រដ្ឋបាលខេត្តកណ្តាល បើកកិច្ចប្រជុំបូកសរុបលទ្ធផលការងារប្រចាំឆ្នាំ២០១៧ និងលើកទិសដៅការងារ ឆ្នាំ២០១៨

កណ្តាល៖ នារសៀល ថ្ងៃពុធ ៣រោច ខែបុស្ស ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៤ ខែមករា ឆ្នាំ២០១៨ រដ្ឋបាលខេត្តកណ្តាល បានរៀបចំកិច្ចប្រជុំបូកសរុបលទ្ធផលការងារប្រចាំឆ្នាំ២០១៧ និងលើកទិសដៅការងារ ឆ្នាំ២០១៨ របស់គណៈកម្មាធិការខេត្ត ប្រយុទ្ធប្រឆាំងអំពើជួញដូរមនុស្ស ក្រោមអធិបតីភាព លោក ម៉ៅ ភិរុណ អភិបាលខេត្តកណ្តាល និងជាប្រធានគណៈកម្មាធិការខេត្ត ប្រយុទ្ធប្រឆាំងអំពើជួញដូរមនុស្ស។

កិច្ចប្រជុំនោះក៏មានសមាសភាពអញ្ជើញចូលរួមពីប្រធានគ.ក.ស.ក ខេត្ត, លោកស្រីអភិបាលរងខេត្ត, លោក លោកស្រី ប្រធាន អនុប្រធាន និងសមាជិក លេខាធិការដ្ឋានខេត្ត ក្រុមការងារទាំង៦ និងក្រុមការងារប្រយុទ្ធប្រឆាំងអំពើជួញដូរមនុស្ស សរុបចំនួន ៧៦នាក់ផងដែរ។ គោលបំណងនៃកិច្ចប្រជុំនេះ គឺដើម្បី ពិនិត្យ និងកែសម្រួលរបាយការណ៍ប្រចាំឆ្នាំ២០១៧ និងលើកទិសដៅការងារ ឆ្នាំ២០១៨ របស់ គណៈកម្មាធិការខេត្ត ប្រយុទ្ធប្រឆាំងអំពើជួញដូរមនុស្ស។

លោកអភិបាលខេត្ត បានលើកឡើងពីចំណុចខ្លាំងដែលធ្វើឱ្យការងារប្រយុទ្ធប្រឆាំងជួញដូរមនុស្សមានដំណើរការល្អនិងផ្តល់នូវមតិណែនាំបន្ថែមដូចជា៖ ត្រូវពិនិត្យមើលយន្តការទៅលើរចនាសម្ព័ន្ធគ្រប់ថ្នាក់ ពិនិត្យទៅលើប្រព័ន្ធនីតិវីធីនៃការអនុវត្តគោលនយោបាយនៃការជួញដូរ ត្រូវមានផែនការសកម្មភាពស្របតាមបរិបទសង្គមនៅតាមមូលដ្ឋាន ត្រូវប្រើមធ្យោបាយសរុប កម្លាំងសរុប វិធានការសរុប ដែលជំរុញឱ្យផែនការសកម្មភាពអនុវត្តមានប្រសិទ្ធភាព និងទទួលបានជោគជ័យ៕