រដ្ឋមន្រ្តីវប្បធម៌បារាំង លោកស្រី Francoise Nyssen បាននិយាយថា នីតិវិធីតុលាការនឹងត្រូវបង្កើតឡើងដើម្បីបញ្ឈប់នូវការផ្សព្វផ្សាយព័ត៌មានក្លែងក្លាយ ខណៈដែលលោកស្រីបានប្រកាសដាក់ឱ្យប្រើច្បាប់ប្រឆាំងព័ត៌មានក្លែងក្លាយ។
លោកស្រី Nyssen បាននិយាយនៅក្នុងបទសម្ភាសន៍មួយជាមួយនឹងសារព័ត៌មាន Journal du Dimanche កាលពីថ្ងៃទី៤ ខែកុម្ភៈថា «វិធានការមួយចំនួនដែលយើងកំពុងតែធ្វើចាប់ពីពេលនេះរហូតដល់ខែមីនា គឺដើម្បីបង្កើតច្បាប់ស្តីពីទំនុកចិត្តលើព័ត៌មានដែលនឹងអនុញ្ញាតឱ្យយើងធ្វើសកម្មភាពឱ្យបានឆាប់រហ័ស នៅពេលដែលព័ត៌មានក្លែងក្លាយកំពុងតែសាយភាយយ៉ាងខ្លាំង ជាពិសេសក្នុងអំឡុងពេលបោះឆ្នោត»។
លោកស្រីបានបន្តថា «ច្បាប់ថ្មីនេះនឹងបង្កើតនូវការទទួលខុសត្រូវចំពោះវេទិកាព័ត៌មានផ្សេងៗគ្នា ដែលនឹងត្រូវសហការជាមួយរដ្ឋ និងធ្វើឱ្យមានតម្លាភាពទៅលើមាតិកាដែលបាននិយាយនៅក្នុងអត្ថបទរបស់ពួកគេ។ នីតិវិធីតុលាការនឹងដាក់ឱ្យអនុវត្តន៍ជាក់ស្តែង ដើម្បីអនុញ្ញាតឱ្យបិទភ្លាមៗនូវការផ្សព្វផ្សាយព័ត៌មានក្លែងក្លាយ នៅពេលដែលមានការមើលឃើញជាក់ស្តែងពីមហាជន»។
ប្រធានាធិបតីបារាំង លោក Emmanuel Macron បានស្នើច្បាប់លើកដំបូងដើម្បីទប់ទល់នឹងព័ត៌មានក្លែងក្លាយនៅក្នុងសុន្ទរថាឆ្នាំ២០១៨ របស់គាត់ទៅកាន់សារព័ត៌មាន។ សុន្ទរកថានេះត្រូវបានគេមើលឃើញថា គឺជាការនិយាយទៅដល់សារព័ត៌មាន RT និងសារព័ត៌មាន Sputnik ដែលគាំទ្រដោយទីក្រុងម៉ូស្គូ។
ទាំងសារព័ត៌មាន RT និងសារព័ត៌មាន Sputnik មានគេហទំព័រជាភាសាបារាំង ហើយក្នុងអំឡុងពេលធ្វើសន្និសីទកាសែតរួមគ្នាជាមួយនឹងសមភាគីរុស្ស៊ីរបស់គាត់ Vladimir Putin លោក Macron បានចោទប្រកាន់សារព័ត៌មានទាំងពីរនេះថា បានបោះពុម្ភផ្សាយព័ត៌មានមិនពិតដែលបង្ខូចកេរ្តិ៍ឈ្មោះ និងការឃោសនាដែលមិនស្មោះត្រង់។
សារព័ត៌មាន RT ត្រូវបានប្រកាសដាក់ឱ្យប្រើប្រាស់នៅក្នុងប្រទេសបារាំង
ចាប់តាំងពីពេលនោះមក សារព័ត៌មាន RT ដែលពីមុនមកត្រូវបានគេស្គាល់ឈ្មោះថាជា Russia Today នោះ បានប្រកាសដាក់ឱ្យប្រើប្រាស់នៅក្នុងប៉ុស្តិ៍ទូរទស្សន៍ជាភាសាបារាំង ដោយដាក់និយ័តករក្រោមការឃ្លាំមើលរបស់ពួកគេ។
លោក Macro បានឃើញឯកសារផ្ទៃក្នុងរាប់ពាន់ច្បាប់ដែលលេចធ្លាយតាមប្រព័ន្ធអ៊ីនធឺណិត ខណៈដែលមានការប្រកួតប្រជែងតំណែងប្រធានាធិបតី ដែលគាត់បានរិះគន់ថា ជាការប៉ុនប៉ងធ្វើឱ្យអស្ថិរភាពលទ្ធិប្រជាធិបតេយ្យដូចដែលគេបានមើលឃើញរួចជាស្រេចមកហើយនៅក្នុងប្រទេសអាមេរិក អំឡុងពេលធ្វើយុទ្ធនាការបោះឆ្នោតជ្រើសរើសប្រធានាធិបតីនាពេលកន្លងមក។
នេះមិនមែនជាលើកទី១ ទេ ដែលរដ្ឋាភិបាលបារាំងប៉ុនប៉ងដើម្បីប្រយុទ្ធប្រឆាំងនឹងព័ត៌មានក្លែងក្លាយតាមរយៈច្បាប់នេះ៕
ប្រភព៖ FRANCE24 ចុះថ្ងៃទី០៥ ខែកុម្ភៈ ឆ្នាំ២០១៨
No comments:
Post a Comment