ខេត្តស្វាយរៀង រៀបចំសិក្ខាសាលាសមាហរណកម្មផែនការឃុំ ថ្នាក់ស្រុក ដើម្បីអភិវឌ្ឍមូលដ្ឋានប្រកបដោយប្រសិទ្ធភាព

ស្វាយរៀង៖ រដ្ឋបាលស្រុកចន្រ្ទា ខេត្តស្វាយរៀង នៅថ្ងៃព្រហស្បតិ៍ ៤កើត ខែបុស្ស ឆ្នាំរកា ព.ស.២៥៦១ ត្រូវថ្ងៃទី២១ ខែធ្នូ ឆ្នាំ២០១៧ បានរៀបចំសិក្ខាសាលាសមាហរណកម្មផែនការ ឃុំ ថ្នាក់ស្រុក ក្រោមអធិបតីភាព លោក ហែម ពិសិដ្ឋ អភិបាលរងខេត្ត តំណាងលោក ម៉ែន វិបុល អភិបាលខេត្តស្វាយរៀង។

សិក្ខាសាលាសមាហរណកម្មនេះ មានការអញ្ជើញចូលរួមពីនាយករងរដ្ឋបាលខេត្ត, នាយកទីចាត់ការផែនការ និងវិនិយោគខេត្ត, ប្រធាន ឬតំណាងមន្ទីរនានាជុំវិញខេត្ត, ប្រធានក្រុមប្រឹក្សាស្រុក, អភិបាល និងអភិបាលរងស្រុក, អង្គការសង្គមស៊ីវិល, ប្រធាន អនុប្រធានការិយាល័យចំណុះ និងជំនាញជុំវិញស្រុក, តំណាងមកពីមណ្ឌលសុខភាព, មេឃុំ, ស្មៀនឃុំ, ព្រមទាំងជនបង្គោលទទួលបន្ទុកស្រ្តី និងកុមារឃុំផងដែរ។

លោក ហែម ពិសិដ្ឋ បានលើកឡើងថា សិក្ខាសាលាសមាហរណកម្មផែនការឃុំ ថ្នាក់ស្រុក គឺជាគម្រោងសកម្មភាពជាអាទិភាព ស្នើឡើងដោយឃុំនីមួយៗ នៃស្រុកចន្ទ្រា ដែលមានភាពស៊ីសង្វាក់ប្រទាក់ក្រឡាគ្នា ទៅនឹងគោលនយោបាយយុទ្ធសាស្ត្រ និងសកម្មភាពនានា របស់បណ្ដាមន្ទីរ-អង្គភាពជំនាញ និងអង្គការមិនមែនរដ្ឋាភិបាល ក្នុងគោលដៅ ឈានទៅសម្រេចបាន នូវការអភិវឌ្ឍមូលដ្ឋាន ប្រកបដោយប្រសិទ្ធភាព ឆ្លើយតបទៅនឹងតម្រូវការជាក់ស្ដែង ពិតប្រាកដរបស់ប្រជាពលរដ្ឋ៕