នៅថ្ងៃទី២៧ ខែមីនា ឆ្នាំ២០១៧នេះ លោក កែវ រ៉េមី រដ្ឋលខាធិការទីស្តីការគណៈរដ្ឋមន្រ្តី និងជាប្រធានគណៈកម្មាធិការសិទ្ធិមនុស្សកម្ពុជា បានថ្លែងថា របាយការណ៍របស់សមាជិកសភាអាស៊ានដើម្បីសិទ្ធិមនុស្ស (APHR) ស្តីពី «លទ្ធិប្រជាធិបតេយ្យ និងសិទ្ធិមនុស្សនៅកម្ពុជា» កាលពីថ្ងៃទី២០ ខែមីនា ឆ្នាំ២០១៧ ពុំបានឆ្លុះបញ្ចាំងពីការយល់ឃើញរបស់អាស៊ានឡើយ។ លោក បានថ្លែងដូចនេះ នៅក្នុងសន្និសីទសារព័ត៌មាន នាព្រឹកថ្ងៃទី២៧ ខែមីនា នេះ នៅទីស្នាក់ការគណៈកម្មាធិការសិទ្ធិមនុស្សកម្ពុជា។
លោក កែវ រ៉េមី បានបញ្ជាក់ថា ក្រសួងការបរទេសកម្ពុជា បានចេញសេចក្តីថ្លែងការណ៍ប្រតិកម្មនឹង របាយការណ៍របស់សមាជិកសភាអាស៊ានដើម្បីសិទ្ធិមនុស្ស (APHR) ដោយដាក់ចំណងជើងថា «ការវាយប្រហារសមាជិកសភា និងការគំរាមកំហែងស្ថាប័នកម្ពុជា គឺជាសំឡេងជួងមរណៈសម្រាប់ប្រជាធិបតេយ្យនៅកម្ពុជា» ផងដែរ ប៉ុន្តែលោក Charl Santiago ដែលជាសមាជិកសភានៃប្រទេសម៉ាឡេស៊ី និងជាប្រធាននៃក្រុមនេះ បែរជាលើកឡើងដោយគឃ្លើនថារាជរដ្ឋាភិបាលទទួលស្គាល់ការពិតទៅវិញ។
លោកប្រធានគណៈកម្មាធិការសិទ្ធិមនុស្សកម្ពុជា ក៏បានបញ្ជាក់ថា សិទ្ធិមនុស្សពុំមានស្តង់ដារ រួមណាមួយនោះឡើយ គឺអាស្រ័យលើវប្បធម៌ ប្រពៃណី ទំនៀមទម្លាប់ សេដ្ឋកិច្ចរបស់ប្រទេស នីមួយៗមិនអាចប្រៀបធៀបបាននោះឡើយ។
ពាក់ព័ន្ធនឹងបញ្ហាប្រជាធិបតេយ្យ និងសិទ្ធិមនុស្ស លោក កែវ រ៉េមី បានលើកឡើងថា មានទំនាក់ទំនងគ្នាយ៉ាងជិតស្និទ ហើយកម្ពុជា បាននិងកំពុងអនុវត្តយ៉ាងល្អកន្លងមក ដូចជា៖ ១-កម្មវិធីសមធម៌របស់ UNDP នៅក្នុងយុទ្ធនាការឃោសនាបោះឆ្នោត ២-កម្មវិធីពិភាក្សាដេញដោលពាក់ព័ន្ធនឹងគោលនយោបាយរបស់បក្សនានាដែលរៀបចំដោយអង្គការ NDI និង IRI ៣- កម្មវិធីរបស់គណៈកម្មាធិការជាតិរៀបចំការបោះឆ្នោត ដោយអនុញ្ញាតឱ្យមានកម្មវិធីតុមូល បញ្ចេញគំនិតពីគ្រប់បក្សនយោបាយ ៤- កម្ពុជា អនុញ្ញាតឱ្យមានសារព័ត៌មានបរទេសដូចជា RFA, VOA, RFI, Phnom Penh Post, The Cambodian Daily ជាដើម៕
No comments:
Post a Comment