អភិបាលខេត្តក្រចេះអញ្ជើញបិទការប្រកួតកីឡាបាល់ទាត់អបអរសាទរខួបអនុស្សាវរីយ៍លើកទី៣៩ នៃទិវាជយ័ជំនះ ៧មករា

នៅរសៀលថ្ងៃព្រហស្បតិ៍ ៣រោច ខែបុស្ស នព្វស័ក ព.ស២៥៦១ ត្រូវនឹងថ្ងៃទី៤ ខែមករា ឆ្នាំ២០១៨ លោក សរ ចំរុង អភិបាលខេត្តក្រចេះ និងលោក ប៉ាន់ខែម ប៊ុនថន ជំនួយការផ្ទាល់លោកនាយករដ្ឋមន្រ្តី ហ៊ុន សែន និងជាប្រធានប្រតិបត្តិសម្ព័ន្ធយុវជនស្រឡាញ់សន្តិភាព បានអញ្ជើញជាអធិបតីក្នុងពិធីបិទការប្រកួតកីឡាបាល់ទាត់អបអរសាទរខួបអនុស្សាវរីយ៍លើកទី៣៩ នៃទិវាជយ័ជំនះ (៧មករា១៩៧៩-៧មករា២០១៨) ដោយមានក្រុមកីឡាខេត្ដក្រចេះចំនួន១៦ក្រុម ចូលរួមប្រកួតដណ្ដើមពានរង្វាន់៧មករា ឆ្នាំ២០១៨ ដែលរៀបចំឡើងដោយក្រុមយុវជនសម្ព័ន្ធស្រឡាញ់សន្តិភាព រដ្ឋបាលខេត្ត និងមន្ទីរអប់រំយុវជន និងកីឡាខេត្ត។

ពិធីបិទការប្រកួតបាល់ទាត់នោះក៏មានការអញ្ជើញចូលរួមពី អភិបាលរងខេត្ត លោក លោកស្រីប្រធាន អនុប្រធានមន្ទីរ អង្គភាពជុំវិញខេត្ត កងកម្លាំងទាំងបី យុវជនប្រតិបត្តិសម្ព័ន្ធយុវជនស្រឡាញ់សន្តិភាព យុវជន​ក១៥៧ និងក្រុមកីឡាករប្រមាណ២០០នាក់។ លោកអភិបាលខេត្ត ក៏បានផ្តាំផ្ញើដល់ ប្អូនក្មួយៗយុវជនទាំងអស់ត្រូវចៀសឆ្ងាយពីគ្រឿងញៀន និងអំពើអបាយមុខផ្សេងៗដែលផ្ទុយខុសពីនិតិវិធីច្បាប់ ត្រូវខិតខំរៀនសូត្រ ធ្វើជាកូនល្អ សិស្សល្អ ដើម្បីក្លាយជាធនធានមនុស្ស ចូលរួមអភិវឌ្ឍន៍ប្រទេសជាតិ។

ក្នុងឱកាសនោះផងដែរ លោក ក៏បានអញ្ជើញផ្ដល់ជ័យលាភីដល់ក្រុមកីឡាករដែលទទួលបានជ័យជំនះ និងឧបត្ថមថវិកាមួយចំនួនដូចជា៖ -លេខ១ ទទួលបានពានរង្វាន់១ និងថវិកាចំនួន១,៦០០,០០០រៀល -លេខ២ ទទួលបានមេដាយ និងថវិកាចំនួន១,២០០,០០០រៀល -លេខ៣ ទទួលបានមេដាយ និងថវិកាចំនួន១,​០០០,០០០រៀល និងក្រុមកីឡាដែរមិនទទួលបានជ័យជំនះទទួលបានថវិកាចំនួន២០០,០០០រៀលផងដែរ៕