កាកបាទក្រហមកម្ពុជាសម្ពោធឱ្យប្រើប្រាស់អណ្តូងចំនួន១៩ ជូនដល់ប្រជាពលរដ្ឋចំនួន ៣២៣គ្រួសារនៅខេត្តកំពត

នៅថ្ងៃទី២១ ខែធ្នូ ឆ្នាំ២០១៧ កាកបាទក្រហមកម្ពុជា​ (កក្រក) ដែលមានលោកស្រី ប៊ុន រ៉ានី ហ៊ុនសែន ជាប្រធាន បានសម្ពោធឱ្យប្រើប្រាស់ជាផ្លូវការអណ្តូងទឹកស្អាតចំនួន១៩ (មានលេខរៀងចាប់ពី ៦៨ ដល់លេខរៀងទី ៨៦) ជូនប្រជាជនខ្វះខាតទឹកប្រើប្រាស់ចំនួន៣២៣គ្រួសារ ស្មើនឹងមនុស្ស ១.៦១៥នាក់ រស់នៅក្នុងឃុំចំនួន​៨​ ស្រុកចំនួន​៥​ នៃខេត្តកំពត​ដែលពិធីនេះធ្វើនៅភូមិដំណាក់ត្រយឹង ឃុំសំរោងលើ ស្រុកបន្ទាយមាស ខេត្តស្ទឹងកំពត។ ពិធីនេះមានការអញ្ជើញចូលរួមពី​ លោកស្រី​ ម៉ែន​ នារីសោភ័គ​ អគ្គលេខាធិការរងទី​ ១​ កក្រក​ និងលោក​ ចាន់​ តេស្តា​ ប្រធានកិត្តិយសសាខាកក្រកខេត្តកំពត​ព្រមទាំងថ្នាក់ដឹកនាំ-មន្ត្រី​-យុវជន​កក្រក​ និងប្រជាពលរដ្ឋចូលរួមអបអរសាទរជាច្រើននាក់។

ក្នុងឱកាសនោះ លោកស្រីអគ្គលេខាធិការរងទី​១ បានពាំនាំប្រសាសន៍​ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ​ក្តីនឹករលឹកជូនប្រជាពលរដ្ឋ និងសូមផ្តាំផ្ញើឱ្យយកចិត្តទុកដាក់ថែទាំសុខភាពឱ្យបានល្អ មានអនាម័យក្នុងការរស់នៅ​ គោរពច្បាប់ចរាចរណ៍ឱ្យបានខ្ជាប់ខ្ជួន​ ចូលរួមលុបបំបាត់គ្រឿងញៀន​ អំពើហិង្សា​ ដើម្បីលើកកម្ពស់គោលនយោបាយភូមិ-ឃុំមានសុវត្ថិភាព។​ ជាមួយគ្នានេះ​ សូមចូលរួមថែរក្សា​ ការពារ​ អណ្តូងទាំងនេះ​ ទុកជាផលប្រយោជន៍រួមគ្នាសម្រាប់សហគមន៍​ឱ្យបានគង់វង្សយូរអង្វែង។

ជាមួយនឹង​អំណោយក្នុងម្នាក់ៗ​ សារុង​ ១​ ក្រមា​ ១​ និងថវិកា​ ១ម៉ឺន​រៀល​ ប្រជាពលរដ្ឋប្រមាណ​ ២០០នាក់​ បានសំដែងនូវក្តីរំភើប​រីករាយដោយបានការយកចិត្តទុកដាក់ពី​លោកស្រី​ ប៊ុន​ រ៉ានី​ ហ៊ុនសែន​ ជួយដោះស្រាយបញ្ហាទឹកស្អាតជូនប្រជាពលរដ្ឋ​ខ្វះខាតទឹកប្រើប្រាស់​ ហើយដែលពួកគាត់មិនពិបាកទៅរែកទឹកនៅឆ្ងាយផ្ទះ​ដូចមុនទៀតឡើយ។

សូមបញ្ជាក់ថា​ គិតចាប់តាំងពីឆ្នាំ ២០១០មក​ កាកបាទក្រហមកម្ពុជាបានដោះស្រាយបញ្ហាទឹកស្អាតជូនប្រជាពលរដ្ឋរាប់ម៉ឺនគ្រួសារនៅទូទាំងប្រទេស ក្នុងនោះបានផ្តល់អណ្តូងទឹកស្អាត (អណ្តូងស្នប់-លូចំរុះ) ស្រះទឹកសហ​គមន៍ និងស៊ីទែនទឹកបានសរុបចំនួនរាប់ពាន់អណ្ដូង​ ហើយបាន​ និងកំពុងផ្តល់ជូនប្រជាពលរដ្ឋជាបន្តបន្ទាប់ទៀត។​ ដោយឡែក​ សម្រាប់ខេត្តកំពត បា​នទទួលអណ្តូងសរុបចំនួន៨៦អណ្តូង៕