នៅក្នុងប្រវត្តិសាស្រ្ដកម្ពុជា ប្រទេសនេះមិនមែនជាប្រទេសដេលគ្មានផលិតផលក្នុងស្រុកសម្រាប់ការឆ្លើយតបទៅនឹងទស្សនៈទានរបស់ចលនាភូមិមួយផលិតផលមួយនោះទេ

ជាការពិតនៅក្នុងប្រវត្តិសាស្រ្ដកម្ពុជា ប្រទេសនេះមិនមែនជាប្រទេសដែលគ្មានផលិតផលក្នុងស្រុកសម្រាប់ ការឆ្លើយតបទៅនឹងទស្សនៈទាន របស់ចលនាភូមិមួយផលិតផលមួយនោះទេ ប្រជាជនកម្ពុជាបានផលិតនូវផលិតផលផ្សេងៗជាច្រើនមុខប្រកបដោយភាពកែច្នៃ បង្កើតថ្មី តាមបែបបុរាណនិងតាមបែបសម័យ នៅតាមភូមិ ឃុំនានា ជាយូរយារណាស់មកហើយ ចាប់តាំពីសម័យដូនតារបស់យើង រហូតមកដល់សម័យកាលនេះ ហើយផលិតផលទាំងនោះក៍បានឆ្លុះបញ្ចាំងពីលក្ខណៈភូមិសាស្រ្ដភូមិ ឃុំ ស្រុក ខេត្តនានា នៅក្នុងព្រះរាជាណាចក្រកម្ពុជាផងដែរ ក្នុងនោះមានដូចជា ផលិតផលវិស័យកសិកម្មសិប្បកម្ម សេវាកម្ម និងឧស្សាហកម្ម ដោយប្រើប្រាស់ធនធានវត្ថុធាតុដើមក្នុងស្រុកដែលមានស្រាប់និងការកែច្នៃផលិតផលដើម្បីបង្កើនតម្លៃបន្ថែមសម្រាប់លក់ក្នុងទីផ្សារ ដែលនាំមកនូវចំណូលជាចំណូលសម្រាប់សេដ្ឋកិច្ចគ្រួសារ កសិករ សិប្បករ និងពាណិជ្ជករយើងផងដែរ។

នេះបើតាមប្រសាសន៍លើកឡើងរបស់ លោកឧបនាយករដ្ឋមន្រ្ដី យឹម ឆៃលី ប្រធានក្រុមប្រឹក្សាស្ដារអភិ​វឌ្ឍន៍​​វិស័យកសិកម្ម និងជនបទ តំណាងដ៍ខ្ពង់ខ្ពស់ លោកនាយករដ្ឋមន្រ្ដី ហ៊ុន សែន ថ្លែងក្នុងសិក្ខាសាលាផ្សព្វផ្សាយគោលនយោបាយជាតិស្ដីពីការជំរុញចលនាភូមិមួយផលិតផលមួយ ឆ្នាំ២០១៦-២០២៦ ដែលបានប្រារព្វធ្វើឡើងនៅអគារមិត្តភាពនៃទីស្ដីការគណៈរដ្ឋមន្រ្ដី នាព្រឹកថ្ងៃទី ៦ ខែ មេសាឆ្នាំ២០១៧។

លោកឧបនាយករដ្ឋមន្រ្ដី យឹម ឆៃលី បានមានប្រសាសន៍ទៀតថា ការរីកដុះដាលនៃសហគ្រាសខ្នាតតូចនិងមធ្យមនៅក្នុងសង្គមកម្ពុជា គឺជាសញ្ញាមួយដ៏សំខាន់ក្នុងការរួមចំណែកការអភិវឌ្ឍន៍សេដ្ឋកិច្ចជាតិ។ សហគ្រាសខ្នាតតូចនិងមធ្យម មានតួនាទីក្នុងការបំពេញបន្ថែមទៅនឹងតម្រូវការរបស់រាជរដ្ឋាភិបាលក្នុងយុទ្ធសាស្រ្ដកាត់បន្ថយភាពក្រីក្រ ក៦ ជានិរន្ដរភាពនៃការអភិវឌ្ឍសហគមន៍នៅកម្ពុជាដែលរាជរដ្ឋាភិបាលបានដាក់ចេញនូវគោលនយោបាយជាតិស្ដីពីការជំរុញចលនាភូមិមួយផលិតផលមួយ ដែលចលនានេះនឹងលើកកម្ពស់ការពឹងផ្អែកលើការច្នៃប្រឌិតរស់រវើករបស់ផលិតករ កសិករ សេវាករ និងការអភិវឌ្ឍធនធានមនុស្ស។

ទន្ទឹមនឹងនេះចលនាភូមិមួយផលិតផលមួយ បានរួមចំណែកធ្វើឱ្យសហគ្រាស​ខ្នាតតូច និងមធ្យមដែលជាវិស័យ​ឯកជនបានចូលរួមកាន់តែសកម្មលើការអភិវឌ្ឍសេដ្ឋកិច្ចជាតិ ដូចបានចែងក្នុងគោលនយោបាយអភិវឌ្ឍវិស័យឧស្សហកម្មកម្ពុជា ២០១៥-២០២៥ របស់រាជរដ្ឋាភិបាល ហើយចលនាភូមិមួយផលិតផលមួយ និងផ្ដល់​ឱ​កាសជាស្ពានទំនាក់ទំនងរវាងសហគ្រាសខ្នាតតូចនិងមធ្យមបន្ដដំណើរការនៃកិច្ចអភិវឌ្ឍន៍ ហើយលោក សង្ឃឹមថា ការជំរុញចលនាភូមិមួយផលិតផលមួយនឹងអាចឆ្លើយតបទៅនឹងបញ្ហាប្រឈមនៃការជួយលើកកម្ពស់ផលិត​ផលក្នុងស្រុកតាមរយៈការបង្កើតនូវយន្ដការសម្របសម្រួល ការរៀបចំឯកសារគតិយុត្តិឱ្យមានភាព​ទូ​លំ​ទូលាយសម្រាប់កិច្ចសហប្រតិបត្តិការរវាងវិស័យឯកជននិងវិស័យសាធារណៈរបស់រដ្ឋ៕

អត្ថបទ៖ សាវឿន