(មានវីដេអូ) អ្នកវិភាគនយោបាយអន្តរជាតិថ្លែងថា សហភាពអឺរ៉ុបត្រូវរៀនសូត្រពីកំហុសអតីតកាលចំពោះកម្ពុជា

លោក Raoul-Marc Jenna អ្នកវិភាគនយោបាយអន្តរជាតិ ក្នុងបទសម្ភាសន៍ជាមួយសារព័ត៌មាន ថ្មីថ្មី បានបញ្ជាក់ថាលោកមិនចង់ឱ្យសហរដ្ឋអាមេរិក ក៏ដូចជាសហគមន៍អឺរ៉ុបបញ្ឈប់ការអនុគ្រោះពន្ធនាំចូលចំពោះប្រទេសកម្ពុជាឡើយ ហើយលោកចង់ឱ្យសហភាពអឺរ៉ុបត្រូវរៀនសូត្រពីកំហុសអតីតកាលចំពោះកម្ពុជាព្រោះការសម្រេចចិត្តបែបនេះ គ្មានអ្វីក្រៅពីធ្វើឱ្យប្រជាជនកម្ពុជារងទុក្ខ និងរារាំងដល់ដំណើរការអភិវឌ្ឍរបស់ប្រទេសកម្ពុជាតែប៉ុណ្ណោះ។

អ្នកវិភាគនយោបាយអន្តរជាតិរូបនេះ បានបន្ថែមថា លោកមិនចង់ឱ្យសហភាពអឺរ៉ុបដាក់ទណ្ឌកម្មណាមួយឡើយមកលើកម្ពុជា ហើយត្រូវចាប់ផ្តើមការសន្ទនាបែបស្ថាបនាដើម្បីដឹងថា តើប្រជាធិបតេយ្យបែបណាសម្រាប់កម្ពុជាដែលខ្លួនចង់បាន ដែលវាមិនមាននៅក្នុងប្រទេសណាមួយសោះនៅអាស៊ី។

លោក Raoul-Marc Jenna ក៏បានបញ្ជាក់ថា ប្រជាធិបតេយ្យមិនអាចកំណត់បានភ្លាមៗក្នុងមួយថ្ងៃឬពីរថ្ងៃបាននោះទេ ពោលគឺត្រូវមានអ្នកយល់ដឹងពីលទ្ធិប្រជាធិបតេយ្យច្រើននៅក្នុងជួរគណបក្សកាន់អំណាច និងគណបក្សប្រឆាំង។ លោកបង្ហាញការសោកស្តាយថា កម្ពុជាមានគណបក្សប្រឆាំងមួយដែលមិនបានប្រព្រឹត្តខ្លួនតាមបែបប្រជាធិបតេយ្យដោយមិនគោរពបុគ្គលឬស្ថាប័នឡើយ៕