ជានិច្ចជាកាលកាកបាទក្រហមកម្ពុជានៅជាប់ជាមួយបងប្អូនរងគ្រោះគ្រប់ទីកន្លែង

សៀមរាប៖ នៅព្រឹកថ្ងៃទី៤ ខែ មករា ឆ្នាំ២០១៨ លោកស្រី គួយ ណាលីន ឃឹម ប៊ុនសុង អនុប្រធានគណៈ កម្មាធិការសាខាកាកបាទក្រហមខេត្ត និង សហការី បានអញ្ជើញជួបសំណេះសំណាលសួរសុខទុក្ខ និងនាំយកអំណោយមនុស្សធម៌ជូនបងប្អូនគ្រួសារខ្វះខាតស្បៀង ចំនួន ១៣១គ្រួសារមកពី៥ភូមិ ក្នុងឃុំត្រាំសសរ ស្រុកស្រីស្នំ ខេត្ត សៀមរាប រងគ្រោះទឹកជនលិចស្រូវវស្សារបស់ពួកគាត់ ហើយរលួយមួយភាគធំ ។

មានប្រសាសន៍នាឱកាសនោះ លោកស្រី គួយ ណាលីន ឃឹម ប៊ុនសុង ក៏បានពាំនាំនូវការផ្ដាំផ្ញើសួរសុខទុក្ខ ពីសំណាក់លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុក ដាក់គិតគូរចំពោះប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬ និន្នាការនយោបាយណាមួយឡើយ ។ លោកស្រី ក៏បានបញ្ជាក់ថា ថ្វីត្បិតតែអំណោយមនុស្សធម៌ដែលបាននាំយកមកជូនបងប្អូននាពេលនេះមានចំនួនតិចតួចក្ដី តែនេះជាការជួយគ្នាក្នុងគ្រាលំបាក ហើយក៏ជាការបង្ហាញនូវការយកចិត្តទុក ដាក់ចំពោះប្រជាពល រដ្ឋគ្រប់រូបពីសំណាក់ថ្នាក់ដឹកនាំ សំខាន់កាកបាទក្រហមកម្ពុជា ដូចដែលបានលើកឡើងថា «កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា» និង «ទីណាមានទុក្ខលំបាក ទីនោះមានកាកបាទក្រហមកម្ពុជា”»។

លោកស្រី ក៏បានសម្តែងនូវការអាណិត អាសូរ ព្រមទាំងសូមការអភ័យទោសពីបងប្អូនផងដែរ ក្នុងភាពយឺតយ៉ាវនេះផងដែរ។ លោកស្រីក៏បានធ្វើការផ្តាំផ្ញើដល់បងប្អូនប្រជាពលរដ្ឋទាំងអស់ ត្រូវចេះថែរក្សានូវសុខភាព អនាម័យ ព្រមទាំងធ្វើការ ដាំដុះនូវដំណាំរួមផំ្ស ចិញ្ចឹមសត្វ ដើមី្បផ្គត់ផ្គង់ទ្រទ្រង់ជីវភាពក្រុមគ្រួសារ និង ត្រូវមានការប្រុងប្រយ័ត្នខ្ពស់ ចំពោះ បញ្ហាភ្លើង ផ្សែង ដោយរដូវនេះជារដូវរំហើយ ព្រមទាំងស្ងួត ដែលងាយនឹងរងគ្រោះជាយថាហេតុទៀតផង ហើយនៅ ពេលមានបញ្ហាសុខភាព សូមអញ្ជើញទៅមណ្ឌលសុខភាពនៅក្នុងមូលដ្ឋានខ្លួនផងដែរ ។ អំណោយមនុស្សធម៌ដែលបានផ្ដល់ជូនក្នុងមួយគ្រួសារទទួលបាន៖ -អង្ករ២៥គីឡូក្រាម -មី១កេស -ទឹកត្រី១យួរ -ប្រេងឆា១ដប និងថវិកា៤ម៉ឺនរៀល។

ឆ្លៀតក្នុងឱកាសនោះ លោកស្រី និង ប្រតិភូ ក៏បានអញ្ជើញចុះពិនិត្យការដ្ឋានសាងសង់ អគារទីស្នាក់ការអនុសាខាកាកបាទក្រហមកម្ពុជា ស្រុកស្រីស្នំ ដែលបានសាសង់ សម្រេចលទ្ធផលបាន ៩០ភាគរយ ។ ក្នុងនោះលោកស្រីក៏បានធ្វើការក្រើនរំលឹក និង ជំរុញដល់អ្នកម៉ៅការសាងសង់ ដើមី្បពន្លឿនការសាងសង់ឲ្យបានឆាប់រួចរាល់ និង ត្រូវយកចិត្តទុកដាក់ខ្ពស់លើបច្ចេកទេសក្នុងការសាងសង់ ឲ្យបានត្រូវតាមស្តង់ដារ បទដ្ឋាននៃសំណង់ ក្នុងការធានាបានគុណភាពប្រើប្រាស់បានយូរអង្វែងផងដែរ៕