លោកនាយករដ្ឋមន្រ្តី ហ៊ុន សែន បញ្ជាក់ថា ការទៅចរចាជាមួយនាយករដ្ឋមន្រ្តីឡាវមិនមែនជាការឱនក្បាលនោះទេ

នៅថ្ងៃទី១៤ ខែសីហា ឆ្នាំ២០១៧នេះ លោកនាយករដ្ឋមន្រ្តី ហ៊ុន សែន បានថ្លែងថា ការទៅចរចាជាមួយនាយករដ្ឋមន្រ្តីឡាវ ករណីកងទ័ពចូលទឹកដីកម្ពុជា​ មិនមែនជាការឱនក្បាលនោះទេ ប៉ុន្តែជាយុទ្ធសាស្រ្តនយោបាយ ដើម្បីចំណេញរៀងខ្លួន។ បើគ្មានយុទ្ធសាស្រ្តនេះទេ ប្រ​ហែលជាពេលនេះ ឡាវមិនព្រមដកទ័ពនោះឡើយ។ លោក បានថ្លែងដូចនេះ ក្នុងឱកាសអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យភូមិន្ទភ្នំពេញ ចំនួន៣,៣០២នាក់ នៅមជ្ឈមណ្ឌលពិព័រណ៍ និងសន្និបាតកោះពេជ្រ។

ប្រមុខរាជរដ្ឋាភិបាលកម្ពុជា បានបញ្ជាក់ថា  រឿងនាយករដ្ឋមន្រ្តីឡាវ មិនបានទទួលលិខិតរបស់លោកដែលស្នើឱ្យដកទ័ព គឺជាកំហុសរបស់ រដ្ឋមន្រ្តីក្រសួងការបរទេសឡាវ។ បើនៅកម្ពុជា រដ្ឋមន្រ្តីការបរទេសបែបនេះ នឹងត្រូវដកចេញតែម្តង ព្រោះមិនបានបញ្ចូនលិខិតភ្លាមៗទៅកាន់ថ្នាក់លើ។

លោកនាយករដ្ឋមន្រ្តី ហ៊ុន សែន ក៏បានបញ្ជាក់ថា អ្នកណាដែលអត្ថាធិប្បាយថារឿងឡាវចូលទឹកដីខ្មែរ ហើយបែរ ជាអត្ថាធិប្បាយថា ជានយោបាយរបស់គណបក្ស ប្រជាជនកម្ពុជា ដើម្បីចំណេញសន្លឹកឆ្នោត នោះត្រូវតែចាប់ខ្លួនតែម្តង។ លោក ហ៊ុន​ សែន ក៏បានបន្ថេមថា កម្ពុជា-ឡាវ គឺជាមិត្ត មិនត្រូវផ្ទុះសង្រ្គាមជាមួយគ្នាឡើយ បើទៅចរចា សង្រ្គាមនឹងផ្ទុះឡើងតែម្តងដែលនឹងបង្កមហន្តរាយធំធេងសម្រាប់សង្គមជាតិ៕