លោកនាយករដ្ឋមន្រ្តី ហ៊ុន សែន ថ្លែងថា ប្រជាពលរដ្ឋទូទៅឃើញកម្ពុជារីកចម្រើនទៅមុខជារៀងរាល់ថ្ងៃ ខុសពីអ្នកដែលមើលកម្ពុជាបញ្ច្រាស់ថ្ងៃ

នៅព្រឹកថ្ងៃទី៥ ខែមករា ឆ្នាំ២០១៧នេះ គឺជាថ្ងៃគម្រប់ខួបអាពាហ៍ពិពាហ៍៤២ឆ្នាំរបស់លោកនាយករដ្ឋមន្រ្តី ហ៊ុន សែន និងភរិយា។ ប្រមុខរាជរដ្ឋាភិបាលកម្ពុជា បានបង្ហោះផ្សាយនៅក្នុងទំព័រហ្វេសប៊ុកផ្លូវការរបស់លោក ដោយថ្លែងអំណរគុណចំពោះជនរួមជាតិទាំងក្នុង និងក្រៅប្រទេស ដែលបានជូនពរលោក និងភរិយា។

លោកនាយករដ្ឋមន្រ្តី ហ៊ុន សែន ក៏បានបន្ថែមថា ជនរួមជាតិនៅក្នុងទូទាំងប្រទេស បានឃើញច្បាស់ពីការរីកចម្រើនទៅមុខពីមួយថ្ងៃទៅមួយថ្ងៃ ពីព្រោះមានអ្នកធ្វើពិត ច្រើនជាងអ្នកដែលអង្គុយចាំថា និងអ្នកដែលមើលកម្ពុជាបញ្ច្រាស់ថ្ងៃ។

លោកនាយករដ្ឋមន្រ្តី ហ៊ុន សែន បានបង្ហោះនូវរូបភាពអមដោយសារថា «រូបថតនេះគឺខ្ញុំឡើងទៅលើអគារវឌ្ឍនៈ មើលពីការអភិវឌ្ឍន៍នៃរាជធានីភ្នំពេញ។ ខ្ញុំ និងបងប្អូនជនរួមជាតិដែលរស់នៅក្នុងប្រទេស គឺបានឃើញច្បាស់ពីការរីកចម្រើនពិតប្រាកដរបស់កម្ពុជា។ ប្រទេសជាតិយើងកាន់តែរីកចម្រើនទៅមុខលឿនជានិច្ច ព្រោះយើងមានអ្នកធ្វើពិតប្រាកដ ច្រើនជាងអ្នកអង្គុយថា និងអ្នកមើលកម្ពុជាបញ្ច្រាស់ថ្ងៃ»។

លោកបានបន្ថែមថា «ថ្ងៃទី ៥ មករា ២០១៨ នេះ គឺជាថ្ងៃគម្រប់ខួបអាពាហ៍ពិពាហ៍ ៤២ឆ្នាំរបស់ខ្ញុំផងដែរ។ សូមអរគុណជនរួមជាតិទាំងក្នុង និងក្រៅប្រទេស ដែលបានជូនពរខ្ញុំ និងភរិយាជាទីស្រឡាញ់បំផុតរបស់ខ្ញុំ នៅក្នុងថ្ងៃដ៏ពិសេសបំផុតរបស់ខ្ញុំថ្ងៃនេះ!»៕