ខេត្តកំពង់ឆ្នាំង​ រៀបចំកិច្ចប្រជុំ​អន្តរទីចាត់ការ​របស់សាលាខេត្ត​ ប្រចាំខែកុម្ភៈ ​សម្រាប់ឆ្នាំ២០១៨​

កំពង់ឆ្នាំង៖ នៅព្រឹកថ្ងៃច័ន្ទ ៥រោច ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៥ ខែកុម្ភៈ ឆ្នាំ២០១៨ នៅសាលាខេត្តកំពង់ឆ្នាំង បានបើកកិច្ចប្រជុំអន្តរទីចាត់ការក្រោមអធិបតីភាពលោក ហ៊ី ណាត អភិបាលរងខេត្ត ដោយមានការចូលរួមពីលោក អ៊ុន សុផល នាយករដ្ឋបាលស្ដីទីសាលាខេត្ត លោក គង់ សុវណ្ណអស្ចារ្យ នាយករងរដ្ឋបាលសាលាខេត្ត នាយក នាយករងទីចាត់ការទាំង៥ និងប្រធាន អនុប្រធានអង្គភាពទាំង២សាលាខេត្ត។

កិច្ចប្រជុំនេះត្រូវបានធ្វើឡើង ដើម្បីត្រួតពិនិត្យឡើងនូវ៖

១. អនុក្រឹត្យលេខ៥៦ អនក្រ.បក ចុះថ្ងៃទី០១ ខែមេសា ឆ្នាំ២០១៦ ស្ដីពីការគ្រប់គ្រងវត្តមានមន្ត្រីរាជការស៊ីវិល និងមន្ត្រីជាប់កិច្ចសន្យាអនុក្រឹត្យលេខ២១៧ អនុក្រ.បក ចុះថ្ងៃទី០២ ខែឧសភា ឆ្នាំ២០១៣ ស្ដីពីរបបស្ដីពីការសុំច្បាប់ និងការអនុញ្ញាតច្បាប់គ្រប់ប្រភេទរបស់មន្ត្រីរាជការស៊ីវិល នៃព្រះរាជាណាចក្រកម្ពុជា និងសេចក្ដីណែនាំលេខ០៤០ សណន ចុះថ្ងៃទី២៣ ខែធ្នូ ឆ្នាំ២០១៥ ស្ដីពីការគ្រប់គ្រងមន្ត្រីរាជការស៊ីវិលក្រសួងមហាផ្ទៃ។

២. លើកឡើងពីបញ្ហាប្រឈម សំណើ និងសំណូមពរនានាដើម្បីចាត់វិធានការដោះស្រាយ។
នៅចុងបញ្ចប់នៃកិច្ចប្រជុំ លោក ហ៊ី ណាត ប្រធានអង្គប្រជុំបានមានអនុសាសន៍ផ្ដាំផ្ញើអោយមន្ត្រីរាជការទាំងអស់មានការចូលរួមទាំងអស់គ្នា យោគយល់អធ្យាស្រ័យគ្នា ស្រឡាញ់គ្នា និងខិតខំបំពេញការងារទៅតាមតួនាទីភារកិច្ចនៅក្នុងលក្ខខណ្ឌការងារដែលមានស្រាប់ ឬក៏ដូចជាបច្ចុប្បន្នភាពថ្មី៕