និស្សិតស្ម័គ្រចិត្តសាកលវិទ្យាល័យកសិកម្មចំការដូង ធ្វើទស្សនកិច្ចសិក្សាស្វែងយល់ពីសំណង់ស្ថាបត្យកម្មប្រាសាទនៅខេត្តកំពង់ឆ្នាំង

លោកស្រី ឈឹម ស្រីមុំ តំណាងលោក ឈួរ ចន្ទឌឿន អភិបាលខេត្តកំពង់ឆ្នាំង បានដឹកនាំយុវជននិស្សិតស្ម័គ្រចិត្តចំការដូងនៃសាកលវិទ្យាល័យកសិកម្មចំការដូង ចុះធ្វើទស្សនកិច្ចសិក្សា ដើម្បីស្វែងយល់ពីសំណង់ស្ថាបត្យកម្មប្រាសាទ និងព្រះវិហារវត្តទួលស្រីពិជ័យសូរ្យវង្ស ហៅវត្តកំពង់ព្រះដែលស្ថិតនៅភូមិកំពង់ព្រះ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង នៅថ្ងៃទី១៣ខែ សីហា ឆ្នាំ២០១៧ ។

នាឱកាសនោះដែរ លោកស្រី ឈឹម ស្រីមុំ ឈួរ ច័ន្ទឌឿន ក៏បានជូនថវិកាលោកយាយលោកតាចំនួន៧១នាក់ ក្នុងម្នាក់ៗទទួលបាន១០ ០០០រៀល សិស្សានុសិស្ស សាលាបឋមសិក្សាកំពង់ព្រះចំនួន៧០នាក់  ក្នុងម្នាក់ៗទទួលបាន១០០០រៀល និងចូលរួមចំណែកជាមួយមូលនិធិមនុស្សធម៌ចំនួន១០០ដុល្លាផងដែរ។ ដោយឡែកក្រុមយុវជននិស្សិតស្ម័គ្រចិត្តចំការដូងក៏បាននាំមកនូវមូលនិធិសប្បុរសធម៌និងសម្ភារៈសិក្សាមួយចំនួនផងដែរ និងបានប្រគេនព្រះសង្ឃ នូវសម្ភារៈបរិក្ខាមួយចំនួន និងបច្ច័យចំនួន១,១៥១,៥០០រៀល និងប្រាក់ដុល្លារចំនួន៥០០ដុល្លារ និងចែកជូនសិស្សានុសិស្ស ដោយម្នាក់ៗទទួលបានសៀវភៅ០១ក្បាល ខ្មៅដៃ០១ដើម ប៊ិច០១ដើម បន្ទាត់០១ដើម ទឹកក្រូច០១ដប នំ០១កញ្ចប់ និងវិកាចំនួន១០០០រៀល។

នៅក្នុងដំណើរទស្សនកិច្ចសិក្សា និងមូលនិធិមនុស្សធម៌នេះ លោកស្រី ឈឹម ស្រីមុំ ឈួរច័ន្ទឌឿន បានមានប្រសាសន៍ថា ដំណើរទស្សនកិច្ចសិក្សានេះ គឺជាការសិក្សាស្វែងយល់ឱ្យកាន់តែច្បាស់ពីស្ថាបត្យកម្មសំណង់ប្រាសាទបុរាណនិងទីអារាមនេះ។  លោកស្រីបានបញ្ជាក់ថា ដោយផ្អែកលើកត្តាប្រវត្តិសាស្ត្រ និងការស្រាវជ្រាវដោយបុរាណវិទូ គឺថាសំណង់ប្រាសាទបុរាណនេះ ត្រូវបានកសាងឡើងនៅសតវត្សទី២០ រចនាបថកំពង់ព្រះ ។ បើតាមការពិនិត្យ ទិដ្ឋភាពតួប្រាសាទទាំងមូល ឃើញថាប្រាសាទ មានសភាពចាស់ទ្រុឌទ្រោម ដែលតម្រូវឱ្យមានការរួបរួមគ្នាយកចិត្តទុកអភិរក្ស និងថែរក្សាឱ្យបានគង់វង្សសម្រាប់ក្មេងៗជំនាន់ក្រោយៗទៀតបានដឹង និងសិក្សាស្វែងយល់ជាបន្តបន្ទាប់ទៀត៕