ជប៉ុនសន្យាធ្វើកិច្ចការនានាដើម្បីជួយកម្ពុជាឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០

នៅថ្ងៃទី១៤ ខែសីហា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានថ្លែងថា ជប៉ុនសន្យាធ្វើកិច្ចការនានាដើម្បីជួយកម្ពុជាឱ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០។ លោក បានថ្លែងដូចនេះក្នុងឱកាសអញ្ជើញជាអធិបតីប្រគល់សញ្ញាបត្រដល់និស្សិត នៃសាកលវិទ្យាល័យភូមិន្ទភ្នំពេញ ៣,៣០២នាក់ នៅមជ្ឈមណ្ឌលពិព័រណ៍ និងសន្និបាតកោះពេជ្រ។

ប្រមុខរាជរដ្ឋាភិបាលកម្ពុជា បានបញ្ជក់ថា កម្ពុជាមានទំនាក់ទំនងល្អជាមួយនាយករដ្ឋមន្រ្តីជប៉ុនក្នុងពេលទស្សនកិច្ចផ្លូវការនៅប្រទេសជប៉ុនកាលពីពេលថ្មីៗកន្លងទៅនេះ។ ជប៉ុន ក៏បានសន្យាធ្វើការងារជាមួយកម្ពុជា ដើម្បីឱ្យកម្ពុជាក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។

លោកនាយករដ្ឋមន្រ្តី ហ៊ុន សែន ក៏បានបញ្ជាក់ថា នៅក្នុងឱកាសបំពេញទស្សនកិច្ចនៅជប៉ុន លោក ក៏បានលើកឡើងអំពីគម្រោងផ្លូវរថភ្លើងអាកាស (Sky Train) នៅរាជធានីភ្នំពេញដែលមានចំងាយប្រមាណ ១៨គីឡូម៉ែត គឺចាប់ពីផ្សារធំថ្មី ទៅកាន់អាកាសយានដ្ឋានអន្តរជាតិភ្នំពេញ ដែលគម្រោងនេះចំណាយទឹកប្រាក់ប្រមាណ ៨០០ លានដុល្លារអាមេរិក ហើយក៏កំពុងពិភាក្សារកជំនួយពីមិត្តជប៉ុនផងដែរ៕