សិស្សប៊ែលធីចំនួន ៧១នាក់ ត្រូវបានគណៈគ្រប់គ្រងសាលាបញ្ជូនឲ្យទៅចូលរួមកម្មវិធីបោះជំរំជាអន្តរជាតិ នៅសាធារណៈរដ្ឋកូរ៉េ នារាត្រីថ្ងៃទី០១ ខែកក្កដា ឆ្នាំ២០១៧។ ការបោះជំរំខ្នាតអន្តរជាតិនេះ មានយុវជនជាង ៤.០០០នាក់ មកពី ៨០ប្រទេសនៅលើពិភពលោក ព្រមទាំងមានការចូលរួមពីថ្នាក់រដ្ឋមន្រ្តីក្រសួងអប់រំមកពីបណ្តាប្រទេស ចំនួន ២២ផងដែរ។
លោក ប៊ុត ឌីម៉ង់ ប្រធានការិយាល័យចំណេះទូទៅ នៃសាលាប៊ែលធី អន្តរជាតិ បានអោយដឹងថា៖ ការបញ្ជូនសិស្សឲ្យទៅចូលរួមបោះជំរំនេះ គឺអាស្រ័យដោយ ប៊ែលធី គ្រុប បានចុះអនុស្សរណៈយោគយល់ជាមួយនឹងអង្គការសម្ព័ន្ធយុវជនអន្តរជាតិ (IYF) ដើម្បីធ្វើកិច្ចសហ-ប្រតិបត្តិការជាមួយគ្នា ហើយឆ្នាំនេះ អង្គការសម្ព័ន្ធយុវជនអន្តរជាតិ បានស្នើសុំសិស្សប៊ែលធីចំនួន ៧១នាក់ ឲ្យទៅចូលរួមក្នុងកម្មវិធីបោះជំរំអន្តរជាតិឆ្នាំ២០១៧ នៅសាធារណរដ្ឋកូរ៉េ រយៈពេល ១៤ថ្ងៃ ចាប់ពីថ្ងៃទី០១ ដល់ទី ១៤ ខែកក្កដា ក្នុងនោះដែរសិស្សានុសិស្សត្រូវបានរៀបចំឲ្យទៅទស្សនា និងសិក្សាតាមតំបន់សំខាៈ៖ន់ៗ ដូចជា៖ ទីក្រុងសេអ៊ូល ទីក្រុងប៊ូសាន សាកលវិទ្យាល័យពូយ៉ុង និងនៅតាមតំបន់ប្រវិត្តសាស្រ្តរបស់ប្រទេសកូរ៉េជាច្រើនកន្លែងទៀត។
ជាមួយគ្នានេះដែរ លោក លី ប៊ុនឆៃ អគ្គនាយករង ប៊ែលធី គ្រុប បានបញ្ជាក់ដែរថា នេះជាឱកាសដ៏ល្អបំផុតសម្រាប់សិស្សប៊ែលធី ដែលមានឱកាសបានទៅចូលរួមក្នុងកម្មវិធីជាលក្ខណៈអន្តរជាតិ ដែលមានប្រទេសជាច្រើនបានចូលរួម ដែលជាមោទនភាពរបស់ជាតិយើងទាំងមូល និងបានបង្ហាញពីការរីកចម្រើន និងសក្កានុពលលើវិស័យអប់រំរបស់ប្រទេសកម្ពុជានៅលើឆាកអន្តរជាតិ ហើយក៍ជាលើទី៤ ដែរ ដែលសាលា ប៊ែលធី អន្តរជាតិ បានបញ្ជូនសិស្សទៅចូលរួមក្នុងកម្មវិធីបោះជំរំអន្តរជាតិនៅសាធារណរដ្ឋកូរ៉េ។
លោក លី ប៊ុនឆៃ ក៍បានឲ្យដឹងទៀតថា៖ គោលបំណង និងអត្ថប្រយោជន៍នៃការបញ្ជូនសិស្សអោយចូលរួមក្នុងកម្មវិធីបោះជំរំជាលក្ខណៈអន្តរជាតិនេះ រួមមាន៖ ទី១ ចង់ឲ្យសិស្សរបស់យើងមានភាពក្លាហាន ចេះទទួលខុសត្រូវដោយខ្លួនឯង ចេះសម្របខ្លួនក្នុងការរស់នៅនិងធ្វើការជាក្រុម នៅជាមួយជាតិសាសន៍ផ្សេងៗគ្នា ដើម្បីដកស្រង់នូវបទពិសោធន៌ពីគ្នាទៅវិញទៅមក ក៏ដូចជាបានផ្លាស់ប្តូរនៅ វប្បធម៌ ប្រពៃណី ទំនៀមទំលាប់ និងចំណេះដឹងថ្មីៗដ៏ទៃទៀតដែលពួកគាត់ពុំធ្លាប់បានជួប ទី២-ចង់ឲ្យសិស្សរបស់យើងបានឃើញ បានស្គាល់និងសិក្សាស្វែងយល់អំពីបរិយាកាសថ្មីៗរបស់ប្រទេសដែលកំពុងរីកចំរើន ដើម្បីធ្វើជាទុនសម្រាប់ការសិក្សា ស្រាវជ្រាវ និងអភិវឌ្ឍខ្លួនឯង ជាទន់បន្ថែមសម្រាប់យកមករួមចំណែកអភិវឌ្ឍប្រទេសជាតិឲ្យបានរីកចំរើនទៅអនាគត និងទី៣តាមរយៈនៃការចូលរួមបោះជំរំនេះចង់បង្ហាញពីសមត្ថភាពសិស្សកម្ពុជានៅលើឆាកអន្តរជាតិនូវភាពក្លាហាន និងមានសមត្ថភាពគ្រប់គ្រាន់ អាចចូលរួមនៅក្នុងកម្មវិធីជាអន្តរជាតិ ក៏ដូចជាបានបង្ហាញឲ្យពិភពលោកបានស្គាល់នូវ ទំនៀមទំលាប់ ប្រពៃណី អរិយធម៌ និងការរីកចម្រើននៃប្រទេសកម្ពុជា ក្រោមការដឹកនាំដ៍ត្រឹមត្រូវ របស់រាជរដ្ឋាភិបាល នាពេលបច្ចុប្បន្នផងដែរ៕
No comments:
Post a Comment