អ្នកប្រើប្រាស់ Facebook ម្នាក់ រិះគន់អតីតចៅសង្កាត់អូរចារ Sin Rozeth បន្ទាប់ពីបង្ហោះសារសម្តែងតួកំសត់ ពេលបាត់បង់តំណែង

គណនី Facebook ឈ្មោះ Sothea Seng នៅថ្ងៃទី១៨ ខែវិច្ឆិកា ឆ្នាំ២០១៧ បានបង្ហោះនូវមតិយោបល់ ឆ្លើយតបទៅនឹងអតីតចៅសង្កាត់អូរចាររបស់បក្សប្រឆាំងឈ្មោះ Sin Rozeth ដែលកាលពីពេលថ្មីៗនេះបានបង្ហោះសារអមដោយរូបភាព ផ្លែផ្កា និងឌឺដង ដាក់ឱ្យអាជ្ញាធរសង្កាត់អូរចារ ក៏ដូចជាអភិបាលរងក្រុងបាត់ដំបង ដែលបានបញ្ចប់ការងាររបស់ខ្លួន បន្ទាប់ពីគណបក្សសង្គ្រោះជាតិត្រូវបានរំលាយដោយតុលាការកំពូល ពីបទក្បត់ជាតិ នៅថ្ងៃទី១៦ ខែវិច្ឆិកា ឆ្នាំ២០១៧។

Facebook ឈ្មោះ Sin Rozeth កាលពីថ្ងៃទី១៧វិច្ឆិកា បានបង្ហោះថា «ខ្ញុំសុំតែឱកាសចុងក្រោយ សរសេរសំបុត្របញ្ជាក់កំណើតជាង២០០នាក់​ ដែលនៅសល់ជូនពលរដ្ឋអូរចាររបស់ខ្ញុំក៏មិនបានដែរ ព្រោះសាលាសង្កាត់អូរចារពេលនេះ គេបានប្តូរមេសោរហើយ»។ ឈ្មោះ Sin Rozeth ថែមទាំងបានបង្ហោះសារអមដោយរូបភាពក្នុងន័យបំភ័ន្តភ្នែកគេ ឬហាក់ដូចជាចង់ប្រាប់ថាខ្លួនជាអ្នកស្រឡាញ់ប្រជាពលរដ្ឋខ្លាំងណាស់ ហើយទំនងជាគិតថាក្រៅពីខ្លួនគឺគ្មានអ្នកស្រឡាញ់ និងបំរើប្រជាពលរដ្ឋទេ។

ឆ្លើយតបនឹងការបង្ហោះផ្សាយនៅ អ្នកប្រើប្រាស់គណនី Facebook ឈ្មោះ Sothea Seng បានលើកឡើងថា «#បើប្អូនស្រីដាក់ចិត្តស្មោះដើម្បីបំរើពលរដ្ឋយ៉ាងពិតប្រាកដនោះ _មិនទាន់ហួសពេលទេ_បក្សណាក៏ដូចបក្សណាដែរបើ CPP មិនល្អដូចប្អូនស្រីគិតនោះ ម្ល៉េសប្អូនស្រីមិនមានឱកាសមកធ្វើជាចៅសង្កាត់ប្រកបដោយភាពហ៊ឺហារ ប្រើសុទ្ធតែសម្ភារៈនិយម បែបនេះដែរ។ល។
«សាកសពដែលស្លាប់ហើយ មិនអាចមានដង្ហើមទេ ហើយ សាកសពនោះក៏មិនអាចងើបមកហាត់កីឡាបានឡើយ» សំបុត្រកំណើត ត្រឹម ២០០ នាក់មិនបញ្ហាទេ CPPចាប់ផ្តើមមកតាំងពីបាតដៃទទេ រហូតដល់ពលរដ្ឋ ខ្លះមានវិឡា ឡានទំនើប រួមទាំងប្អូនស្រីដែរ គឺ ពីក្មេងស្រីម្នាក់ដែលទទួលការលំបាក ធ្លាប់ស្នាក់ក្នុង ទីស្នាក់ការបក្ស ឥឡូវប្អូនស្រីប្រែមុខមាត់ថ្មី មានវិឡា ឡាន ចូលហាងសុទ្ធតែប្រែន តើប្អូនស្រីនៅថាវេទនាទៀត ?

អ្នកប្រើប្រាស់បណ្តាញសង្គមដដែលរូបនេះបានបន្តថា រឿងក្រ រឿងវេទនា ជាវាសនារបស់មនុស្សទូទៅ ខ្ញុំជាមនុស្សចាស់ម្នាក់ មិនគួររិះគន់ប្អូនស្រីទេ តែប្អូនពូកែសំដែង ប្អូនមើលចៅសង្កាត់រាប់រយនាក់ទៀតផង ពេលបក្សប្រឆាំងត្រូវរំលាយ គឺត្រូវអស់សុពលភាពសិទ្ធិហើយ សម្តេចទុករយៈពេលពីរអាទិត្យ គឺទុកឱកាសដើម្បីសំរេចចិត្ត ចូលរួមបំរើពលរដ្ឋ និងសង្គមបន្តទៀត គឺមិនមែនទុកសិទ្ធិអោយទេ សូមយល់ដោយការពិចារណាផង៕