ពិធីចុះអនុស្សរណៈនៃការយោគយល់គ្នាស្ដីពីការផលិតវីដេអូបង្រៀន និងរៀន គណិតវិទ្យា និងភាសាខ្មែរថ្នាក់ទី១១ និងថ្នាក់ទី១២

នៅព្រឹកថ្ងៃសុក្រ៤រោច ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៥ ខែមករា ឆ្នាំ២០១៨ ក្រសួងអប់រំ យុវជន និងកីឡា និងតំណាងអង្គការ School Aid Japan បានរៀបចំពិធីចុះអនុស្សរណៈនៃការយោគយល់គ្នា ស្ដីពីការផលិតវីដេអូបង្រៀន និងរៀនមុខវិជ្ជាគណិតវិទ្យា និងភាសាខ្មែរថ្នាក់ទី១១ និងថ្នាក់ទី១២ ក្រោមអធិបតីភាព លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងតំណាងអង្គការSchool Aid Japan នៅទីស្ដីការក្រសួងអប់រំ យុវជន និងកីឡា។

ពិធីចុះអនុស្សរណៈនេះ ត្រូវបានធ្វើឡើងក្នុងបំណងឱ្យមានការទទួលស្គាល់ជាផ្លូវការ និងបង្កើតកិច្ចសហប្រតិបត្តិការរវាងក្រសួងអប់រំ យុវជន និងកីឡានៃព្រះរាជាណាចក្រកម្ពុជា និងអង្គការ School Aid Japan ដើម្បីគាំទ្រការផលិតឌីវីឌី (DVD) មុខវិជ្ជាគណិតវិទ្យា និងភាសាខ្មែរថ្នាក់ទី១១ និងថ្នាក់ទី១២ ដើម្បីពង្រឹងសកម្មភាពរបស់គ្រូមធ្យមសិក្សានៅតាមជនបទ និងការសិក្សារបស់សិស្ស៕