការឯកភាពខេត្ត ដែលកំណត់ឱ្យសមត្ថកិច្ចទាំងអស់ ត្រូវខិតខំបង្ក្រាបរាល់បទល្មើសល្បែងស៊ីសងគ្រប់ប្រភេទ ឱ្យខាងតែបាន នៅក្នុងដែនសមត្ថកិច្ចរបស់ខ្លួន ព្រោះថាល្បែងស៊ីសងទាំងនោះហើយ នាំឱ្យមានអំពើចោរកម្ម លួច ឆក់ ប្លន់ ។
ក្រៅពីការងារស្នូលទាំងនេះ លោកក៏បានឱ្យកម្លាំងសមត្ថកិច្ចត្រៀមគ្រប់លក្ខណៈជានិច្ច ក្នុងការចុះជួយប្រជាពលរដ្ឋ នៅពេលមានគ្រោះធម្មជាតិកើតឡើងជាយថាហេតុ ព្រោះថានេះជារដូវវស្សា ។
លោក បន្ថែមថា កម្លាំងទាំងអស់ត្រូវចូលរួមឱ្យសកម្មក្នុងការបង្ក្រាប និងផ្សព្វផ្សាយជូនដល់ប្រជាពលរដ្ឋ ក្នុងមូលដ្ឋានអំពីយុទ្ធនាការបង្ក្រាបគ្រឿងញៀន និងបទល្មើសផ្សេងៗទៀត។
លោកមេបញ្ជាការថា ទន្ទឹមនោះដែរត្រូវចូលរួមយ៉ាងសកម្ម ក្នុងការផ្សព្វផ្សាយគោលនយោបាយភូមិ-ឃុំ មានសុវត្ថិភាពទាំង៩ចំណុច និងការអនុវត្តច្បាប់ចរាចរណ៍ផ្លូវគោក ឱ្យបានម៉ឺងម៉ាត់ បង្កើនការផ្តល់សេវាសន្តិសុខជូនប្រជាពលរដ្ឋឱ្យបានប្រសើរថែមទៀត ៕
No comments:
Post a Comment