ប៉ៃលិន៖ ថ្លែងក្នុងឱកាសអញ្ជើញចូលរួមជាគណៈធិបតីក្នុងពិធីបើកមហោស្រពសិល្បៈល្ខោន និងរបាំសម្រាប់យុវជនថ្នាក់ខេត្តលើកទី៤ ក្រោមប្រធានបទ យុវជនដើម្បីវប្បធម៌ជាតិ ដែលរៀបចំឡើងដោយមន្ទីវប្បធម៌ និងវិចិត្រសិល្បៈខេត្តប៉ៃលិន នាព្រឹកថ្ងៃទី៧ ខែកុម្ភៈ ឆ្នាំ២០១៨ លោក កើត សុធា អភិបាលខេត្តប៉ៃលិន សំណូមពរដល់មន្ត្រីរាជការ និងអាជ្ញាធរគ្រប់លំដាប់ថ្នាក់ត្រូវយកចិត្តទុកដាក់ចូលរួមថែរក្សាការពារវប្បធម៌ប្រពៃណីអោយគង់វង្ស ដើម្បីអោយក្មេងៗជំនាន់ក្រោយបានស្គាស់ពីតម្លៃនៃវប្បធម៌ជាតិយើង ជាពិសេសត្រូវជំរុញដល់សិស្សានុសិស្សអោយបានយល់ដឹងពីសារៈសំខាន់ នៃល្ខោនខោល និង របាំរែងត្បូង ព្រមទាំងវប្បធម៌ផ្សេងៗទៀត ក្នុងន័យឆ្លើយតបទៅនឹងគោលនយោបាយរបស់រាជ រដ្ឋាភិបាលកម្ពុជាក៏ដូចក្រសួងវប្បធម៌និងវិចិត្រ សិល្បៈក្នុងការពង្រឹងធនធានវប្បធម៌ជាតិអោយមានការរីកចំរើនជាបន្តបន្ទាប់ និងថែរក្សាការពារកុំអោយបាត់បង់។
លោក កើត សុធា បានបន្តថា មហោស្រពថ្ងៃនេះពិតជាមានសារៈសំខាន់ណាស់សំរាប់ខេត្តប៉ៃលិនរបស់យើង ដែលផ្អែកទៅលើមូលដ្ឋានធនធានមនុស្សដែលមានស្រាប់នៅខេត្តតែម្តង ជាពិសេសដើម្បីរំលឹកដល់គុណនុបការៈ ដ៏សំបូរបែបរបស់បុព្វបុរសខ្មែរយើងគ្រប់ជំនាន់ ព្រមទាំងលើកកម្ពស់នៃការបណ្តុះស្មារតីអោយកូនខ្មែរគ្រប់រូបចូលរួមសកម្មភាពថែរក្សាការពារមរតកវប្បធម៌អរូបីអោយបានគង់ វង្ស រុងរឿង ថ្កើងថ្កានជាឧត្តមដើម្បីជាប្រយោជន៍ប្រទេសជាតិយើងជារៀងរហូត។ លោកក៏បានសំណូមដល់ក្រុមសីល្បៈសម្តែងទាំងអស់ត្រូវខិតខំបញ្ចេញអោយអស់ពីសមត្ថភាពដើម្បីទទួលបានលំដាប់ថ្នាក់ទៅធ្វើការប្រកួតប្រជែងនៅថ្នាក់ជាតិបន្តទៀត ។
នាឱកាសនោះដែរ លោក អ៊ី លីឈុន អនុប្រធានមន្ទីរវប្បធម៌និងវិចិត្រសិល្បៈខេត្តប៉ៃលិនបានឱ្យដឹងថាការរៀបចំមហាស្រពនៅពេលនេះដើម្បីជ្រើសរើសក្រុមដែលទទួលបានជំណាប់ថ្នាក់យកទៅប្រកួតថ្នាក់ជាតិក្នុងឆ្នាំ២០១៨ខាងមុខនេះ ក្នុងការបង្កើតព្រឹត្តិការណ៍អបអរសារទរទិវាវប្បធម៌ជាតិ ៣មិនា លើកទី២០ ឆ្នាំ២០១៨ និងបំផុសចលនាចូលរួមសកម្មភាពវប្បធម៌របស់យុវជនជំនាន់ថ្មី ជាពិសេសបន្តការបណ្តុះបណ្តាលអប់រំចំណេះដឹងអំពីសិល្បៈវប្បធម៌ដើម្បីអោយយុវជនយុវនារីខ្មែរបានយល់ដឹងពីសារៈប្រយោជន៍ និងតម្លៃនៃសិល្បៈវប្បធម៌របស់ដូនតាខ្មែរយើង ក្នុងការរួមចំណែកថែរក្សាការពារអោយបានគង់វង្ស និងអភិវឌ្ឍន៍អោយបានរុងរឿងនូវបេតិកភណ្ឌវប្បធម៌ទាំងនោះនៅក្នុងសកលភាវូបនីយកម្មទំនើបជឿនលឿន ព្រមទាំងធ្វើការបំផុសស្មារតីស្នេហាវប្បធម៌ជាតិ បន្តវេន និងជម្រុញការបង្កើតស្នាដៃថ្មីៗដើម្បីលើកស្ទួយអត្តសញ្ញាណវប្បធម៌ជាតិស្របតាមគោលនយោបាយយុទ្ធសាស្រ្តរបស់ក្រសួងវប្បធម៌និងវិចិត្រសិល្បៈសំដៅទប់ស្កាត់ការហូរចូលវប្បធម៌អវិជ្ជមានពីខាងក្រៅ។
សូមបញ្ជាក់ថា ការបើកមហោស្រពសិល្បៈយុវជនថ្ងៃនេះ គឺមានចំនួន២ក្រុម ដូចជា ក្រុមទី១-ក្រុមសិល្បៈសិស្សថ្នាក់មធ្យម មកពីវិទ្យាល័យ ហ៊ុន សែន សាលាក្រៅ សម្តែងល្ខោនខោលក្នុងឈុត (ចម្បាំងពេលយប់)។ ក្រុមទី២- ក្រុមសិល្បៈសិស្សថ្នាក់មធ្យម មកពីវិទ្យាល័យ ហ៊ុន សែន ក្រុងទេពនិម្មិតប៉ៃលិន សម្តែង(របាំរែងត្បូង) ហើយនៅក្នុងឱកាសនោះលោក កើត សុធា ក៏បានប្រគល់បាច់ផ្កា និងឧបត្ថម្ភថវិការចំនួន១លានរៀលដល់ក្រុមទាំង២ និងថវិកាចំនួន ៥០ម៉ឺនរៀល ដល់មន្ទីរវប្បធម៌និងវិចិត្រសិល្បៈផងដែរ៕
No comments:
Post a Comment