ស្បៃបៃតងនិងគ្រាប់ពូជបន្លែប្រាំពីរប្រភេទត្រូវបានប្រគល់ជូនសហគមន៍ចំនួន២នៅស្រុកសណ្តាន់ខេត្តកំពង់ធំ

កំពង់ធំ៖ នៅព្រឹកថ្ងៃសុក្រ ០៤រោច ខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី៥ ខែមករា ឆ្នាំ២០១៨នេះ ក្រសួងបរិស្ថាន បានរៀបចំពិធីចែកគ្រាប់ពូជបន្លែ និងស្បៃបៃតង ជូនសហគមន៍ការពារធម្មជាតិជាំធ្លក និងស្ករក្រូច ៦៤២គ្រួសារ ស្ថិតនៅឃុំងន ស្រុកសណ្តាន់ ខេត្តកំពង់ធំ ក្រោមអធិបតីភាពលោក សុខន រិទ្ធិគុណ អនុរដ្ឋលេខាធិការក្រសួងបរិស្ថាន និងលោក សុខ លូ អភិបាលខេត្តកំពង់ធំ ដោយមានការសហការជាមួយមន្ទីរបរិស្ថានខេត្ត ព្រមទំាង​មានការចូលរួមពី ថ្នាក់ដឹកនាំខេត្ត ស្រុក មន្ទីរអង្គភាព  ព្រមទាំងប្រជាពលរដ្ឋប្រមាណជាង ៦០០​នាក់។

លោក សុខ លូ អភិបាលខេត្តកំពង់ធំ បានអំពាវនាវដល់ប្រជាពលរដ្ឋទាំងអស់ត្រូវតែយកចិត្តទុកដាក់ទៅលើដាំដំណាំបន្លែដែលគ្មានជាតិគីមីដើម្បីចូលរួមចំណែកក្នុងការលើកស្ទួយកម្រិតជីវភាពរបស់បងប្អូនឲ្យកាន់តែល្អប្រសើរឡើង និងធានាសុវត្ថិភាព ក្នុងការបរិភោគបន្លែប្រចាំថ្ងៃ ព្រមទាំងទទួលបានសុខភាពល្អ។ លោកបានបញ្ជាក់ថា សុខភាពគឺជាបញ្ហាចំបងរបស់មនុស្សគ្រប់រូបដែលត្រូវតែធ្វើការយកចិត្តទុកដាក់បំផុត ព្រោះបើយើងមានសុខភាពល្អ នោះយើ​ងជាមនុស្សដែលទ្រព្យសម្បត្តិមហាសាលតែបើសុខភាពមិនល្អហើយវាធ្វើឱ្យបាត់បង់គ្រប់យ៉ាង។

ក្នុងនោះលោកអភិបាលខេត្តកំពង់ធំ អំពាវនាវឱ្យបងប្អូនទំាងអស់ចូលរួមថែរក្សាព្រៃសហគមន៍នេះ ដើម្បីជាផលប្រយោជន៍សម្រាប់ដល់បងប្អូនដែលទទួលផលពីអនុផលព្រៃសហគមន៍នេះ ដោយមិនត្រូវឱ្យជនណាម្នាក់ ឆ្លៀតឱកាសទាញយកផលប្រយោជន៍ផ្សេងៗពីព្រៃសហគ​មន៍ ដូចជាការកាប់ដីព្រៃនេះធ្វើជាកម្មសិទ្ធិឯកជន ឬលក់ទៅឱ្យឈ្មួញជាដាច់ខាត។ ទន្ទឹមនោះដែរ លោកបានផ្តាំផ្ញើរដល់បងប្អូន ត្រូវចៀសឱ្យឆ្ងាយពីគ្រឿងញៀនត្រូវចូលរួមគ្នាគោរពច្បាប់ចរាចរណ៍ទំាងអស់គ្នា ជាពិសេសអ្នកបើកបរម៉ូតូត្រូវពាក់មួកសុវត្ថិភាពឲ្យបានគ្រប់គ្នាដើម្បីសុវត្ថិភាពខ្លួនឯងនិងចំពោះអ្នកដែលជាទីស្រឡាញ់ផងដែរ។

លោក សុខន រិទ្ធិគុណ បានមានប្រសាសន៍លើកឡើងថា ការចែកគ្រាប់ពូជបន្លែ និងស្បៃបៃ​តងនេះ ជាលើកទី២ សម្រាប់ប្រជាពលរដ្ឋសហគមន៍ឃុំងននេះ ដូច្នេះសូមបងប្អូនប្រជាកសិ​ក​រទំាងអស់ត្រូវទុកដាក់គ្រាប់ពូជបន្លែនេះឱ្យបានត្រឹមត្រូវ មិនត្រូវយកទៅទុកចោលនាំឱ្យខូចគុណភាព ឬយកទៅលក់នៅលើទីផ្សារឡើយ។ ជាមួយគ្នានោះដែរ លោក បានជំរុញដល់ប្រជាកសិករទំាងអស់ ត្រូវនាំធ្វើការដាំដុះគ្រាប់ពូជបន្លែនេះ ទៅតាមលក្ខណៈបច្ចេកទេសកសិ​កម្មឱ្យបានគ្រប់ៗគ្នា ព្រោះវាអាចធ្វើឲ្យជីវភាពបងប្អូនអាចរកប្រាក់ចំណូលនិងជួយសម្រួលដល់ជីវភាពប្រជាកសិករនៅតាមសហគមន៍ឱ្យមានជីវភាពធូធារច្រើនជាងមុន ក្នុងនោះ ១គ្រួសារទទួលបាន ១). គ្រាប់ស្ពៃក្រញាញ់ ១កំប៉ុង ២). គ្រាប់ស្ពៃខ្មៅ ២កំប៉ុង ៣). គ្រាប់ស្ពៃចង្កឹះ ២កំប៉ុង ៤). គ្រាប់សណ្តែកគួរ ២កំប៉ុង ៥). គ្រាប់ឆៃថាវ ១កំប៉ុង ៦). គ្រាប់ត្រកួន ១គីឡូ​ក្រាម ៧) គ្រាប់ត្រសក់ ៣កញ្ចប់ និងស្បៃបៃតង ១ដុំ។

បន្ទាប់មក លោកអភិបាលខេត្តនិងលោករដ្ឋលេខាធិការ រួមទាំងក្រុមការងារ បានបន្តដំណើរទៅទស្សនាការចិញ្ចឹមសត្វ និងដំណាំរបស់ប្រជាកសិករដែលបានធ្វើការដាំដុះកន្លងមក៕