កំពង់ផែភ្ញៀវទេសចរណ៍ថ្មីមួយ ដែលជាជំនួយរបស់ធនាគារអភិវឌ្ឍន៍អាស៊ី
ដែលស្ថិតនៅក្នុងខេត្តកំពត គ្រោងសាងសង់នៅចុងឆ្នាំនេះ
ដើម្បីពង្រីកការធ្វើពិពិធកម្មនៃការមកដល់របស់ភ្ញៀវទេសចរណ៍ពីតាមបណ្តាប្រទេសក្នុងតំបន់។
លោក ថោង ខុន រដ្ឋមន្ត្រីក្រសួងទេសចរណ៍
បានមានប្រសាសន៍ប្រាប់អ្នកសារព័ត៌មាននៅថ្ងៃទី០៥ ខែកញ្ញា ឆ្នាំ២០១៧នថា
កំពងផែទេសចរណ៍ថ្មីនេះ នឹងចាប់ផ្តើមសាងសង់នៅចុងឆ្នាំនេះ
និងគ្រោងបញ្ចប់នៅចុងឆ្នាំ២០១៩ ឬដើមឆ្នាំ ២០២០ខាងមុខ។ កំពង់ផែនេះ
នឹងជួយរួមចំណែកទាក់ទាញភ្ញៀវទេសចរ ពីតាមបណ្តាប្រទេសក្នុងតំបន់
ពិសេសប្រទេសវៀតណាម និងប្រទេសថៃ តាមរយៈការភ្ជាប់ការធ្វើដំណើរតាមផ្លូវទឹក
តាមកប៉ាលលឿន ឬកប៉ាលទេសចរណ៍ខ្នាតធំ។
លោក បន្តថា កំពង់ផែនេះ ជាផ្នែកមួយនៃជំនួយរបស់ធនាគារអភិវឌ្ឍន៍អាស៊ី
តាមរយៈក្របខ័ណ្ឌនៃបណ្តាប្រទេសក្នុងអនុតំបន់ទន្លេមេគង្គ
នៃច្រករបៀងភាគខាងត្បូង។ ក្នុងគម្រោងសាងសង់ផែនេះ មានទីតាំងក្នុង ភូមិជំគ្រាល
ឃុំជំគ្រាល ស្រុកទឹកឈូ ខេត្តកំពត។
លោកថោង ខុន បានបន្តទៀតថា ការសាងសង់ផែទេសចរណ៍នេះ
គ្រោងចំណាយថវិកា១០លានដុល្លារ នៃជំនួយ១៨លានដុល្លារជាជំនួយពីADB
ដែលផ្នែកផ្សេងទៀតនៃថវិកានេះ នឹងជួយលើការសាងសង់ផែក្តាម នៅខេត្តកំពត
និងគំរោងអភិវឌ្ឍដទៃទៀត។
លោកបានបញ្ជាក់ថា ទំហំវិសាលភាពនៃកំពង់ផែភ្ញៀវទេសចរណ៍នេះ
នឹងមានលទ្ធភាពអាចឲ្យភ្ញៀវទេសចរណ៍ឆ្លងកាត់បានចំនួន១,៥លាននាក់ក្នុង១ឆ្នាំ។
ក្នុងគម្រោងសាងសង់នេះ
នឹងផ្ដល់ផលប្រយោជន៍ជាច្រើនដល់តំបន់ទេសចរណ៍ជាច្រើនផ្សេងទៀតផងដែរដោយក្នុងនោះវាអាចបង្កភាពងាយស្រួលដល់ភ្ញៀវទេសចរណ៍
ដែលមានបំណងចង់បន្តដំណើរពីតំបន់មួយ
ទៅតំបន់មួយទៀតដូចជាពីខេត្តកំពតទៅភ្នំបូកគោខេត្តព្រះសីហនុ និងខេត្តសៀមរាប ៕
No comments:
Post a Comment