អង្គប្រជុំពេញអង្គគណៈរដ្ឋមន្រ្តី បានសម្រេចឱ្យក្រសួងកសិកម្ម រុក្ខាប្រម៉ាញ់ និងនេសាទ យកសេចក្តីព្រាងកម្មវិធីសកម្មភាពជាតិធ្វើការកែសម្រួលឡើងវិញ អោយបានពេញលេញ ដើម្បីឱ្យស្របទៅតាមសក្តានុពលដីកសិកម្មដែលមាន និងតម្រូវការអភិវឌ្ឍជាក់ស្តែងរបស់ព្រះរាជាណាចក្រកម្ពុជាក្នុងវិស័យកសិកម្ម។ ដោយឡែកសម្រាប់គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ ត្រូវបានអនុម័ត ដោយគណៈរដ្ឋមន្រ្តី កាលពីថ្ងៃទី០៦ ខែមីនា ឆ្នាំ២០១៥ និងត្រូវបានប្រកាសដាក់ឱ្យអនុវត្តជាផ្លូវការ នៅថ្ងៃទី២៦ ខែសីហា ឆ្នាំ២០១៥ ដែលជាមគ្គុទេ្ទសក៍ផងដែរដើម្បីជំរុញការអភិវឌ្ឍវិស័យឧស្សាហកម្មនៅកម្ពុជា ដែលនឹងរួមចំណែកដល់ការរក្សាកំណើនសេដ្ឋកិច្ចខ្ពស់ប្រកបដោយចីរភាព និងបរិយាប័ន្ន តាមរយៈការធ្វើពិពិធកម្មសេដ្ឋកិច្ច ការពង្រឹងភាពប្រកួតប្រជែង និងការលើកកម្ពស់ផលិតភាព។
ចក្ខុវិស័យនៃគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ នេះ គឺជំរុញកែប្រែ និងធ្វើទំនើបកម្មរចនាសម្ព័ន្ធឧស្សាហកម្មកម្ពុជា ពីឧស្សាហកម្មអតិពលកម្មឈានទៅឧស្សាហកម្មផ្អែកលើជំនាញត្រឹមឆ្នាំ២០២៥ ដោយខិតខំសម្រេចគោលដៅបីសំខាន់ គឺ៖ទី១-បង្កើនចំណែកនៃវិស័យឧស្សាហកម្ម ជាពិសេសវិស័យកម្មន្តសាល ក្នុងផលិតផលក្នុងស្រុកសរុប, ទី២-ជំរុញពិពិធកម្មមុខទំនិញនាំចេញក្រៅពីសម្លៀកបំពាក់ និងការនាំចេញកសិផលកែច្នៃ, និងទី៣- គាំទ្រដល់សហគ្រាសធុនតូច និងមធ្យម។ ដើម្បីសម្រចបាននូវចក្ខុវិស័យ និងគោលដៅខាងលើនេះ រាជរដ្ឋាភិបាលបានដាក់ចេញនូវយុទ្ធសាស្រ្តគន្លឹះបួន៖ ទី១-ការកៀរគរ និងទាក់ទាញវិនិយោគផ្ទាល់ពីបរទេស និងវិនិយោគឯកជនក្នុងស្រុក ទី២- ការអភិវឌ្ឍ និងធ្វើទំនើបកម្មសហគ្រាសធុនតូច និងមធ្យម, ទី៣- ការកែលម្អបរិស្ថាននិយតកម្មដើម្បីពង្រឹងភាពប្រកួតប្រជែង និងទី៤-ការសម្របសម្រួលគោលនយោបាយគាំទ្រ។
ប្រមុខរាជរដ្ឋាភិបាលកម្ពុជា ក៏បានណែនាំ និងជំរុញថ្នាក់ដឹកនាំ ក្រសួងស្ថាប័នថ្នាក់ជាតិ និងអាជ្ញាធរថ្នាក់ក្រោមជាតិ ដាច់ខាតបន្ត និងខិតខំអនុវត្តកម្មវិធីកំណែទម្រង់ នៅចុងអាណត្តិទី៥ នៃរដ្ឋសភារបស់រាជរដ្ឋាភិបាលតាមរយៈទិសស្លោក «ឆ្លុះកញ្ចក់ ងូតទឹក ដុសក្អែល ព្យាបាល» ឱ្យមានប្រសិទ្ធភាព និងទទួលបានជោគជ័យថែមទៀត។ នៅចុងបញ្ចប់ លោកក៏បានថ្លែងអំណរគុណ កោតសរសើរ ដល់មន្រ្តីរាជការ កងកំលាំងប្រដាប់អាវុធគ្រប់ប្រភេទ ដែលបានខិតខំបំរើការងារ ដើម្បីសុខសន្តិភាព និងការអភិវឌ្ឍប្រទេសជាតិ អស់រយៈពេលពេញមួយឆ្នាំ២០១៧ និងជូនពរសុខភាពល្អ សិរីសួសួរស្តី សុខភមង្គលក្នុងគ្រួសារក្នុងឱកាសបុណ្យចូលឆ្នាំថ្មី ឆ្នាំសកល ២០១៨ ខាងមុខនេះផងដែរ។
គួរបញ្ជាក់ថា កិច្ចប្រជុំពេញអង្គគណៈរដ្ឋមន្រ្តីនេះគឺដើម្បីឆ្លង៖ ១- សេចក្តីព្រាងកម្មវិធីសកម្មភាពជាតិដើម្បីប្រយុទ្ធប្រឆាំងនឹងឱនភាពដីឆ្នាំ ២០១៧-២០២៦ ២ សេចក្តីព្រាងរបាយការណ៍ស្តីពីវឌ្ឍនភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ និង៣- បញ្ហាផ្សេងៗ៖ សំណើសុំការយល់ព្រមពីគណៈរដ្ឋមន្រ្តីដើម្បីសុំសច្ចាប័នពីស្ថាប័ននីតិបញ្ញត្តិលើកិច្ចព្រមព្រៀងពាណិជ្ជកម្ម សេវាកម្មក្រោមកិច្ចព្រមព្រៀងក្របខ័ណ្ឌស្តីពីសហប្រតិ បត្តិការសេដ្ឋកិច្ចទូលំទូលាយរវាងសមាគមប្រជាជាតិអាស៊ីអាគ្នេយ៍ និងសាធារណរដ្ឋឥណ្ឌា៕
No comments:
Post a Comment