ខេត្តបាត់ដំបង​ រៀបចំពិធី​ក្រុងពិលី​ បញ្ចុះបឋមសិលា​ សាងសង់​អគារសាលាឃុំជ្រៃ​

បាត់ដំបង៖ នៅថ្ងៃសុក្រ ០៤រោច ខែបុស្ស ឆ្នាំរកា នព្វស័ក ព.ស២៥៦១ ត្រូវនិងថ្ងៃទី០៥ ខែមករា ឆ្នាំ២០១៨ លោក ងួន រតនៈ អភិបាលនៃគណៈអភិបាលខេត្តបាត់ដំបង បានអញ្ជើញចូលរួមក្នុងពិធីក្រុងពិលី បញ្ចុះបឋមសិលា សាងសង់អគារសាលាឃុំជ្រៃ ដែលជាអំណោយដ៏ថ្លៃថ្លា របស់លោកឧបនាយករដ្ឋមន្ត្រី ស ខេង និងភរិយា។ ពិធីនេះបានធ្វើឡើង ក្រោមអធិបតីភាពលោក អ៊ុក គឹមលេក រដ្ឋលេខាធិការក្រសួងមហាផ្ទៃ តំណាងលោកឧបនាយករដ្ឋមន្ត្រី ស ខេង រដ្ឋមន្រ្តីក្រសួងមហាផ្ទៃ នៅទីតាំងសាលាឃុំចាស់ ស្ថិតក្នុងភូមិក្បាលខ្មោច ឃុំជ្រៃ ស្រុកថ្មគោល ខេត្តបាត់ដំបង។

ក្នុងពិធីនេះ ក៏មានការអញ្ជើញចូលរួមពីសមាជិកក្រុមប្រឹក្សាខេត្ត ក្រុមប្រឹក្សាស្រុក គណៈអភិបាលស្រុក ក្រុមប្រឹក្សាឃុំ ប្រជាពលរដ្ឋ និងសិស្សានុសិស្ស។ សមិទ្ធផលថ្មីនេះ បានឆ្លុះបញ្ចាំងឲ្យឃើញពីការខិតខំប្រឹងប្រែង យកចិត្តទុកដាក់របស់ប្រមុខរាជរដ្ឋាភិបាល ក្នុងការផ្តល់សេវាសាធារណៈ ឲ្យកាន់តែកៀកជិតប្រជាពលរដ្ឋ ដើម្បីបន្តវឌ្ឍនៈភាព នូវកម្មវិធីជាតិ សម្រាប់ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិ៕