ដោយឃើញមានការអំពាវនាវ តាមបណ្តាញព័ត៌មានថានៅថ្ងៃទី១៨ ខែកុម្ភៈ ខាងមុខនេះ នឹងមានកម្មវិធីបុណ្យផ្កាសាមគ្គី នៅប្រទេសអូស្ត្រាលីនោះ អាត្មាភាព និងពុទ្ធបរិស័ទ្ធនៅកម្ពុជាក៏ចង់ចូលរួមចាប់មគ្គផលដែរ ប៉ុន្តែចម្លែកត្រង់ថាបច្ច័យដែលប្រមូលបានពីបុណ្យផ្កាសាមគ្គីនេះ មិនយកទៅកសាងក្នុងវិស័យព្រះពុទ្ធសាសនាទេ តែបែរជាយកទៅជួយចលនាសង្គ្រោះជាតិរបស់ញោម សម រង្ស៊ី ដើម្បីជួយប្រោសជីវិតនយោបាយរបស់គាត់ទៅវិញ។
បើតាមពុទ្ធប្បញ្ញត្តិ ពុទ្ធបរិស័ទ្ធទាំងឡាយណា ដែលយកសាសនាទៅប្រើប្រាស់ ដើម្បីបោកបញ្ឆោតញាត្តិញោម ក្នុងន័យកេងបន្លំបច្ច័យដែលប្រមូលបានមកធ្វើជាប្រយោជន៍បុគ្គលខ្លួននោះនឹងទទួលនូវបាបកម្មធ្ងន់ធ្ងរខ្លាំងណាស់ ដូចជាត្រូវទទួលទណ្ឌកម្មស្រុះក្នុងខ្ទះខ្លាញ់យ៉ាងវេទនានៅពេលស្លាប់ទៅ ដើម្បីជំរះនូវអំពើបាបដែលខ្លួនបានសាងកាលនៅរស់ជាដើម។ អាត្មាមិនទោមនស្ស និងការធ្វើបុណ្យសន្សំកុសលរបស់ញាតិញោមឡើយ ប៉ុន្តែអាត្មាក៏មិនគាំទ្រញាតិញោមដែលយកសាសនាមកលេងសើច ធ្វើជាមុខរបររៃអង្គាសបច្ច័យ ដើម្បីដោះស្រាយជីវភាព នយោបាយប្រចាំថ្ងៃរបស់អ្នកនយោបាយអនាថា គ្មានគោលដៅ តត្រុករំខានបរទេសឱ្យវាយបំបែកឆ្នាំងបាយប្រជាពលរដ្ឋខ្លួនឯងនោះដែរ។
កន្លងមកកាលញោម សម រង្ស៊ី ធ្វើប្រធានបក្ស អាត្មាបានឮ និងឃើញញាតិញោមច្រើនណាស់ចូលបច្ច័យជាមួយគាត់ដល់រាប់សែនដុល្លារឯណោះ ដើម្បីយកទៅកសាងស្ថានីយ៍ទូរទស្សន៍ ប៉ុន្តែមិនមែនដាក់ថាជាបុណ្យផ្កាសាមគ្គីនោះទេ តែជាការរៃអង្គាសជាមូលនិធិទូរទស្សន៍ព្រះអាទិត្យ ដូច្នេះគឺវាសមស្របហើយព្រោះមិនបានប្រឡូកប្រឡាក់នឹងសាសនានោះទេ ប៉ុន្តែចម្លែកត្រង់ថាបច្ច័យទាំងនោះត្រូវរលាយសូន្យទៅហើយ។ គួរឱ្យអនិច្ចា ពេលនេះបច្ច័យដែលញាតិញោមចូលរួមទាំងប៉ុន្មានត្រូវរលាយបាត់សូន្យឈឹងតែម្តង និងមួយចំនួនទៀតត្រូវបានថ្នាក់ដឹកនាំបក្សយកទៅទិញដីចំការ ផ្ទះ ឡាន និងវីឡាអស់ទៅហើយ។ ដូច្នេះ ការប្រកាសផ្តើមធ្វើបុណ្យផ្កាសាមគ្គី នៅលើកនេះទៀត អាត្មាអស់ជំនឿ និងសូមអំពាវនាវដល់ញាតិញោមកុំចំណាយពេល និងបច្ច័យរបស់ខ្លួនតទៅទៀតអី ព្រោះបច្ច័យរបស់ញាតិញោមមិនបានយកទៅប្រើប្រាស់សំរាប់កិច្ចការសង្គមនោះទេ ផ្ទុយទៅវិញគឺដើម្បីផ្គត់ផ្គង់ដំណើរទេសចរណ៍របស់ញោម រង្ស៊ី និងប្រពន្ធគាត់ទៅវិញទេ។ ម្យ៉ាងទៀត អាត្មាអាចវាយតំលៃបានថា ជីវិតនយោបាយរបស់ញោម រង្ស៊ី គឺត្រូវចប់ហើយ ។ ចប់ត្រង់ថា បរទេសដែលធ្លាប់ជួយបច្ច័យគាត់ក៏គេឈប់ជួយផ្គត់ផ្គង់ដែរ ទោះបីញោម សម រង្ស៊ី ត្រេចចរទៅសុំគេពីប្រទេសមួយទៅប្រទេសមួយយ៉ាងវេទនាក៏ដោយ ក៏គ្មានប្រទេសណាគេជួយឧបត្ថម្ភទៀតដែរ ដោយសារតែអំពើពុករលួយនៅផ្ទៃក្នុងអតីតគណបក្ស និងផលប្រយោជន៍បក្ខពួក ក្រុមគ្រួសារនិយមនេះឯង។ ទី២ ញោម រង្ស៊ី គ្មានតួនាទីអ្វីដើម្បីបញ្ជាថ្នាក់ដឹកនាំ និងសកម្មជនក្នុងបក្សគាត់តទៅទៀតទេ។ ទី៣ ញោម រង្ស៊ី មិនហ៊ានចូលស្រុកខ្មែរវិញទេ ដោយសារតែកំពុងមានទោសជាប់ខ្លួនជាច្រើនករណីបែបនេះ។ ទី៤ ញោម សម រង្ស៊ី អាយុកាន់តែច្រើនទៅហើយ ចាស់ក៏ចាស់ ប្រាជ្ញាស្មារតីក៏ខ្សោយទៅតាមនោះដែរ មិនអាចប្រកួតជាមួយញោម ហ៊ុន សែន បានទៀតទេ។
ជាចុងក្រោយ អាត្មាសូមបិណ្ឌបាត្រ ញោម រង្ស៊ី សូមបញ្ឈប់យកព្រះពុទ្ធសាសនា ទៅលេងសើច បោកប្រាស់ប្រជារាស្ត្រខ្មែរដើម្បីផលប្រយោជន៍នយោបាយរបស់ញោមតទៅទៀត។ ម្យ៉ាងទៀត បុណ្យនិងបាប គឺនៅទន្ទឹមគ្នា សាងឡើងដោយកិលេសរបស់ញោមនោះហើយ បើញោមប្រើឈ្មោះថាជាបុណ្យផ្កាសាមគ្គី លុះត្រាតែបច្ច័យដែលប្រមូលបានយកទៅកសាងវត្តអារាម ឬសេនាសនៈ មិនមែន យកទៅកសាងចលនានយោ បាយដែលជាចលនាឧទ្ទាមភេវរកម្មខុសច្បាប់ជាតិបែបនេះទេ វានឹងទទួលនូវបាបកម្មចុះនរកអវច្ចីខ្លាំងណាស់ ហើយពេលអស់សង្ខារ ព្រះពុទ្ធមិនអាចប្រោសឱ្យចាប់កំណើតជាថ្មីបានឡើយ៕
No comments:
Post a Comment