លោក កែវ រ៉េមី ដឹកនាំកិច្ចប្រជុំអន្តរក្រសួងដើម្បីផ្សព្វផ្សាយសេចក្ដីសម្រេចរបស់រដ្ឋាភិបាលស្តីពីការបង្កើតក្រុមការងារអន្តរក្រសួងពាក់ព័ន្ធនឹងសិទ្ធិមនុស្ស

លោក កែវ រ៉េមី រដ្ឋលេខាធិការទីស្តីការគណៈរដ្ឋមន្រ្តី និងជាប្រធានគណៈកម្មាធិការសិទ្ធិមនុ​ស្សកម្ពុជា បានអញ្ជើញជាអធិបតីភាពបើកអង្គប្រជុំអន្តរក្រសួងដើម្បីផ្សព្វផ្សាយ​សេ​ចក្ដី​ស​ម្រេច​របស់​រដ្ឋាភិបាល​ លេខ​ ១១៤សសរ​ ចុះថ្ងៃទី​១៨​ ខែធ្នូ​ ឆ្នាំ​២០១៧​ ស្តីពី​ការបង្កើត​ក្រុមការ​ងារ​អន្តរ​ក្រសួង​ដឹក​នាំ​ការងារការសរសេរ​របាយការណ៍​ស្តីពី​សិទ្ធិ​មនុស្ស​នៅកម្ពុជា​ ជូនអង្គការ​សហប្រជាជាតិ នៅព្រឹកថ្ងៃសុក្រ ទី៥ ខែមករា ឆ្នាំ២០១៨នេះ នៅទីស្តីការគណៈរដ្ឋមន្រ្តី។

លោក កែវ រ៉េមី បានបញ្ជាក់ថា ប្រមុខរាជរដ្ឋាភិបាលកម្ពុជា បាននិងកំពុងផ្តោតការយកចិត្តទុកដាក់ខ្ពស់ទៅលើបញ្ហាសិទ្ធិមនុស្សនៅកម្ពុជា ព្រមទាំងបានអនុញ្ញាតឱ្យមានការិយាល័យឧត្តមស្នងការអង្គការសហប្រជាជាតិផ្នែកសិទ្ធិមនុស្សនៅកម្ពុជាផងដែរ។ លោកបន្ថែមថា ការបង្កើតក្រុមការងារទទួលបន្ទុកផ្នែកសិទ្ធិមនុស្សនៅតាមក្រសួងនីមួយៗនេះមានសារៈសំខាន់ខ្លាំងណាស់ពោលគឺដើម្បីប្រសិទ្ធភាពការងារសិទ្ធិមនុស្សនៅតាមក្រសួងស្ថាប័នដើម្បីសរសេររបាយការណ៍ស្តីពីសិទ្ធិមនុស្សជូនអង្គការសហប្រជាជាតិ។

លោក កែវ រ៉េមី ក៏បានសង្កត់ធ្ងន់ថា ក្រសួងសាមីនីមួយៗអាចកំណត់សមាសភាពនៅក្នុងក្រុមការងារអាស្រ័យទៅលើការងារជាក់ស្តែង ទៅតាមទំហំការងាររបស់ក្រសួងខ្លួន។ លោកបានបន្ថែមថា គណៈកម្មាធិការសិទ្ធិមនុស្សកម្ពុជាក៏នឹងរៀបចំសិក្ខាសាលាបណ្តុះបណ្តាលផងដែរដើម្បីប្រសិទ្ធភាពនៃការសរសេររបាយការណ៍សិទ្ធិមនុស្សជូនអង្គការសហប្រជាជាតិ៕