រដ្ឋាភិបាលចិនកាលពីថ្ងៃអង្គារបានរិះគន់សេចក្តីសម្រេចរបស់ប្រធានាធិបតីអាមេរិក Donald Trump ដែលបានដាក់ឈ្មោះទីក្រុងប៉េកាំងថាជាគូប្រកួតយុទ្ធសាស្រ្ត និងបានអំពាវនាវដល់ទីក្រុងវ៉ាស៊ីនតោនឱ្យបោះបង់ចោលនូវចិត្តសាស្រ្តសង្រ្គាមត្រជាក់ និងទទួលយកនូវការកើនឡើងរបស់របស់ចិន។
ទីភ្នាក់ងារសារព័ត៌មាន Xinhua ផ្លូវការបាននិយាយថា សេចក្តីសម្រេចរបស់លោក Trump បានឆ្លុះបញ្ចាំងពីជ័យជំនះរបស់ពួកក្បាលរឹងនៅក្នុងរដ្ឋបាលរបស់គាត់។ ចិនបានព្រមានពីទំនាក់ទំនងសេដ្ឋកិច្ចអាមេរិក-ចិនទំនងជាប្រឈមនឹងសម្ពាធ និងបញ្ហាប្រឈមកាន់តែច្រើនទៀត។
អ្នកនាំពាក្យក្រសួងការបរទេសចិន លោកស្រី Hua Chunying បាននិយាយថា «យើងបានទទូចឱ្យអាមេរិកបញ្ឈប់ការបំភ្លៃដោយចេតនាចំពោះបំណងជាយុទ្ធសាស្រ្តរបស់ចិន និងបោះបង់ចោលនូវចិត្តសាស្រ្តសង្រ្គាមត្រជាក់។ បើមិនដូច្នោះទេ វានឹងធ្វើឱ្យប៉ះពាល់អ្នកដទៃ និងបំផ្លាញខ្លួនឯង»។
កាលពីថ្ងៃចន្ទ របាយការណ៍របស់លោក Trump បានវាយប្រហារជាច្រើនទៅលើចំណុចរសើបរបស់ចិន។ វាបានបញ្ជាក់ពីទំនាក់ទំនងជាមួយនឹងកោះតៃវ៉ាន់ដែលចិនដីគោកអះអាងថា ជាទឹកដីរបស់ខ្លួន និងបានសន្យាថា នឹងធ្វើឱ្យសម្ព័ន្ធមិត្តរបស់យើងខ្លាំងក្លាឡើងវិញជាមួយនឹងរដ្ឋាភិបាលមួយចំនួននៅតំបន់អាស៊ីអាគ្នេយ៍ ដែលមានប្រទេសខ្លះមានជម្លោះជាមួយនឹងចិនផងដែរពាក់ព័ន្ធនឹងដែនអធិបតេយ្យនៅសមុទ្រចិនខាងត្បូង។
អាមេរិក និងចិនបានចែករំលែកនូវទំនាក់ទំនងពាណិជ្ជកម្មធំបំផុតនៅលើពិភពលោក និងធ្វើសហប្រតិបត្តិការលើវិស័យមួយចំនួនចាប់ពីថាមពលស្អាតរហូតដល់សុខភាពសាធារណៈ។ ប៉ុន្តែទីក្រុងប៉េកាំងចាត់ទុកទីក្រុងវ៉ាស៊ីនតោនថាជាឧបសគ្គចំពោះមហិច្ឆតារបស់ខ្លួនដើម្បីក្លាយខ្លួនជាមហាអំណាចនៅតំបន់អាស៊ីបូព៌ា និងមានបញ្ហារកាំរកូសលើបញ្ហាកោះតៃវ៉ាន់ គោលនយោបាយពាណិជ្ជកម្ម បច្ចេកវិទ្យា និងសមុទ្រចិនខាងត្បូងដែលកំពុងតែតានតឹងឡើង។
ស្ថានទូតចិនប្រចាំទីក្រុងវ៉ាស៊ីនតោនបាននិយាយនៅក្នុងសេចក្តីថ្លែងការណ៍ថា «គឺវាអាត្មានិយមដែលដាក់ផលប្រយោជន៍ជាតិរបស់អ្នកលើផលប្រយោជន៍របស់ប្រទេសដទៃ និងផលប្រយោជន៍ទៅវិញទៅមករបស់សហគមន៍អន្តរជាតិ»។
សេចក្តីថ្លែងការណ៍ដដែលបាននិយាយថា «ភាគីចិនមានឆន្ទះធ្វើឱ្យមានសន្តិសហវិជ្ជមានជាមួយនឹងប្រទេសទាំងអស់។ អាមេរិកគួរតែសម្របខ្លួន និងទទួលយកនូវការអភិវឌ្ឍរបស់ចិន»។
មន្រ្តីអាមេរិកមិនសប្បាយអំពីការវាតទីយោធានិយមកាន់តែកើនឡើងរបស់ចិន ឈរលេខរៀងទី២ ខ្ពស់បំផុតបន្ទាប់ពីអាមេរិក។ ពួកគេមើលឃើញកម្មវិធីគំនិតផ្តួចផ្តើមផ្លូវមួយ ខ្សែក្រវ៉ាត់មួយរបស់ប្រធានាធិបតី Xi Jinping ដែលជាគម្រោងមួយដើម្បីសាងសង់ផ្លូវដែក និងហេដ្ឋារចនាសម្ព័ន្ធផ្សេងទៀតឆ្លងកាត់ប្រទេសមួយចំនួនពីអាស៊ីរហូតដល់អឺរ៉ុប និងអាហ្រ្វិក គឺជាកិច្ចខិតខំប្រឹងប្រែងដើម្បីលុបបំបាត់ឥទ្ធិពលរបស់អាមេរិក និងថែរក្សានូវរចនាសម្ព័ននយោបាយដែលផ្តោតសំខាន់លើចិន។
បញ្ហារសើបបំផុតនោះ គឺតៃវ៉ាន់ ជាកោះប្រជាធិបតេយ្យដែលទីក្រុងប៉េកាំងបានប្រកាសថា ជាផលប្រយោជន៍ស្នូលដែលខ្លួននឹងធ្វើសង្រ្គាម ប្រសិនបើចាំបាច់។
របាយការណ៍របស់លោក Trump បានសន្យាថានឹងរក្សានូវទំនាក់ទំនងរបស់យើងឱ្យបានរឹងមាំជាមួយនឹងកោះតៃវ៉ាន់ និងផ្តល់នូវតម្រូវការការពារស្របច្បាប់របស់ខ្លួន»៕
ប្រភព: AP ចុះថ្ងៃទី២១ ខែធ្នូ ឆ្នាំ២០១៧
No comments:
Post a Comment