ក្រុមប្រឹក្សាខេត្តព្រះសីហនុបើកកិច្ចប្រជុំសាមញ្ញលើកទី៤៤ អាណត្តិទី២

ព្រះសីហនុ៖ នៅព្រឹកថ្ងៃទី០៣ រោជ ខែបុស្យ ឆ្នាំរកា ព.ស ២៥៦១ ត្រូវនឹងថ្ងៃទី៤ ខែមករា ឆ្នាំ ២០១៨ ក្រុមប្រឹក្សាខេត្តព្រះសីហនុ បានបើកកិច្ចប្រជុំសាមញ្ញលើកទី៤៤ អាណត្តិទី២ ក្រោមអធិបតីភាពលោក ជាម ហ៊ីម ប្រធានក្រុមប្រឹក្សាខេត្តព្រះសីហនុ អភិបាលរងខេត្ត និងមានការអញ្ជើញចូលរួមពីអភិបាល អភិបាលរងក្រុង ស្រុក មន្ទីរ អង្គភាព ស្ថាប័នរដ្ឋពាក់ព័ន្ធក្នុងខេត្តព្រះសីហនុ ដើម្បីធ្វើការពិភាក្សាលទ្ធផលការងារឆ្នាំ២០១៧ និងលើកទិសដៅអនុវត្តន៍បន្តឆ្នាំ២០១៨ ។

កិច្ចប្រជុំសាមញ្ញលើកទី៤៤ របស់ក្រុមប្រឹក្សាខេត្តព្រះសីហនុ បានធ្វើការពិនិត្យ ពិភាក្សា និងអនុម័តលើរបៀបវារៈចំនួន០៦ រួមមាន៖
ទី១- ពិនិត្យ និងអនុម័តសេចក្ដីព្រាងរបៀបវារៈកិច្ចប្រជុំសាមញ្ញលើកទី៤៤ អាណត្តិទី២ របស់ក្រុមប្រឹក្សាខេត្ត។
ទី២- ពិនិត្យ និងអនុម័តកំណត់ហេតុកិច្ចប្រជុំសាមញ្ញលើកទី៤៣ អាណត្តិទី២ របស់ក្រុមប្រឹក្សាខេត្ត ។
ទី៣- ពិនិត្យ និងអនុម័តរបាយការណ៍ប្រចាំខែធ្នូ ឆ្នាំ២០១៧ ស្ដីពីការអនុវត្តការងាររបស់រដ្ឋបាលខេត្ត គិតចាប់ពីថ្ងៃទី២០ ខែវិច្ឆិកា ដល់ថ្ងៃទី២០ ខែធ្នូ ឆ្នាំ២០១៧ ។
ទី៤- ពិនិត្យ និងអនុម័តលើសំណើសុំបង្កើតការិយាល័យគ្រប់គ្រងឆ្នេរសមុទ្រចំណុះឲ្យទីចាត់ការអន្តរវិស័យសាលាខេត្តព្រះសីហនុ។
ទី៥- ស្តាប់របាយការណ៍របស់គណៈកម្មាធិការនានារបស់ក្រុមប្រឹក្សាខេត្ត, គណៈកម្មាធិការពិគ្រោះយោបល់កិច្ចការស្ត្រី និងកុមារ, គណៈកម្មាធិការលទ្ធកម្ម, គណៈកម្មាធិការសម្របសម្រួលបច្ចេក ទេស, គណៈកម្មាធិការគ្រប់គ្រងមណ្ឌលអភិវឌ្ឍន៍ធនធានមនុស្សខេត្ត, គណៈកម្មាធិ ការរៀបចំដែនដី និងនគរូបនីយកម្មខេត្ត
និងទី៦. បញ្ហាផ្សេងៗ ។

ប្រធានក្រុមប្រឹក្សាខេត្តព្រះសីហនុ បានកោតសរសើរមន្ត្រីតាមមន្ទីរ អង្គភាព អាជ្ញាធរ ក្រុង ស្រុក ឃុំ សង្កាត់ ដែលបានអនុវត្តការងារឆ្នាំ២០១៧ ទទួលបានលទ្ធផលល្អ តាមតួនាទី ភារកិច្ចរៀងៗខ្លួន រក្សាបាននូវសុខសន្តិសុខ សុវត្ថិ ភាពជូនប្រជាពលរដ្ឋ ក៏ដូចជាភ្ញៀវទេសចរជាតិ អន្តរជាតិ ព្រមទាំងបានជំរុញការអនុវត្តការងារឲ្យកាន់តែទទួលបានលទ្ធផលល្អប្រសើរបន្ថែមទៀត ពិសេសការងារបម្រើសេវាសាធារណៈជូនប្រជាពលរដ្ឋឱ្យមានតម្លាភាព ប្រសិទ្ធភាព លុបបំបាត់បាតុភាពអសកម្មផ្សេងៗនៅក្នុងមូលដ្ឋាន ដើម្បីឲ្យប្រជាពលរដ្ឋមានទំនុកចិត្តមកទទួលយកសេវាសាធា រណនៅតាមឃុំ សង្កាត់នានា ក្នុងខេត្តព្រះសីហនុ និងការចូលរួមអភិវឌ្ឍន៍ខេត្តព្រះ សីហនុ មានការរីកចម្រើន ។

ប្រធានក្រុមប្រឹក្សាខេត្តព្រះសីហនុ ក៏បានជំរុញឱ្យគ្រប់ផ្នែក ត្រូវខិតខំយកចិត្តទុកដាក់រក្សាសន្តិសុខ សុវត្ថិភាពជូនភ្ញៀវទេសចរជាតិ អន្តរជាតិ ពិសេសការរៀបចំកែលម្អសោភ័ណភាព អនាម័យ បរិស្ថាន តាមទីប្រជុំជនក្នុងក្រុងព្រះសីហនុ ថ្វីត្បិតតែពិធីបុណ្យឆ្លងឆ្នាំសកល២០១៧ -២០១៨ថ្មីៗនេះ ខេត្តព្រះសីហនុ ទទួលបានភ្ញៀវទេសចរជាតិ អន្តរជាតិមកលេងកម្សាន្ត មានការកើនឡើងជាងឆ្នាំ២០១៦ ក៏ដោយក៏ត្រូវតែបន្តការអនុវត្តន៍នូវគោលនយោបាយភូមិ ឃុំមានសុវត្ថិភាព ០៩ចំណុចរបស់រាជរដ្ឋាភិបាលកម្ពុជា ក៏ដូចជាបទបញ្ជារបស់ក្រសួងមហាផ្ទៃដើម្បីធានាបាននូវសន្តិសុខ សុវត្ថិភាព ជូនបងប្អូនប្រជាពលរដ្ឋក្នុងមូលដ្ឋាន និងតាមសហគមន៍៕