នាយឧត្តមសេនីយ៍ សៅ សុខា បើកកិច្ចប្រជុំត្រួតពិនិត្យការអនុវត្តតួនាទី ភារកិច្ច និងការងារ កងរាជអាវុធហត្ថលើផ្ទៃប្រទេស

នៅថ្ងៃទី០៥ ខែកក្កដា ឆ្នាំ២០១៧ នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានដឹកនាំកិច្ចប្រជុំ ដើម្បីត្រួតពិនិត្យការអនុវត្តតួនាទី ភារកិច្ច ការងារកងរាជអាវុធហត្ថ ប្រចាំឆមាសទី១ និងដាក់ចេញនូវទិសដៅឆមាសទី២ ឆ្នាំ២០១៧ ដែលប្រព្រឹត្តទៅ នៅសាលប្រជុំ សេនាធិការដ្ឋាន នៃទីបញ្ជាការកងរាជអាវុធហត្ថលើផ្ទៃប្រទេស។

នាយឧត្តមសេនីយ៍ឯក វង្ស ពិសេន បានធ្វើសេចក្តីរាយការណ៍ជូនអង្គប្រជុំជ្រាបថា នៅក្នុងឆមាសទី១ ឆ្នាំ២០១៧កន្លងទៅនេះ សភាពការណ៍ពិភពលោកមានការប្រែប្រួលបត់បែន និង​ពោរពេញទៅដោយភាពចម្រូងចម្រាសស្មុគស្មាញជាច្រើន ដូចជាបញ្ហាសង្គ្រាមប្រឆាំងភេរវកម្ម បញ្ហាជម្លោះអធិបតេយ្យបញ្ហាវិបត្តិអាវុធនុយក្លេអ៊ែរ ការប្រែប្រួលអាកាសធាតុ និងគ្រោះមហន្តរាយ​ដោយធម្មជាតិ ព្រមទាំងជំងឺឆ្លងរាតត្បាតផ្សេងៗ បាននិងកំពុងគំរាមកំហែងទូទាំងសកលលោក។

ចំណែកឯសភាពការណ៍ក្នុងប្រទេសវិញ ព្រឹត្តិការណ៍សំខាន់ៗដូចជា ការបោះឆ្នោតជ្រើសរើសក្រុមប្រឹក្សាឃុំ សង្កាត់ ដំណើរទស្សនកិច្ចរបស់ប្រធានាធិបតីសឹង្ហបុរី មីយ៉ាន់ម៉ា ឡាវ នាយករដ្ឋមន្ត្រីវៀតណាម លេខាធិការក្រុមប្រឹក្សាសន្តិសុខសហព័ន្ធរុស្សី និងឥស្សរជនជាន់ខ្ពស់បរទេសជាមិត្ត អញ្ជើញមកប្រទេសកម្ពុជា ព្រមទាំងពិធីបុណ្យជាតិ អន្តរជាតិនានា។ រីឯ សភាពការណ៍សន្តិសុខ សណ្តាប់ធ្នាប់សង្គម មានបទល្មើសកើតឡើងក្នុងនោះមានបទឧក្រិដ្ឋ បទមជ្ឈិម បណ្តាល​ឱ្យមនុស្សស្លាប់ រងរបួស និងសម្ភារៈបាត់បង់មួយចំនួន។ មានការប្រមូលផ្តុំមនុស្សធ្វើបាតុកម្ម កូដ​កម្ម ទាមទារតវ៉ាផ្សេងៗ ។ល។

កងរាជអាវុធហត្ថ បានបំពេញការងារ និងធ្វើសកម្មភាពមួយចំនួនដូចជា៖
– ការពារគណៈប្រតិភូជាតិ អន្តរជាតិ កិច្ចប្រជុំ ពិធីសម្ពោធសមិទ្ធផលនានារបស់ព្រះមហាក្សត្រ រាជរដ្ឋាភិបាល និងពិធីបុណ្យផ្សេងៗសរុបចំនួន៥៣.៨៦៩លើក។
– ជួយសម្រួលសណ្តាប់ធ្នាប់របៀបរៀបរយចរាចរណ៍កកស្ទះ ជូនប្រជាពលរដ្ឋ និងការដង្ហែក្បួនទាមទារតវ៉ាផ្សេងសរុបចំនួន៦.៨៦២លើក។
– បានធ្វើការត្រួតពិនិត្យសណ្តាប់ធ្នាប់កងទ័ពនៅតាមទីសាធារណៈលទ្ធផល ត្រួតពិនិត្យអាវុធឆ្លងកាត់ កែសម្រួលឯកសណ្ឋានយោធា ដកហូតខោអាវ មួកមួយចំនួន។
– ស្រាវជ្រាវបង្ក្រាបបទល្មើសបានចំនួន១.៣៦៦លើកក្នុងនោះមានអំពើប្លន់ប្រដាប់អាវុធ ឃាតកម្ម រំលោភសេពសន្ថវៈ ជួញដូរមនុស្ស សញ្ចារកម្ម បង្ខាំងមនុស្សដោយខុសច្បាប់ លួច ឆបោក ធ្វើឱ្យខូចខាតដោយចេតនា ហិង្សាដោយចេតនា ប្រើប្រាស់អាវុធដោយគ្មានការអនុញ្ញាត រំលោភលើទំនុកចិត្ត ការជួញដូរចែកចាយ ប្រើប្រាស់គ្រឿងញៀន ដំណាំកញ្ជា ប្រទូសកេរ្តិ៍ខ្មាស់ ក្មេងទំនើង ទទួលផលចោរកម្ម ហិង្សាសហព័ទ្ធ ល្បែងស៊ីសងខុសច្បាប់ បទល្មើសព្រៃឈើ បទល្មើសជលផល។
– បានធ្វើការឃាត់ខ្លួនជនសង្ស័យដែលពាក់ព័ន្ធនឹងបទល្មើសចំនួន២.៣៥២នាក់ និងចាប់យកវត្ថុតាងមួយចំនួនកសាងសំណុំរឿងបញ្ជូនទៅអយ្យការអមសាលាដំបូងរាជធានី ខេត្តតាមនីតិវិធី។
– សហការពង្រឹងការអនុវត្តច្បាប់និងបទបញ្ជាចំនួន៦.៥៣១លើកមាន៖ ជាមួយនគរបាលជាតិ ស្ថាប័នពន្ធដារ គយនិងរដ្ឋាការ រដ្ឋបាលព្រៃឈើ អង្គការអភិរក្សសត្វព្រៃ អភិរក្សដែនជីវៈចម្រុះ ក្រសួងរ៉ែថាមពល ក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ ក្រសួងដែនដីនគរូបនីយកម្ម និងសំណង់ រដ្ឋបាលជលផល កាំកុងត្រូល និងក្រុមចម្រុះ។

ចំពោះការសហការបង្ក្រាបបទល្មើសធនធានធម្មជាតិ ដោយអនុវត្តសេចក្តីសម្រេចរបស់រាជរដ្ឋាភិបាលលេខ១២៧ សសរ ចុះថ្ងៃទី៧ ខែធ្នូ ឆ្នាំ២០១៧ ស្តីពីការបង្កើតគណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិ លទ្ធផលបានឃាត់ខ្លួនជនសង្ស័យចំនួន១៩៦នាក់ និងចាប់យកវត្ថុតាងរួមមាន រថយន្ត១១៣គ្រឿង គោយន្តកន្ត្រៃ២៣គ្រឿង ត្រាក់ទ័រ០៤គ្រឿង រណារយន្ត២៩គ្រឿង ទោចក្រយានយន្ត២១គ្រឿង ម៉ាស៊ីនជ្រៀកឈើ០៣គ្រឿង ឈើគ្រញូង២០.៧៤០គីឡូក្រាម ឈើប្រភេទលេខ១,២ ចំនួន១.១៦២,៩៩២ម៉ែត្រត្រីគុណ និង១.៥០១ដុំ៕