ខេត្តក្រចេះ​ រៀបចំពិធី​ប្រកាស​ផ្ទេរភារកិច្ច​ចូលកាន់​មុខតំណែងថ្មី​អភិបាល​រងក្រុងក្រចេះ​ ចំនួន០២រូប​

ក្រចេះ ៖ នៅថ្ងៃសុក្រ ៤រោច ខែបុស្ស នព្វស័ក ព.ស២៥៦១ ត្រូវនិងថ្ងៃទី០៥ ខែមករា ឆ្នាំ២០១៨នេះ រដ្ឋបាលក្រុងក្រចេះ ខេត្តក្រចេះ បានរៀបចំប្រារព្ធពិធីប្រកាសផ្ទេរភារកិច្ចអភិបាលរងក្រុងក្រចេះ ចំនួន០២រូប ក្រោមអធិបតីភាពលោក ប៉ែន លីណាត អភិបាលរងខេត្តក្រចេះ។

អភិបាលរងក្រុងក្រចេះ ដែលទើបផ្ទេរភារកិច្ចថ្មី ចំនួន០២រូបនោះរួមមាន៖ ១-លោក ម៉ែន វណ្ណា ឋានន្តរស័កិ្តវរមន្ត្រី ថ្នាក់លេខ២ ពីអភិបាលរងស្រុកស្នួល ទៅកាន់មុខតំណែងជាអភិបាលរងក្រុងក្រចេះ។ ២-លោកស្រី ខៀវ សុផៃ ឋានន្តរស័កិ្តនាយក្រមការ ថ្នាក់លេខ៣ ពីអភិបាលរងស្រុកស្នួល ទៅកាន់មុខតំណែងជាអភិបាលរងក្រុងក្រចេះ។

ក្នុងពិធីនេះ លោកអភិបាលរងខេត្ត ក៏បានណែនាំ និងផ្តាំផ្ញើដល់លោកអភិបាលក្រុង និងអភិបាលរងក្រុងដែលទើបផ្ទេរភារកិច្ចថ្មី ក្នុងដែនសមត្ថកិច្ច រួមទាំងក្រុមប្រឹក្សា គណៈអភិបាលស្រុក មន្រ្តីរាជការ កងកម្លាំងប្រដាប់អាវុធ និងកម្លាំងមានសមត្ថកិច្ចគ្រប់លំដាប់ថ្នាក់ នៃក្រុងក្រចេះ ត្រូវរួមសហការគ្នាអនុវត្តការងារសំខាន់ៗ ជាអាទិភាព រួមមាន ៖

-ត្រូវបន្តរួមគ្នាថែរក្សាការពារសន្តិភាព ស្ថិរភាពនយោបាយ ស្ថិរភាពសង្គម ឲ្យបានល្អប្រសើរ។

-បន្តខិតខំលើកកម្ពស់ការរក្សាសន្តិសុខ សណ្តាប់ធ្នាប់សាធារណៈទូទាំងក្រុងក្រចេះ ដោយជម្រុញការផ្សព្វផ្សាយនូវលក្ខណៈសម្បត្តិទាំង០៩ នៃគោលនយោបាយភូមិ ឃុំ មានសុវត្ថិភាព ឲ្យបានសស្រាក់សស្រាំទូទាំងក្រុង។

-មន្រ្តីអនុវត្តច្បាប់ទាំងអស់ត្រូវខិតខំលើកកម្ពស់សមត្ថភាព ជំនាញ និងសីលធម៌វិជ្ជាជីវៈ ត្រូវមានភាពស្អាតស្អំ និងខិតខំបម្រើប្រជាពលរដ្ឋដោយស្មោះត្រង់ និងស្មើភាព។

-ត្រូវបន្តជំរុញការអភិវឌ្ឍសេដ្ឋកិច្ចសង្គមលើគ្រប់វិស័យ និងខិតខំលើកកម្ពស់ជីវភាពរស់នៅរបស់ប្រជាពលរដ្ឋ តាមរយៈការផ្តល់សេវាសាធារណៈ និងជំរុញកិច្ចអភិវឌ្ឍមូលដ្ឋាន ព្រមទាំងខិតខំសម្របសម្រួលដោះស្រាយបញ្ហាប្រឈមនានា ដែលនៅសេសសល់ សំដៅរួមគ្នាធានាឲ្យបាននូវប្រក្រតីភាព នៃការងារគ្រប់វិស័យទូទាំងក្រុង។

-បន្តជំរុញអនុវត្តកម្មវិធីកំណែទម្រង់នានា របស់រាជរដ្ឋាភិបាល ដោយឡែកចំពោះកំណែទម្រង់វិមជ្ឈការ និងវិសហមជ្ឈការ ក្រុមប្រឹក្សា គណៈអភិបាលក្រុង មន្រ្តីជំនាញនានា មន្រ្តីសាលាក្រុង ក្រុមប្រឹក្សាសង្កាត់។
-បន្តយកចិត្តទុកដាក់រៀបចំសោភ័ណភាព សណ្តាប់ធ្នាប់ អនាម័យការប្រើប្រាស់ផ្លូវ ចិញ្ចើមផ្លូវសាធារណៈ ការគ្រប់គ្រងការសាងសង់សំណង់នានា និងសុវត្ថិភាពអោយកាន់តែល្អប្រសើរថែមទៀត។

-ពង្រឹងឡើងវិញអំពីការអនុវត្តតួនាទី ភារកិច្ច របស់ការិយាល័យនានាចំណុះសាលាក្រុង ឲ្យមន្រ្តីរាជការមានវត្តមានគ្រប់ៗរូប ដើម្បីរួមគ្នាបំពេញការងារឲ្យបានកាន់តែមានប្រសិទ្ធភាពថែមទៀត និងត្រូវបន្តយកចិត្តទុកដាក់សហការជាមួយទីចាត់ការនានាចំណុះសាលាខេត្ត ដើម្បីធ្វើការបណ្តុះបណ្តាល មន្រ្តីរាជការសាលាក្រុងឲ្យមានសមត្ថភាពគ្រប់គ្រាន់ក្នុងការអនុវត្តតួនាទី ភារកិច្ចរបស់ខ្លួនបានកាន់តែល្អប្រសើរ៕